1 Samuɛlɛ

15 Oma laasɔ, Samuɛlɛ akatɛ Saolo ate: “Jehowa akantome dia ndjokokita esɔ dia wɛ monga nkumekanga ka wodja ande w’Isariyɛlɛ.+ Kakianɛ, hokamɛ kɛnɛ kata+ Jehowa. 2 Jehowa kanga lolembelembe kata ate: ‘Dimi layokoya l’ase Amalɛka l’ɔtɛ wa kɛnɛ kakawasalɛ ase Isariyɛlɛ lam’akawaalɔsha lo mboka etena kakawayatombaka oma l’Edjibito.+ 3 Ɔnkɔnɛ, tshɔka todiake ase Amalɛka+ ndo towalanya+ kaamɛ la kɛnɛ tshɛ kele la wɔ. Towatshikake.* Wɛ pombaka ndjaka+ apami, wamato, ana w’akɛnda, ana w’ashashi, ngɔmbɛ, ɛkɔkɔ, kamɛlɔ ndo mponda.’”+ 4 Ko Saolo akatshumanya anto ndo akadia anto akɔ la Tɛlayima: Vɔ waki asɔlayi nunu nkama hiende (200 000) wakɛndakɛnda l’ekolo ndo apami nunu dikumi (10 000) w’oma la Juda.+

5 Saolo akatshu polo l’osomba w’Amalɛka ndo akatoholama suke la okidi. 6 Oma laasɔ, Saolo akatɛ ase Kenɛ+ ate: “Nyotshu, nyomɔ oma l’atei w’ase Amalɛka diaha dimi nyoshila oshiki kaamɛ la wɔ.+ Nɛ dia nyu nyakɛnya ase Isariyɛlɛ+ tshɛ ngandji ka kɔlamelo etena kakawayatombaka oma l’Edjibito.” Ɔnkɔnɛ, ase Kenɛ wakamɔ l’atei w’ase Amalɛka. 7 L’ɔkɔngɔ wa laasɔ, Saolo akadiake ase Amalɛka+ oma la Havila+ polo la Shura+ yosukanyi la Edjibito. 8 Nde akande Anganga+ nkumekanga ka Amalɛka asɛna, koko anto akina tshɛ, nde akaadiake la lokuwa la ta.+ 9 Koko Saolo nde l’anto ande wakatshike* Anganga ndo ɛkɔkɔ la ngɔmbɛ yoleki amɛna,+ nyama ya wata, ɛkɔkɔ wa waomi ndo diangɔ tshɛ diaki amɛna la lɔsɛnɔ. Vɔ konanga dilanya. Koko vɔ wakalanya diangɔ tshɛ di’anyanya ndo diaki komonga la nɛmɔ.

10 Oma laasɔ, ɔtɛkɛta wa Jehowa wakaye le Samuɛlɛ ɔnɛ: 11 “Dimi lambonyanga* l’ɔtɛ wakametɛ Saolo nkumekanga, nɛ dia nde ambotshika ndjelami ndo nde hakitanyiyisha ɛtɛkɛta ami.”+ Samuɛlɛ akahandjɔ wɔɔngɔ ndo nde akatetemala ndelɛ Jehowa otsho w’otondo.+ 12 Lam’aketɔ Samuɛlɛ la pindju ka pɛɛ dia tohomana la Saolo, wakatɛ Samuɛlɛ ɔnɛ: “Saolo akatshu otsha la Karamɛlɛ+ ndo nde akatoyasalɛ+ mɔnima lɛkɔ. Oma laasɔ, nde akakadimɔ ko akaholɔ otsha la Ngilingalɛ.” 13 L’edjedja ka wonya, lam’akatokoma Samuɛlɛ le nde, Saolo akawotɛ ate: “Jehowa akɔtshɔkɔlɛ! Dimi lakakitanyiya ɔtɛkɛta wa Jehowa.” 14 Koko Samuɛlɛ akate ate: “Ko londjo lakɔna l’ɛkɔkɔ ndo londjo lakɔna la ngɔmbɛ lokami+ lɔsɔ?” 15 Ko Saolo akate ate: “Wakayiela oma laka ase Amalɛka, nɛ dia anto wakatshike* ɛkɔkɔ la ngɔmbɛ yoleki amɛna la lɔsɛnɔ dia ndjoyilambola Jehowa Nzambi kayɛ. Koko takalanya diangɔ dikina tshɛ.” 16 Ko Samuɛlɛ akatɛ Saolo ate: “Ɔlama! Konga kote kɛnɛ kakambute Jehowa l’otsho w’ɛlɔ.”+ Ko nde akate ate: “Ɛsɔ ta!”

