Etsha
9 Koko Saolo akatetemalaka mboka ambeki wa Nkumadiɔndjɔ+ nkɛlɛ ndo akawawanɛ dia mbashila oshiki. Ɔnkɔnɛ, nde akatshu le ɔlɔmbɛdi a laadiko 2 ndo akatɔɔlɔmba mikanda dia nde ntshɔ lo toshinangɔnga ta la Damasɛkɛ dia nde tokeleka anto tshɛ waki lo Mboka+ wakandahombe totana lɛkɔ, apami ndo wamato ko ndja la wɔ la Jɛrusalɛma.
3 Lam’akandatatshɔka ndo lam’akinde suke la nkoma la Damasɛkɛ, mbala kakɔ ɔtɔi, osase wakaye oma l’olongo ndo wakahɛtɛ lo dihole diakinde.+ 4 Ko nde akakɔ la nkɛtɛ ndo akoke dui diawotɛ ɔnɛ: “Saolo, Saolo, lande na kampɛnyahɛnyayɛ?” 5 Saolo akambola ate: “Nkumadiɔndjɔ, wɛ na?” Nde akate ate: “Dimi Yeso+ kahɛnyahɛnyayɛ.+ 6 Emala, ɔtɔ l’osomba ko wayokotɛ kɛnɛ kahombayɛ nsala.” 7 Apami wakatatshɔka la nde wakemala laawɔ aha la ntɛkɛta ndooko dui. Kaanga mbakawoke wondjo wa dui, vɔ kɔmɛna ndooko onto.+ 8 Ko Saolo aketɔ oma la nkɛtɛ ndo kaanga mbakandasɛnaka, nde kɔmɛnaka ndooko ɛngɔ. Ɔnkɔnɛ, vɔ wakookimɛ lo lonya ndo wakɔɔtɔlɛ otsha la Damasɛkɛ. 9 Ndo l’edja ka nshi 3, nde kɔmɛna ndooko ɛngɔ,+ kɔɔndɛ ndo kɔɔnɔ ndooko ɛngɔ.
10 Ombeki ɔmɔtshi wakawelɛka Ananiya+ aki la Damasɛkɛ ndo Nkumadiɔndjɔ akawete lo ɛnɛlɔ ate: “Ananiya!” Ko nde akate ate: “Dimi ɔnɛ, Nkumadiɔndjɔ.” 11 Nkumadiɔndjɔ akawotɛ ate: “Emala, tshɔka lo shinga yelɛwɔ ɔnɛ Nsembɔ, lo luudu laki Judasɛ, toyange pami kelɛwɔ Saolo k’ose Taraso.+ Nɛ dia nde ekɔ lo nɔmba, 12 ndo nde akɛnyi lo ɛnɛlɔ dia pami kɛmɔtshi lokombo lande Ananiya ayaye ndo akayowahɛ anya dia nde mɛna.”+ 13 Koko Ananiya akakadimola ate: “Nkumadiɔndjɔ, dimi lamboka anto efula watɛkɛta dikambo dia pami kɛsɔ ndo di’akambo wa kɔlɔ tshɛ wakandasalɛ ekilami ayɛ la Jɛrusalɛma. 14 Nde ekɔ la lotshungɔ l’oma le ewandji w’ɛlɔmbɛdi dia minda* wanɛ tshɛ watɛndɛ lokombo layɛ.”+ 15 Koko Nkumadiɔndjɔ akawotɛ ate: “Tshɔka, nɛ dia pami kɛsɔ ekɔ ehomɔ kamomɔsɔna+ dia mɛmbɛ ase wedja,+ nkumi ya dikanga+ ndo ana w’ase Isariyɛlɛ lokombo lami. 16 Nɛ dia dimi layowɛnya hwe woho wahombande nsowa efula l’ɔtɛ wa lokombo lami.”+
17 Ko Ananiya akatshu ndo akɔtɔ lo luudu lakɔ ko akawahɛ anya ndo akate ate: “Saolo, ɔnalengo, Nkumadiɔndjɔ Yeso lakɛnama le yɛ lo mboka lam’akayayayaka kontomi dia wɛ mɛna ndo ndodiama la nyuma k’ekila.”+ 18 Ko mbala kakɔ ɔtɔi, diangɔ diele oko mposo ya nse diakakɔ oma lo washo ande, ko nde akɛnyi. Oma laasɔ nde akemala ndo akabatizama, 19 ko nde akale yangɔ ndo akakondja wolo.
Nde akatshikala nshi mɔtshi kaamɛ la ambeki waki la Damasɛkɛ,+ 20 ko aha la ntshimbatshimba, nde akatatɛ nsambisha akambo wendana la Yeso lo toshinangɔnga, ata ate: Nde ekɔ Ɔna Nzambi. 21 Koko anto tshɛ wakawoke asambisha wakaambe ndo wakate vate: “Shi pami kɛnɛ mbakahɛnyahɛnyaka wanɛ wakatɛndɛka lokombo lɔnɛ la Jɛrusalɛma?+ Shi nde mbakaye lanɛ dia ndjowanda ndo ndjaatɔla* le ewandji w’ɛlɔmbɛdi?”+ 22 Koko Saolo akatalekaka nkondja wolo ndo akambiya ase Juda waki la Damasɛkɛ etena kakandɛnyaka lo yoho yokɛma hwe dia Yeso kele Kristo.+
23 Lam’akete nshi efula, ase Juda wakɔtɔ sheke kaamɛ dia mbodiaka.+ 24 Koko Saolo akeye dia wambowɔtwɛ sheke. Vɔ wakalamaka asoko w’osomba dimɛna la yanyi ndo l’otsho dia mbodiaka. 25 Ɔnkɔnɛ, ambeki ande wakawɔshi ndo wakooholoya lo kisaka+ l’otsho lo wosho waki l’ehele k’osomba.
