Etsha

8 Saolo lo wedi ande, aketawɔ dia vɔ mbodiaka.+

Lushi lɔsɔ, ɔhɛnyɔhɛnyɔ wa wolo wakatatɛ lo etshumanelo kaki la Jɛrusalɛma. Ambeki tshɛ wakahandjɔnɛ l’ɛtshi ka nkɛtɛ ka Judeya la Samariya,+ onyake apɔstɔlɔ. 2 Koko apami wakokaka Nzambi wɔma wakayɛmba odo wa Stɛfano dia tookundɛ ndo wakoolele efula. 3 Saolo akatatɛ mpɛnyahɛnya etshumanelo la ngala tshɛ. Nde akɔtɔka lo luudu la luudu ndo akatondjaka apami la wamato l’andja ko akawadjaka lo lokanu.+

4 Koko ambeki wakahandjɔnɛ waketeta lo wodja w’otondo watewoya lokumu l’ɔlɔlɔ lendana l’ɔtɛkɛta wa Nzambi.+ 5 Filipɛ akaholɔ otsha l’osomba* wa Samariya+ ndo akatotatɛ nsambisha anto wa lɛkɔ akambo wendana la Kristo. 6 Lam’akahokamɛka ndo lam’akendaka elui w’anto tolembetelo takasalaka Filipɛ, vɔ tshɛ wakadjaka yambalo yawɔ tshɛ lo akambo wakandataka. 7 Anto efula waki la ɛdiɛngɛ ndo ɛdiɛngɛ ɛsɔ wakahangɔhangɔka, ko wakatombaka.+ Ndo nto, akanga wa dikuse efula ndo akanga wa tshumbe wakakɔnɔka. 8 Ɔnkɔnɛ, ɔngɛnɔngɛnɔ wa mamba waki l’osomba ɔsɔ.

9 L’osomba akɔ mbaki pami kɛmɔtshi kakawelɛka Simɔna, kakasalaka akambo wa maji ntondo ndo nde akambiyaka ase Samariya lo ndjata dia nde aki onto la woke. 10 Ko vɔ tshɛ, ntatɛ oma le ɔnɛ lakaleke dikɛnda polo le ɔnɛ lakaleke opalanga wakoohokamɛka la yambalo tshɛ ndo wakataka ɔnɛ: “Pami kɛnɛ ekɔ Wolo waki Nzambi welamɛ ɔnɛ: Wolo w’efula.” 11 Ko vɔ wakoohokamɛka la yambalo tshɛ nɛ dia nde akawawambiya l’etena k’otale l’ɔtɛ w’akambo wa maji wakandasalaka. 12 Koko lam’akewoyaka Filipɛ lokumu l’ɔlɔlɔ la Diolelo dia Nzambi+ ndo lendana la lokombo la Yeso Kristo, vɔ waketawɔ ko apami ndo wamato wakabatizama.+ 13 Simɔna ndamɛ akakome ombetawudi ndo l’ɔkɔngɔ wa nde batizama, nde akatetemala monga kaamɛ la Filipɛ+ ndo nde akaambaka lam’akandɛnaka tolembetelo ndo akambo wa diambo wakasalemaka.

14 Lam’akoke apɔstɔlɔ waki la Jɛrusalɛma dia ase Samariya wambetawɔ ɔtɛkɛta wa Nzambi,+ vɔ wakatome Petero la Joani le wɔ. 15 Ko vɔ wakatshu ndo wakataalɔmbɛ dia vɔ nongola nyuma k’ekila.+ 16 Nɛ dia laasɔ ko nyuma k’ekila kataholɔ kaanga le onto 1 la l’atei awɔ, koko vɔ wakabatizama tsho lo lokombo la Nkumadiɔndjɔ Yeso.+ 17 Ko vɔ wakawawahɛ anya+ ndo wakatatɛ nongola nyuma k’ekila.

18 Lam’akɛnyi Simɔna dia anto wakalongolaka nyuma k’ekila lam’akawawahɛ apɔstɔlɔ anya, nde akawasha falanga, 19 ata ate: “Nyombisha ndo dimi lawɔ wolo ɔnɛ kele onto tshɛ layomahɛ anya kalongole nyuma k’ekila.” 20 Koko Petero akawotɛ ate: “Falanga yayɛ yavu la yɛ, nɛ dia wɛ aki la kanyi ya nkondja losha la woshasha w’oma le Nzambi lo ekimanyielo ka falanga.+ 21 Dikambo nɛ hadiokende ndo diɔ bu diakiyɛ, nɛ dia otema ayɛ bu ɔlɔlɔ lo washo wa Nzambi. 22 Ɔnkɔnɛ, yatshumoya oma lo kɔlɔ kayɛ ndo sɛngasɛnga Jehowa* dia naka kokaka, nde kodimanyiya lo tokanyi ta kɔlɔ tele l’otema ayɛ. 23 Nɛ dia dimi lambɛna dia wɛ ekɔ lɔlɛngɔ* l’ololo ndo ose olimu wa kɔlɔ.” 24 Simɔna akaakadimola ate: “Lam’alanganyu, nyɔsɛngɛsɛngɛ Jehowa* diaha akambo wotshinyu asɔ komɛmi.”