17 Samuɛlɛ akatetemala mbuta ate: “Shi wɛ akayaɔsaka onto l’anyanya lo washo+ ayɛ hita etena kakawaketɛ ɔtɛ wa waoho w’Isariyɛlɛ ndo etena kakakokite Jehowa esɔ dia kɔsɔna nkumekanga k’Isariyɛlɛ?+ 18 L’ɔkɔngɔ diko, Jehowa akakotome ndo akakotɛ ate: ‘Tshɔka tolanya+ atshi wa pɛkato w’ase Amalɛka. Towalɔsha polo wɛ ambaashila+ oshiki.’ 19 Ko lande na kakiyɛ kokitanyiya dui dia Jehowa? Lo dihole dia nsala ngasɔ, wɛ akakungusɔ la lokaki tshɛ otsha lo diangɔ dia dimbo+ ndo wɛ akasale kɛnɛ kele kɔlɔ lo washo wa Jehowa!”

20 Koko Saolo akatɛ Samuɛlɛ ate: “Toko dimi lakakitanyiya dui dia Jehowa! Dimi lakatshu lɛnɛ akantome Jehowa ndo lakaye la Anganga nkumekanga k’Amalɛka, ndo lakalanya+ ase Amalɛka. 21 Koko wodja mbakɔshi ɛkɔkɔ la ngɔmbɛ oma lo diangɔ dia dimbo, kɛnɛ koleki dimɛna l’atei wa kɛnɛ kakahombe ndanyema dia ndjolambola Jehowa Nzambi kayɛ la Ngilingalɛ.”+

22 Ko Samuɛlɛ akate ate: “Onde Jehowa ndeka ngɛnangɛna elambo wa lotshumba la weshasha+ oleki nkitanyiya dui dia Jehowa? Eenda, okitanyiya ndeka olambo+ ndo mbidja yimba ndeka wata+ w’ɛkɔkɔ wa waomi; 23 nɛ dia ɔtɔmbɔkwɛlɔ+ wekɔ oko pɛkato ka diendja,+ ndo ndjaɛnyanya la otako tshɛ ekɔ oko nkamba la wolo wa maji ndo ɔtɛmwɛlɔ wa dikishi.* Lam’ele wɛ ambotona ɔtɛkɛta wa Jehowa,+ nde ambotona dia wɛ ntetemala monga nkumekanga.”+

24 Oma laasɔ, Saolo akatɛ Samuɛlɛ ate: “Dimi lakasale pɛkato, nɛ dia lakɔnyɔla didjango dia Jehowa ndo ɛtɛkɛta ayɛ, dikambo dimi lakoke anto wɔma ko laketawɔ kɛnɛ kakawate. 25 Lam’alangayɛ, onkimwe lo pɛkato kami ndo etawɔ dia nkalola kaamɛ la mi kele kankusame Jehowa.”+ 26 Koko Samuɛlɛ akatɛ Saolo ate: “Dimi hantokalola kaamɛ la yɛ, nɛ dia wɛ akatone ɔtɛkɛta wa Jehowa ndo Jehowa ambotona dia wɛ ntetemala monga nkumekanga lo Isariyɛlɛ.”+ 27 Lam’akakadimɔ Samuɛlɛ dia nde ntshɔ, Saolo akakimɛ ohembo w’okutu ande wele bu l’anya, ko wakaatɛ. 28 Ko Samuɛlɛ akawotɛ ate: “Jehowa ambokɔhɔtɔla* diolelo dia Isariyɛlɛ ɛlɔ ndo nde ayodisha osekayɛ pami lokoleki.+ 29 Ndo nto, Nzambi ka diambo k’Isariyɛlɛ+ hatota kashi+ ndo hatotshikitanya kanyi* yande, nɛ dia Nde bu onto k’onto dia nde ntshikitanya kanyi*+ yande.”

30 Ko nde akate ate: “Dimi lakasale pɛkato. Koko lam’alangayɛ, ombisha kɛnɛmɔ la ntondo ka dikumanyi ndo la ntondo k’ase Isariyɛlɛ. Kalola kaamɛ la mi kele kankusame Jehowa Nzambi+ kayɛ.” 31 Ko Samuɛlɛ akakalola kaamɛ la Saolo ndo Saolo akakusamɛ Jehowa. 32 Samuɛlɛ akate ate: “Nyombela Anganga nkumekanga k’Amalɛka lanɛ.” Ko Anganga akatshu otsha le nde ele la wengengo,* nɛ dia Anganga akataka l’otema ande ate: ‘Ndooko onyake waale* wa nyɔi wambeta.’ 33 Koko Samuɛlɛ akate ate: “Oko wakashisha wamato ana l’ɔtɛ wa lokuwa layɛ la ta, ngasɔ mbele nyɔ ayoleka nshisha l’atei wa wamato tshɛ.” Ko Samuɛlɛ akaatshatsha Anganga bɛtshi bɛtshi la ntondo ka Jehowa la Ngilingalɛ.+

34 Oma laasɔ, Samuɛlɛ akatshu otsha la Rama, ko Saolo akadɛ otsha lakande la Ngibɛa ka Saolo. 35 Samuɛlɛ kɔmɛna Saolo nto polo lushi lakandavu, nɛ dia Samuɛlɛ akalele Saolo. Jehowa akanyange l’ɔtɛ wakandetɛ Saolo+ nkumekanga k’Isariyɛlɛ.+