1 Nkumi ya dikanga

3 Sɔlɔmɔna akadje sheke ya diwala nde la Farawɔ nkumekanga k’Edjibito. Nde akatshuke* ɔna Farawɔ,+ ko akawela l’Osomba wa Davidɛ+ polo lam’akandashidiya mbika luudu lande hita,+ luudu la Jehowa+ ndo ehele kakadinge Jɛrusalɛma.+ 2 Koko anto wakatetemala nambola elambo lo ahole wa la diko,+ nɛ dia polo l’etena kɛsɔ ko watake+ luudu dikambo dia lokombo la Jehowa. 3 Sɔlɔmɔna akatetemala nanga Jehowa lo nkɛndakɛnda lo wadjango wa Davidɛ dia she. Dikambo ɔtɔi ko nde akalambolaka elambo ndo akatshumbaka elambo lo ahole wa la diko.+

4 Nkumekanga akatshu otsha la Ngibiyɔna dia tolambola olambo lɛkɔ, nɛ dia lɛkɔ mbaki dihole dia la diko+ diakaleke lokumu.* Sɔlɔmɔna akalambola elambo wa lotshumba kinunu (1 000) lo elambwelo.+ 5 Jehowa akɛnama le Sɔlɔmɔna lo dɔ la Ngibiyɔna l’otsho, ko Nzambi akate ate: “Ɔnɔmbɛ kɛnɛ kalangayɛ dimi kosha.”+ 6 Ko Sɔlɔmɔna akate ate: “Wɛ akɛnya ngandji kayɛ k’efula ka kɔlamelo le okambi ayɛ Davidɛ papa lam’ele nde akakɛndakɛndaka la ntondo kayɛ la kɔlamelo, la sambo k’ɔlɔlɔ ndo la otema wosembwe. Wɛ ambotetemala mbɛnya ngandji kɛnɛ k’efula ka kɔlamelo polo ndo ɛlɔ lo mbosha ɔna lahomba mbidjasɛ lo kiti kande ka lowandji.+ 7 Jehowa Nzambi kami le, wonya ɔnɛ wɛ ambodja okambi ayɛ nkumekanga lo dihole dia Davidɛ papa, kaanga mbekemi dikɛnda ndo mbahamatahokɔ akambo.*+ 8 Okambi ayɛ ekɔ l’atei w’anto ayɛ wakayasɔnɛ,+ anto w’efula wahakoke mbeyama lofulo lawɔ kana mbadiema. 9 Ɔnkɔnɛ, osha okambi ayɛ otema w’okitanyiya dia nomboshaka wodja+ ayɛ ndo dia ntshikitanya ɔlɔlɔ la kɔlɔ,+ nɛ dia, ele la akoka wa nombosha anto ayɛ w’efula* anɛ?”

10 Jehowa akangɛnangɛna l’ɔtɛ wakɔɔlɔmbɛ Sɔlɔmɔna dui sɔ.+ 11 Ko Nzambi akawotɛ ate: “Lam’ele wɛ ambɔlɔmba dui sɔ ndo wɛ hayalɔmbɛ lɔsɛnɔ l’otale* kana ɔngɔnyi kana nyɔi* k’atunyi ayɛ, koko wɛ ambɔlɔmba yimba ya sambolaka awui wa dombo,+ 12 dimi layosala kɛnɛ kamboyɔlɔmba.+ Dimi layokosha lomba ndo otema wa yimba+ woho wele ndooko onto laki oko wɛ la ntondo kayɛ ndo ndooko onto layonga nto oko wɛ pondjo.+ 13 Ndo nto, dimi layokosha+ ndo kɛnɛ kahayalɔmbi, oyadi ɔngɔnyi kana lotombo+ woho wele ndooko nkumekanga kekina kayonga oko wɛ l’edja tshɛ keyɛ la lɔsɛnɔ.*+ 14 Ndo naka wɛ nkɛndakɛnda lo mboka yami lo nama wadjango ami la ɛlɛmbɛ ami, oko wakakɛndakɛnda Davidɛ shɔ,+ kete dimi layokosha ndo lɔsɛnɔ l’otale.”*+

15 Lam’akemɔ Sɔlɔmɔna, nde akashihodia dia dɔ kambondɛnaka. Ko nde akatshu la Jɛrusalɛma, akatemala la ntondo k’ɔshɛtɛ wa sheke wa Jehowa ko akalambola elambo wa lotshumba la elambo w’osanga+ ndo nde akasalɛ ekambi ande tshɛ fɛtɛ.

16 L’etena kɛsɔ, wamato 2 wa numba wakaye le nkumekanga, ko wakemala la ntondo kande. 17 Womoto la ntondo akate ate: “Onkimwe yema nkumɛmi! Dimi la womoto ɔnɛ mbidjasɛ luudu 1 ndo dimi lakote etena kakinde la mi lo luudu. 18 Lushi la 3 l’ɔkɔngɔ wa dimi mbota, womoto ɔnɛ nde lawɔ akote. Sho taki paka dimi la nde ato, ndooko onto okina laki kaamɛ la so lo luudu. 19 L’otsho, ɔnaki womoto ɔnɛ akavwe, nɛ dia nde akawokame. 20 Ko nde aketwe la midi k’otsho, akɔshi ɔnami laki lalemi etena kaki okambi ayɛ wa womoto lo djɔ, ko nde akoolashisha lalende* ndo nde akɔshi ɔnande l’odo, ko akookitshisha lalemi. 21 Wonya wakametwe la pindju dia nɔnya ɔnami, mɛnyi ko nde akavwe. Ko lakɔɔsɛdingodi dimɛna la pindju ndo lakɛnyi dia nde bu ɔnami lakamote.” 22 Koko womoto okina akate ate: “Keema, ɔnami keke la lɔsɛnɔ, ɔnayɛ kakavwe!” Koko womoto la ntondo akataka ate: “Keema, ɔnayɛ kakavwe, ɔnami keke la lɔsɛnɔ.” Ngasɔ mbakawawanaka la ntondo ka nkumekanga.

23 L’ekomelo, nkumekanga akate ate: “Ɔnɛ ate: ‘Ɔnami keke la lɔsɛnɔ, ɔnayɛ kakavwe!’ okina ate: ‘Keema, ɔnayɛ kakavwe, ɔnami keke la lɔsɛnɔ!’” 24 Nkumekanga akate ate: “Nyombela lokuwa.” Ko wakela nkumekanga lokuwa. 25 Oma laasɔ, nkumekanga akate ate: “Nyaate ɔna leke la lɔsɛnɔ lo 2 kele nyosha womoto ɔnɛ ɛtshi kɛmɔtshi ndo womoto okina ɛtshi kekina.” 26 Mbala kakɔ ɔtɔi, womoto kanga ɔna laakasɛnɛ akasɛngasɛnga nkumekanga, nɛ dia nde akokaka ɔnande kandji. Nde akate ate: “Nkumɛmi lam’alangayɛ, nyowosha ɔna leke la lɔsɛnɔ! Tanyoodiakake!” Koko womoto okina akataka ate: “Nyowate lo 2 kele sho tshɛ tohombe!” 27 Ko nkumekanga akakadimola ate: “Nyosha womoto la ntondo ɔna leke la lɔsɛnɔ! Tanyoodiakake, nɛ dia nde kele nyango.”

28 Ɔnkɔnɛ, ase Isariyɛlɛ tshɛ wakoke woho wakasambola nkumekanga kilombo kɛsɔ ko vɔ wakoke nkumekanga+ wɔma, nɛ dia vɔ wakɛnyi dia lomba la Nzambi laki kaamɛ la nde dia nsambola akambo.+