Danyɛlɛ

6 Dariyo akɛnyi dimɛna dia nsɔna waa satrapɛ 120 dia mbolɛ diolelo+ di’otondo. 2 Ɛlɔhɛ 3 wa laadiko waki ewandji awɔ, ɔtɔi wa l’atei awɔ aki Danyɛlɛ;+ ko waa satrapɛ+ wakelaka alapɔlɔ le wɔ diaha nkumekanga nshisha ndooko ɛngɔ. 3 Danyɛlɛ akayatshikitanyaka la ɛlɔhɛ ekina wa laadiko ndo waa satrapɛ, nɛ dia nyuma ka laande kaki le nde,+ ko nkumekanga akayange dia mbodiya laadiko dia diolelo di’otondo.

4 L’etena kɛsɔ, ɛlɔhɛ wa laadiko ndo waa satrapɛ wakayangaka dui dimɔtshi dia vɔ mfunda Danyɛlɛ lo kɛnɛ kendana la awui wa wodja,* koko vɔ kokoka ntana ndooko dui dia mbofunda kana dui dia kɔlɔ, nɛ dia nde aki onto lakawakokaka mbɛkɛ otema ndo laki kominyaka akambo yimba ndo dui dia kɔlɔ kokoka tanema le nde. 5 Ko apami asɔ wakataka vate: “Hatototana Danyɛlɛ nɛ ndooko la dui dia mbofunda, onyake lo kɛnɛ kendana la ɛlɛmbɛ wa Nzambi+ kande.”

6 Ɔnkɔnɛ, olui wa ɛlɔhɛ wa laadiko tshɛ, ewandji wa laadiko ndo waa satrapɛ tshɛ wakatshu le nkumekanga ndo wakatowotɛ vate: “Nkumekanga Dariyo le, olombake pondjo. 7 Ɛlɔhɛ wa laka nkumekanga tshɛ, waa prefɛ, waa satrapɛ, ɛlɔhɛ wa laadiko wa laka nkumekanga ndo waa nguvɛrnɛrɛ wakakɛtshanya kaamɛ lam’asawɔ dia mbidja didjango dia nkumekanga ndo dia mbidja ɔlɛmbɛ* dia lo nshi 30, onto tshɛ layɔlɔmba nzambi kɛmɔtshi kana onto ɔmɔtshi, onyake wɛ nkumekanga, pombaka mbikashema lo difuku dia ntambwɛ.+ 8 Ɔnkɔnɛ nkumekanga le, wɛ mbeyaka nshikikɛ didjango diakɔ ndo disinya+ diaha diɔ tshikitanyema lo ndjela ɛlɛmbɛ w’ase Mediya la Pɛrɛsiya wahakoke mbitɔ.”+

9 Ko nkumekanga Dariyo akasinya didjango ndo ɔlɛmbɛ akɔ.

10 Koko kam’akeye Danyɛlɛ dia wambosinya didjango diakɔ, nde akatshu lo luudu lande lele adidishi wa lo luudu la la diko wakɛlɛ otsha la Jɛrusalɛma+ waki hwe. Ndo mbala 3 lo lushi nde akakaka adwe, akalɔmbaka ndo akatombolaka Nzambi kande, oko wakandasalaka ntondo mbala la mbala. 11 L’etena kɛsɔ, apami akɔ wakɔtɔ ndo wakatane Danyɛlɛ alɔmba ndo asɛngasɛnga Nzambi kande dia mbooka kɛtshi.

12 Ko vɔ wakatshu le nkumekanga ndo wakawohola ɔlɛmbɛ wa nkumekanga ɔnɛ: “Shi wɛ akasinya ɔlɛmbɛ wata dia lo nshi 30, onto tshɛ layɔlɔmba nzambi kɛmɔtshi kana onto ɔmɔtshi, onyake wɛ nkumekanga, pombaka mbikashema lo difuku dia ntambwɛ?” Nkumekanga akakadimola ate: “Dui sɔ diakashikikɛma dimɛna lo ndjela ɛlɛmbɛ w’ase Mediya la Pɛrɛsiya wahakoke mbitɔ.”+ 13 Ko vɔ wakatɛ nkumekanga mbala kakɔ ɔtɔi vate: “Danyɛlɛ, mfumbe k’oma la Juda+ hakɔlɛmiya, wɛ nkumekanga ndo halɛnya ɔlɛmbɛ wakayasinya, nɛ dia mbala 3 lo lushi nde ekɔ lo nɔmba.”+ 14 Kam’akoke nkumekanga dui sɔ, nde akakɔmɔ efula ndo akayange woho wa nde mbitsha Danyɛlɛ; ndo polo lam’akadje wonya, nde akadjaka welo tshɛ dia mboshimbɛ. 15 L’ekomelo, apami asɔ wakɔtɔ olui le nkumekanga ko wakatɛ nkumekanga vate: “Nkumekanga le, tohɛke dia ɛlɛmbɛ w’ase Mediya la Pɛrɛsiya mbutaka dia ɔlɛmbɛ kana didjango tshɛ diamboshikikɛ nkumekanga hakoke tshikitanyema.”+

