Rɔmɔ
16 Dikambo dia kadiyɛso Febe lakamba lo etshumanelo ka la Kɛnɛkɛrɛya+ mbanyewoyami,* 2 dia nyu mbolongola lo Nkumadiɔndjɔ lo yoho yakoka le ekilami ndo mbosha ekimanyielo tshɛ kakokande monga la ohomba,+ nɛ dia nde lawɔ akakimanyiyaka anto efula, mbidja ndo dimi.
3 Nyombishe Piriskila la Akula,+ asekami wa l’olimu le Kristo Yeso mɔyɔ. 4 Vɔ wakadje nsɛnɔ yawɔ lo waale l’ɔtɛ ami*+ ndo aha dimɛ oto, koko ndo tshumanelo tshɛ di’ase wedja diekɔ lo mbasha losaka. 5 Nyosha ndo etshumanelo kasangana lo luudu lawɔ mɔyɔ.+ Nyosha Epayinɛtɔ, olangemi ami, ɔnɛ lele l’atei w’anto wa ntondo wa la Aziya wakakome ambeki wa Kristo mɔyɔ. 6 Nyosha Mariya lakakambe olimu wa wolo lo dikambo dianyu mɔyɔ. 7 Nyosha Andronikusɛ la Juniya, ewotɔ ami+ ndo asekami wa lo lokanu mɔyɔ, dikambo vɔ wekɔ anto weyama dimɛna le apɔstɔlɔ ndo vɔ waya edja efula kaamɛ la Kristo ndekami.
8 Nyombishe Apliyatusɛ, olangemi ami lo Nkumadiɔndjɔ mɔyɔ. 9 Nyosha Urubano osekaso la l’olimu wa Kristo ndo Stakisɛ lokami ngandji mɔyɔ. 10 Nyosha Apɛlɛsi, onto lambetawɔma le Kristo mɔyɔ. Nyosha ase luudu laki Aristobulo mɔyɔ. 11 Nyosha Hɛrɔdiyɔna wa owotɔ ami mɔyɔ. Nyosha ase luudu la Narsisɛ wele lo Nkumadiɔndjɔ mɔyɔ. 12 Nyosha Turufɔna la Turufɔsa, wamato wakambɛ Nkumadiɔndjɔ olimu wa wolo mɔyɔ. Nyosha Pirisi, kadiyɛso ka ngandji mɔyɔ, nɛ dia nde akakambe olimu wa wolo lo Nkumadiɔndjɔ. 13 Nyosha Rufusɛ, ɔsɔnami wa lo Nkumadiɔndjɔ ndo nyango lele nyɔmi mɔyɔ. 14 Nyosha Asikirito, Filɛngɔna, Hɛrɛmɛsɛ, Patrobasɛ, Hɛrɛmasɛ ndo anangɛso wele kaamɛ la wɔ mɔyɔ. 15 Nyosha Filɔlɔngɛ la Juliya, Nɛre nde la kadiyɛnde ndo Ɔlipasɛ la ekilami tshɛ wele kaamɛ la wɔ mɔyɔ. 16 Nyoshane mɔyɔ wa la bizɛ k’ekila. Tshumanelo tshɛ dia Kristo diambonyotomɛ mɔyɔ.
17 Kakianɛ nyu analengo, dimi lambonyolaka dia nyu menda dimɛna wanɛ wadja diatɔnelo ndo wakitshanɛ etamba wa ntakanya walɔshana la wetshelo wakanyalongola ndo nyowaewɔ.+ 18 Nɛ dia anto wa woho ɔsɔ wekɔ mfumbe, aha ya Kristo Nkumɛso, koko ya nsaki* yawɔ hita, ndo oma l’ɛtɛkɛta awɔ wa mpɛ la wa lɔɔngɔ, vɔ wekɔ lo nkɔsha etema w’anto wele bu la yewo. 19 Okitanyiya anyu wambeyama le anto tshɛ. Ɔnkɔnɛ, lekɔ la ɔngɛnɔngɛnɔ lo dikambo dianyu, koko dimi nangaka dia nyu monga la lomba lo kɛnɛ kele ɔlɔlɔ koko aha la onongo lo kɛnɛ kele kɔlɔ.+ 20 Nɛ dia Nzambi kasha wɔladi ayanga minola Satana+ l’ɛse k’ekolo anyu keema edja. Ɔlɔlɔ waheyama mbɛdika wa Nkumɛso Yeso wayale la nyu!
21 Timɔte lakamba kaamɛ la mi anyotomɛ mɔyɔ kaamɛ ndo Lukiyo, Jasɔna ndo Sosipatɛrɛ, ewotɔ ami+ wanyotomɛ mɔyɔ.
22 Dimi Tɛrɛtiyo lofundji mukanda ɔnɛ lambonyosha mɔyɔ lo Nkumadiɔndjɔ.
23 Ngayo+ kanga luudu lohangimi ndo kanga luudu lasangana etshumanelo k’otondo anyotomɛ mɔyɔ. Erasto olami wa diangɔ dia l’osomba nde la Karitusɛ k’ɔnango wambonyotomɛ mɔyɔ. 24* ——
25 Ɔnkɔnɛ, Ɔnɛ lakoka nyokeketsha lo ndjela lokumu l’ɔlɔlɔ lewoyami ndo esambishelo ka Yeso Kristo, lo ndjela woshwelo wa sheke y’ekila+ yakashɛma edja efula, 26 koko yɔ yamboshɔma* kakianɛ ndo yambeyama l’ekimanyielo ka Afundelo w’amvutshi le ase wedja tshɛ lo ndjela didjango dia Nzambi ka pondjo dia nkimanyiya anto dia vɔ monga la okitanyiya oma lo mbetawɔ. 27 Lotombo layale le Nzambi lele ndamɛ kanga lomba+ lo tshimbo ya Yeso Kristo pondjo pondjo! Aamɛɛ.