26 Lam’akandakome la Jɛrusalɛma,+ nde akasale tshɛ dia nsangana l’ambeki, koko vɔ tshɛ wakawokaka wɔma, nɛ dia vɔ kombetawɔ dia nde aya ombeki. 27 Ko Barnabasɛ+ akookimanyiya ndo akɔɔtɔlɛ le apɔstɔlɔ ko nde akawatɛ kiambokambo tshɛ yendana la woho wakandɛnyi Nkumadiɔndjɔ+ lo mboka ndo woho wakandatɛkɛta la nde ndo woho wakandatɛkɛta lo lokombo la Yeso+ la dihonga tshɛ la Damasɛkɛ. 28 Ɔnkɔnɛ, nde akatshikala kaamɛ la wɔ, aketetaka la Jɛrusalɛma aha la mboka wɔma* ndo akatɛkɛtaka lo lokombo la Nkumadiɔndjɔ la dihonga tshɛ. 29 Nde akasawolaka ndo akakɛtshanyaka l’ase Juda wakatɛkɛtaka Grɛkɛ. Koko ase Juda asɔ wakayangaka dia mbodiaka.+ 30 Lam’akeye anangɛso dikambo sɔ, vɔ wakatshu la nde la Kayisariya ndo wakootome otsha la Taraso.+
31 Oma laasɔ, etshumanelo k’otondo ka la Judeya, la Ngalileya ndo la Samariya+ kakonge l’etena ka wɔladi, tɔ kakakeketshama; ndo lam’ele tɔ kakakɛndakɛndaka lo wɔma wa Jehowa* ndo lo esambelo k’oma le nyuma k’ekila,+ tɔ kakatetemala mpama.
32 Lam’akatetetaka Petero lo bɛtshi dia nkɛtɛ sɔ tshɛ, nde akakome ndo le ekilami waki la Luda.+ 33 Lɛkɔ, nde akatane pami kɛmɔtshi lokombo lande Ayineya. Nde aki paka lo mbeto l’edja k’ɛnɔnyi 8, nɛ dia nde aki la hemɔ kakawɔdia demba yɔɔ. 34 Petero akawotɛ ate: “Ayineya, Yeso Kristo ambokɔkɔnɔla.+ Etɔ, alola mbeto kayɛ.”+ Ko mbala kakɔ ɔtɔi nde aketɔ. 35 Ko ase Luda tshɛ ndo ase Okidi wa Sharɔna wakawɛnyi, ko vɔ wakakadimɔ le Nkumadiɔndjɔ.
36 Koko la Jɔpa kaki ombeki ɔmɔtshi wa womoto lokombo lande Tabita, kitshimudi ate “Dɔrkasɛ.”* Nde akasalaka akambo w’ɛlɔlɔ efula ndo akashaka anto weshasha efula wa kɛtshi. 37 Koko lo nshi shɔ, nde akandama la hemɔ ko akavu. Ko vɔ wakawɔtsha ndo wakookitsha lo luudu la la diko. 38 Lam’ele osomba wa Luda waki suke la wa Jɔpa, lam’akoke ambeki dia Petero aki l’osomba ɔsɔ, vɔ wakatome apami 2 le nde dia tɔɔsɛngasɛnga ɔnɛ: “Lam’alangayɛ, yaka lendo le so aha la ntshimbatshimba.” 39 Ko Petero akonɛɛ ndo akatshu kaamɛ la wɔ. Lam’akandakome, vɔ wakatshu la nde otsha lo luudu la la diko ndo wadi waki edo tshɛ wakaye le nde walela ndo wɛnya lokema l’ekutu* lakaatɛlɛka Dɔrkasɛ lam’akinde kaamɛ la wɔ. 40 Ko Petero akatondja anto tshɛ l’andja,+ akake adwe ndo akasale dɔmbɛlɔ. Oma laasɔ, nde akakadimɔ otsha le odo ko akate ate: “Tabita, etɔ!” Tabita akadihola washo, ndo lam’akandɛnyi Petero, nde akasungukala.+ 41 Petero akookimɛ lo lonya ko akawemadia ndo nde akelɛ ekilami la wadi waki edo, ko akawaɛnyande ele la lɔsɛnɔ.+ 42 Dui sɔ diakeyama la Jɔpa y’otondo ndo anto efula wakakome ambetawudi wa Nkumadiɔndjɔ.+ 43 Petero akatshikala la Jɔpa nshi ngana laka onto ɔmɔtshi, lokombo lande Simɔna,+ ɔnɔngɔsɔdi wa dikoho.