16 Ɔnkɔnɛ, nkumekanga akasha didjango ndo wakatoya la Danyɛlɛ, ko wakawokɛ lo difuku dia ntambwɛ.+ Nkumekanga akatɛ Danyɛlɛ ate: “Nzambi kayɛ katetemalayɛ kambɛ ayokotshungola.” 17 Ko wakaye la dive ndo wakadikitsha lo mbɔtwɛlɔ* ka difuku, ko nkumekanga akadimate lɔhɛtɛ lande l’ematelo ndo lɔhɛtɛ l’ematelo laki ɛlɔhɛ ande diaha ndooko dui tshikitanyema lo dikambo dia Danyɛlɛ.

18 Ko nkumekanga akatshu lo luudu lande la nkumekanga. Nde aketsha otsho w’otondo aha la ndɛ ɛngɔ ndo akatone dui tshɛ diasha ɔngɛnɔngɛnɔ* ndo nde kondala djɔ.* 19 La yosose, nkumekanga akemɔ ko akatshu esadi otsha lo difuku dia ntambwɛ. 20 Kam’akandasukana la difuku, nde akawelɛ Danyɛlɛ la dui di’ɔkɛtshi. Nkumekanga akambola Danyɛlɛ ate: “Danyɛlɛ le, wɛ okambi wa Nzambi kasɛna, onde Nzambi kayɛ katetemalayɛ kambɛ aki la akoka wa kotsha oma le ntambwɛ?” 21 Danyɛlɛ akatɛ nkumekanga mbala kakɔ ɔtɔi ate: “Nkumekanga le, olombake pondjo. 22 Nzambi kami akatumi ondjelo ande ndo akadihi enyɔ wa ntambwɛ+ ndo yɔ hayonsale kɔlɔ,+ nɛ dia dimi hatanemi la onongo la ntondo kande ndo hakosale wɛ nkumekanga ndooko dui dia kɔlɔ.”

23 Nkumekanga akoke ɔlɔ wa mamba ndo akadjanga dia vɔ ntondja Danyɛlɛ oma lo difuku. Lam’akatombe Danyɛlɛ oma lo difuku, nde aki tshɛ ki nɛ dia nde akayaɛkɛ le Nzambi+ kande.

24 Ko nkumekanga akasha didjango, ko wakaye la apami wakafunde* Danyɛlɛ, ko wakawakasha lo difuku dia ntambwɛ kaamɛ la anawɔ ndo wadiɛwɔ. La ntondo ka vɔ nkoma l’ɛse ka difuku, ntambwɛ yakawande ndo yakatɛtshatɛtsha weka+ awɔ tshɛ.

25 Ko nkumekanga Dariyo akafundɛ anto tshɛ, wedja tshɛ, elui w’ɛtɛkɛta tshɛ wadjasɛ lo nkɛtɛ+ k’otondo ate: “Wɔladi w’efula wayale la nyu! 26 Dimi lambodjanga dia lo diolelo diami di’otondo, anto pombaka nsaka lokomba la wɔma la ntondo ka Nzambi ka Danyɛlɛ.+ Nɛ dia nde ekɔ Nzambi kasɛna ndo nde tshikalaka pondjo. Diolelo diande hadiolanyemaki pondjo, ndo lowandji lande lekɔ la pondjo.+ 27 Nde tshungolaka,+ shimbɛka ndo salaka tolembetelo ndo akambo wa diambo l’olongo ndo la nkɛtɛ,+ nɛ dia nde akahandja Danyɛlɛ oma lo nkala ya ntambwɛ.”

28 Ɔnkɔnɛ, Danyɛlɛ sɔ akahame lo diolelo dia Dariyo+ ndo lo diolelo dia Kurɔ k’ose Pɛrɛsiya.+