25 Ɔnkɔnɛ, l’ɔkɔngɔ wa vɔ nsambisha dimɛna dimɛna ndo mbewoya ɔtɛkɛta wa Jehowa,* vɔ wakatatɛ nkalola oya la Jɛrusalɛma ndo wakatewoyaka lokumu l’ɔlɔlɔ lo tongelongelo efula ta la Samariya.+

26 Koko ondjelo+ wa Jehowa* akatɛ Filipɛ ate: “Onɛɛ, tshɔka otsha lo sidɛ lo otadimbo weta oma la Jɛrusalɛma otsha la Ngaza.” (Ɔsɔ ekɔ otadimbo wa l’oswe wa shɛnga.) 27 Nde akonɛɛ, akatshu ndo nyolonge, ɔlɛnga* ɔmɔtshi w’ose Etiyɔpiya, pami kɛmɔtshi kaki ɔnɛnɛ laka Kandakɛ, nkumekanga ka womoto k’Etiyɔpiya ndo pami kakɔ kakalamaka ekundji ande tshɛ. Nde akatshu la Jɛrusalɛma dia tɔtɛmɔla,+ 28 ko nde akayakalolaka, odjashi lo pusupusu kande ndo atadia la dui dia wolo efundelo wa omvutshi Isaya. 29 Ko nyuma k’ekila kakatɛ Filipɛ ɔnɛ: “Tshɔka suke la pusupusu kengo.” 30 Filipɛ akatalawɔka kaamɛ la tɔ ndo nde akoke ɔlɛnga akɔ atadia efundelo wa omvutshi Isaya la dui dia wolo, ko nde akate ate: “Onde wɛ mɛtɛ ekɔ lo nshihodia* kɛnɛ katayadia?” 31 Nde akate ate: “Ngande mɛtɛ wayomoshihodia naka onto hambetshisha?” Ko nde akalɔmbɛ Filipɛ dia nde mbidɛ ndo mbidjasɛ kaamɛ la nde lo pusupusu. 32 Etenyi k’Afundelo kakandadiaka la dui dia wolo tɔ kɛnɛ: “Nde akatɔlama oko ɔkɔkɔ otsha lo ediakelo ndo oko ɔna ɔkɔkɔ wɔlami ki la ntondo ka ɔnɛ loohembola wɛɔsa, ɔnkɔnɛ nde hafola onyɔ ande.+ 33 Nde akashama nsɔnyi ndo vɔ kombosalɛ akambo la losembwe.+ Onto akɔna ayɔkɔndɔla kiambokambo tshɛ yendana la lɔlɔnga lande? Nɛ dia lɔsɛnɔ lande lambɔsama oma la nkɛtɛ.”+

34 Ko ɔlɛnga akɔ akatɛ Filipɛ ate: “Lam’alangayɛ ombutɛ, di’onto akɔna ata omvutshi akambo asɔ? Onde dikambo diande ndamɛ kana dikambo di’onto okina?” 35 Filipɛ akatatɛ ntɛkɛta ndo mbolembetshiya lokumu l’ɔlɔlɔ lendana la Yeso, ntatɛ lo kɛnɛ kɔtɛkɛtami lanɛ. 36 Lam’akawatatshɔka lo mboka, vɔ wakakome lo dihole diaki ashi ndo ɔlɛnga ɔsɔ akate ate: “Enda ashi vɔ anɛ, kakɔna kashimba dia dimi batizama?” 37* —— 38 Nde akate dia vɔ memadia pusupusu, ko Filipɛ la ɔlɛnga akɔ wakaholɔ l’ashi, ko Filipɛ akoobatiza. 39 Lam’akawatombe oma l’ashi, mbala kakɔ ɔtɔi nyuma kaki Jehowa* kakɔshi Filipɛ, ko ɔlɛnga akɔ kombɛna nto, koko nde akatetemala la lɔkɛndɔ lande atangɛnangɛna. 40 Koko Filipɛ akatotanema la Ashidɔdɛ, ko nde akatenyanya ɛtshi kakɔ ka nkɛtɛ atatetemala mbewoya lokumu l’ɔlɔlɔ l’esomba tshɛ polo lam’akandakome la Kayisariya.+