2 Petero
2 Koko ndo amvutshi wa kashi wakatombe l’atei w’anto, oko wayonga embetsha wa kashi l’atei anyu.+ Vɔ wayɔtshiya la mayɛlɛ tshɛ taato t’ɛtɛmwɛlɔ takonya l’elanyelo ndo wayanguna ɔnɛ lawakanga lakaasombe,+ wayayangɛ elanyelo ka shashimoya. 2 Ndo nto, anto efula wayoyela lɔkɛwɔ+ lawɔ la fumbɔ nsɔnyi* ndo l’ɔtɛ awɔ, anto wayɔtɛkɛta kɔlɔ+ dikambo dia mboka k’akambo wa mɛtɛ. 3 Laadiko dia laasɔ, la lokaki tshɛ, vɔ wayonyonganyiya l’ɛtɛkɛta wa lokeso. Koko kilombo kawɔ kakashikikɛma deko aha nɛ+ hatotshimbatshimba ndo elanyelo kawɔ kayoya ndooko onyake.+
4 Lo mɛtɛ, Nzambi komengenga dia mbisha andjelo wakasale pɛkato+ dilanya, lo mbadja lo lokanu lelamɛ ɔnɛ Tartara,*+ nde akaakeleka mɔlɔla* wa wodjima wa tshududu dia vɔ namema dia ndjolomboshama.+ 5 Nde komengenga dia mbisha andja w’edjedja+ dilanya, koko nde akalame Nɔa, osambisha w’akambo w’ɛlɔlɔ,+ akookokɛ l’anto akina 7+ lam’akandalɔsha Mvula k’elola l’andja wakalole l’anto wa kɔlɔ.+ 6 Nde akasha osomba wa Sɔdɔma ndo wa Ngɔmɔra dilanya.+ Lo mbetɛ esomba akɔ otoko oto, nde akatshikɛ anto wa kɔlɔ ɛnyɛlɔ k’akambo wokoya.+ 7 Nde akashimbɛ Lɔta,+ onto ɔlɔlɔ laki la lonyangu l’efula l’ɔtɛ wa lɔkɛwɔ la fumbɔ nsɔnyi* laki l’anto wa kɔlɔ, 8 nɛ dia lushi la lushi, anima* w’onto ɔlɔlɔ ɔsɔ wakahɛnyahɛnyamaka l’ɔtɛ w’akambo wa kɔlɔ wakandɛnaka ndo wakandokaka etena kakandadjasɛka l’atei awɔ. 9 Ɔnkɔnɛ, Jehowa* mbeyaka woho wa nshimbɛ anto woomamema oma l’ehemba,+ koko nde namaka anto wa kɔlɔ dia vɔ ndjolanyema* lo lushi la kilombo,+ 10 djekoleko wanɛ wayanga dia mbidja alemba w’anto akina+ mindo ndo wanɛ wɔnyɔla lowandji.+
La okaso ndo la ɛtɛ wolo tshɛ, vɔ hawoke wɔma ntɛkɛta kɔlɔ dikambo di’akanga wa lotombo, 11 etena kele andjelo, kaanga mbaalekiwɔ wolo ndo nkudu, hawaafunde lo nkamba l’ɛtɛkɛta wa kɔlɔ, l’ɔtɛ walɛmiyawɔ* Jehowa.*+ 12 Koko, anto asɔ wele oko nyama yele bu la timba yasala akambo osalasala, yakotɔ dia mindama ndo ndjakema, wekɔ lo ntɛkɛta kɔlɔ dikambo di’awui wahaweye.+ Vɔ wayolanyema lo mboka kawɔ k’elanyelo, 13 wayasalɛ vɔamɛ kɔlɔ oko difuto dia lɔkɛwɔ lawɔ la kɔlɔ.
Vɔ mbɔsaka dia ekɔ dui dia dimɛna nsɛna lɔsɛnɔ la dimɛna+ efula kaanga la yanyi. Vɔ wekɔ awadi ndo mfuu yangɛnangɛna* lo wetshelo awɔ wa lokeso lam’alɛwɔ kaamɛ la nyu.+ 14 Washo awɔ ndola tɔɔ la loseka+ ndo vɔ hawokoke ntshika nsala pɛkato ndo vɔ kɔshaka wanɛ* wele wɔdu. Vɔ wekɔ la etema wambekiyama lo ɔkɔmiya. Vɔ wekɔ ana wakadjama mananu. 15 Vɔ wambotshika mboka kosembwe, wambonganɛ. Vɔ wamboyela mboka ka Balama+ ɔna Beɔrɛ lakalange difuto di’etsha wa kɔlɔ,+ 16 koko akahangwemɛ lo woho wakandɔnyɔla kɛnɛ kosembwe.+ Nyama kɛmba wetsho ndo kahakoke ntɛkɛta kakatɛkɛta la dui di’onto dia nshimba omvutshi ɔsɔ lo dikambo di’enginya diakandalange nsala.+
17 Vɔ wekɔ tɛkɔ diele bu la ashi ndo wange weteta tsho la lɔpɛpɛ la wolo wahalɔsha mvula, ndo wodjima wa tshududu wakalamema dikambo diawɔ.+ 18 Vɔ mbutaka akambo wɛnama oko wekɔ ohomba, ko tete le wekɔ anyanya. Lo nomialomia nsaki ya demba+ ndo etsha wa lɔkɛwɔ la fumbɔ nsɔnyi,* vɔ minganyiyaka anto w’oma la mpandɔ oma le wanɛ wasɛna lo kɔlɔ.+ 19 Etena kaalakawɔ dia monga la lotshungɔ, vɔamɛ wekɔ mfumbe y’akambo wa kɔlɔ;+ nɛ dia naka onto ambɔlɛndjama oma le onto ɔmɔtshi, kete nde aya mfumbe+ kande.* 20 Lo mɛtɛ, naka l’ɔkɔngɔ w’anto mpanda oma lo mindo ya l’andja ɔnɛ+ diɛsɛ la ewo k’oshika ka Nkumadiɔndjɔ ndo Oshimbedi Yeso Kristo, ko vɔ ndjoyatambiya nto l’akambo asɔ ndo wambɔlɛndjama la wɔ, kete ekomelo kawɔ kayoleka etatelo+ kawɔ kɔlɔ. 21 Otoleka dimɛna le wɔ diaha vɔ monga la ewo k’oshika ka mboka kosembwe lo dihole dia l’ɔkɔngɔ wa vɔ mbeya mboka kakɔ, ko vɔ ndjotakɔ mboka k’ɛlɛmbɛ w’ekila wakawalongola.+ 22 Kɛnɛ kata yokedi ya mɛtɛ nyɛ kotshamaka le wɔ: “Mfɔ kambokalola lo ndɛ towɔki yatɔ ndo nsombo kambokalola lo lɔtɛkɛ+ l’ɔkɔngɔ wa tɔ mbɔka.”