2 Nkumi ya dikanga
11 Lam’akɛnyi Ataliya+ nyango Ahaziya dia ɔnande ambovɔ,+ nde akonɛɛ ko akalanya ɔlɔndji w’otondo wa nkumekanga.*+ 2 Koko Jɛhɔsheba ɔna nkumekanga Jɛhɔrama la womoto, kadiyɔ aki Ahaziya akɔshi Jɛhɔashi+ ɔna Ahaziya, akawonya oma l’atei w’ana wa nkumekanga wakahombe ndjakema, ko akoolame nde la ɔndɛdi ande lo luudu lɔmɔtshi la ndala la l’etei. Vɔ wakakongɛ dia mboshɛ diaha Ataliya mbɛɛna, ko nde kondjakema. 3 Nde akatshikala la nde l’edja k’ɛnɔnyi 6, oshɛmi lo luudu la Jehowa etena kakolɛka Ataliya lo wodja.
4 L’ɔnɔnyi wa 7, Jɛhɔyada akatome dui le ewandji w’anto nkama nkama w’alami w’ase Kariya ndo alami* wa luudu l’owandji,+ ko akawaela oya le nde lo luudu la Jehowa. Nde akakɔtsha la wɔ losalo* ndo akaatshibia la lɔ lo luudu la Jehowa, ko oma laasɔ, nde akawaɛnya ɔna nkumekanga.+ 5 Nde akawadjangɛ ate: “Nyosale nganɛ: K’asato ɔtɔi kanyu kayonga la ɔkɛndɛ lo Sabato ndo kayolamaka luudu* la nkumekanga+ dimɛna; 6 k’asato ɔtɔi kekina kayonga la Soko di’Etshina, ndo k’asato ɔtɔi kekina nto kayonga la soko diele l’otshimba w’alami wa luudu l’owandji. Nyayengɔnyaka dia namaka luudu lakɔ. 7 Elui anyu 2 wahatonga la ɔkɛndɛ lo Sabato mbahomba namaka luudu la Jehowa dimɛna dia nkokɛ nkumekanga. 8 Nyu pombaka dinga nkumekanga lo wedi akɔ tshɛ, onto l’onto la dihomɔ diande dia ta lo anya. Onto tshɛ layɔtɔ l’atei w’ɛnɔngɔ w’anto pombaka ndjakema. Nyongake kaamɛ la nkumekanga dihole tshɛ diatshɔnde.”*
9 Ewandji w’anto nkama nkama+ wakasale paka oko wakawadjangɛ ɔlɔmbɛdi Jɛhɔyada. Ɔnkɔnɛ, onto l’onto akɔshi apami ande waki la ɔkɛndɛ lo Sabato kaamɛ la wanɛ waki komonga la ɔkɛndɛ lo Sabato, ko wakaye le ɔlɔmbɛdi+ Jɛhɔyada. 10 Oma laasɔ, ɔlɔmbɛdi akasha ewandji w’anto nkama nkama akɔnga la dingawo di’etshimbedi dia nkumekanga Davidɛ diaki lo luudu la Jehowa. 11 Ko alami+ wa luudu l’owandji wakemala lo ahole awɔ, onto l’onto la dihomɔ diande dia ta lo anya, oma lo lɛkɛ la lonya l’omi la luudu polo lo lɛkɛ la lonya la lɔmɔsɔ la luudu, suke la elambwelo+ ndo suke la luudu lakɔ, dinga nkumekanga. 12 Oma laasɔ, Jɛhɔyada akatondja ɔna nkumekanga+ ko akɔɔlɔtsha dɛmbɔ dia nkoso* ndo Ɔmɛnyi,*+ ko wakawetɛ nkumekanga ndo wakookite esɔ. Vɔ wakatatɛ mbida nsaka ndo wakate vate: “Nkumekanga alombe!”+
13 Lam’akoke Ataliya nkindo y’anto watalawɔ, mbala kakɔ ɔtɔi nde akaye le anto lo luudu la Jehowa.+ 14 Oma laasɔ, nde akɛnyi nkumekanga emadi lɛkɔ suke la ekundji, oko wakadiasalemaka.+ Ewandji ndo ambidi w’amama+ waki kaamɛ la nkumekanga ndo anto tshɛ wa lo wodja wakangɛnangɛnaka ndo wakadaka amama. Kam’akɛnyi Ataliya ngasɔ, nde akaatshatsha ahɔndɔ ande ko akate la dui dia wolo ate: “Wambɔmbɔtwɛ sheke! Wambɔmbɔtwɛ sheke!” 15 Koko ɔlɔmbɛdi Jɛhɔyada akadjangɛ ewandji w’anto nkama nkama,+ wanɛ wakasɔnama oko ewandji w’asɔlayi ko akawatɛ ate: “Nyowonya oma lo ɛnɔngɔ w’anto ndo naka onto ɔmɔtshi mboyela, kanyoodiake la lokuwa la ta!” Dikambo ɔlɔmbɛdi akate ate: “Tanyoodiakake lo luudu la Jehowa.” 16 Ɔnkɔnɛ vɔ wakawonde ndo lam’akawakome la nde lo dihole diatɔtɔka mfalasa lo luudu* la nkumekanga,+ vɔ wakoodiake laawɔ.
17 Ko Jɛhɔyada akadje sheke lam’asa Jehowa la nkumekanga ndo la anto+ dia vɔ wayotetemala monga ekambi wa Jehowa ndo nde akadje sheke nto lam’asa nkumekanga l’anto.+ 18 L’ɔkɔngɔ wa laasɔ, anto tshɛ wa lo wodja wakatshu lo luudu* la Baala, ko wakanyukola dilambwelo+ diande, wakahandjola dikishi+ diande vwa ndo wakadiake Matanɛ ɔlɔmbɛdi wa Baala+ la ntondo ka dilambwelo diande.
Oma laasɔ, ɔlɔmbɛdi akasɔnɛ emendji wa luudu la Jehowa.+ 19 Ndo nto, nde akɔshi ewandji w’anto nkama nkama,+ alami w’ase Kariya, alami wa luudu+ l’owandji ndo anto tshɛ wa lo wodja dia vɔ ntshindɛ nkumekanga oma lo luudu la Jehowa, ko vɔ wakakome lo luudu* la nkumekanga lo mbeta lo soko dia olamelo wa luudu l’owandji. Oma laasɔ, nde akadjasɛ lo kiti ka lowandji ka nkumi ya dikanga.+ 20 Ɔnkɔnɛ, anto tshɛ wa lo wodja wakangɛnangɛna ndo osomba waki ki, nɛ dia wakadiake Ataliya la lokuwa la ta lo luudu la nkumekanga.