Ɛzɛkiyɛlɛ

21 Ɔtɛkɛta wa Jehowa wakaye le mi nto ɔnɛ: 2 “Ɔna onto, kadimola elungi kayɛ otsha la Jɛrusalɛma kele ewoya dui dimɔtshi lo kɛnɛ kendana la ahole w’ekila ndo ta prɔfɛsiya lo dikambo dia wodja wa Isariyɛlɛ. 3 Tɛ wodja wa Isariyɛlɛ wate: ‘Jehowa kata ate: “Dimi layanga nyɔlɔsha ndo dimi layotondja lokuwa lami la ta oma lo dihoso+ dialɔ ndo layodiaka oyadi onto ɔlɔlɔ kana onto a kɔlɔ l’atei anyu. 4 Lam’ele layanga ndjaka oma l’atei anyu oyadi onto ɔlɔlɔ kana onto a kɔlɔ, lokuwa lami la ta layotomba oma lo dihoso dialɔ dia ndɔsha anto* tshɛ oma lo sidɛ polo lo nɔrdɛ. 5 Anto tshɛ wayohomba mbeya dia dimi Jehowa dimɛ mbakasɔmɔla lokuwa lami la ta oma lo dihoso dialɔ. Lɔ halotokalola nto.”’+

6 “Koko wɛ ɔna onto, kuma akumu etena kasakayɛ* lokomba, ɛɛ, kuma akumu la wolo la ntondo kawɔ.+ 7 Ndo naka vɔ wambokotɛ vate: ‘Bonde kakumayɛ akumu?’ Kote wate: ‘L’ɔtɛ wa losango lɔmɔtshi.’ Nɛ dia lɔ layoya, ko etema tshɛ wayɔlɛlɔ la wɔma ndo anya tshɛ wayɔtɛwɔ ndo yimba tshɛ yayɔkɔmɔ ndo adwe tshɛ wayɔlɔwa la ashi.*+ ‘Nyende! Ndooko onyake lɔ layoya, dui diakɔ diayosalema,’ mbata Nkum’Olongo Nkumadiɔndjɔ Jehowa.”

8 Ɔtɛkɛta wa Jehowa wakaye le mi nto ɔnɛ: 9 “Ɔna onto, ta prɔfɛsiya ndo tɛkɛta wate: ‘Jehowa kata ate: “Ta wate: ‘Lokuwa la ta! Lokuwa la ta+ lambodjama diɛsa ndo laya ngaingai. 10 Lɔ lambodjama diɛsa dia ndjaka lo yɛdikɔ y’efula; lɔ laya ngaingai dia ntondja osase oko dingadimu.’”’”

“Onde hatohombe ngɛnangɛna?”

“‘Onde lɔ* layokasha danga dia ɔnami+ hita, oko wakashalɔ osongo tshɛ?

11 “‘Lɔ lambokimɔma dia monga ngaingai ndo dia onto nkamba la lɔ la lonya. Lokuwa la ta lɔnɛ lambodjama diɛsa ndo lambetɛma ngaingai dia lisha ondjakanyi.+

12 “‘Ɔna onto le, da ekoko ndo lela,+ nɛ dia lɔ lamboya dia ndɔsha anto ami; dia ndɔsha ewandji tshɛ wa lo Isariyɛlɛ.+ Vɔ wayodiakema la lokuwa la ta kaamɛ la anto ami. Ɔnkɔnɛ, kɔmɔla ɛhɛlɔhɛlɔ kayɛ la ɔkɛyi. 13 Nɛ dia ɔsɛdingwelo wambosalema+ ndo kakɔna kayotomba naka lokuwa la ta lambokasha danga? Diɔ* hadiotonga nto,’+ mbata Nkum’Olongo Nkumadiɔndjɔ Jehowa.

14 “Koko wɛ ɔna onto, ta prɔfɛsiya ndo da lokambo kele ta mbala 3 wate: ‘Lokuwa la ta!’ Lɔ lekɔ lokuwa la ta la ndjaka, lokuwa la ta la odiakelo w’efula kambaadinga.+ 15 Etema awɔ wayɔlɛlɔ la wɔma+ ndo efula wayodiakema lo asoko w’osomba awɔ; dimi layowadiaka la lokuwa la ta. Eelo, lɔ tondjaka esase oko dingadimu ndo lambodjama diɛsa dia ndjaka! 16 Tshɔka esadi esadi otsha lo lonya l’omi! Sekesɔ otsha lo lonya la lɔmɔsɔ! Tshɔka dihole tshɛ diɛlɛ mpɛmɔ kayɛ! 17 Ndo nto, dimi layoda losaka ndo layɔngɛnyangɛnya nkɛlɛ+ kami. Dimi Jehowa dimɛ kambɔtɛkɛta.”

18 Ko ɔtɛkɛta wa Jehowa wakaye nto le mi ɔnɛ: 19 Wɛ ɔna onto, ata mboka 2 dia lokuwa la ta la nkumekanga ka Babilɔna ndja. Yɔ yakɔ 2 yayotomba oma lo wodja 1 ndo ekundji ka djembetelo* pombaka mbikama lo asanga w’otsha lo esomba 2. 20 Wɛ pombaka mbata mboka kɛmɔtshi dia lokuwa la ta ndja dia ndjɔlɔsha Raba+ w’ase Amɔna ndo mboka kekina dia ndjɔlɔsha Jɛrusalɛma+ yodingami la mpele lo Juda. 21 Nɛ dia nkumekanga ka Babilɔna memala dia nkamba la diendja lo asanga wa mboka lɛnɛ akakitɔna mboka 2. Nde ambosakanya mpito. Ambombola dikishi* diande kanyi; ambɔsɛdingola ovɔ. 22 Diendja diele lo lonya lande l’omi mbɛlɛ otsha la Jɛrusalɛma dia memadia dihomɔ dia ta dianyukola mpele, dia ntoma dui dia ndjaka, dia mbida kioko ya ta, dia memɛ dihomɔ dia ta dianyukola mpele otsha lo asoko, dia mbidiya longele l’odingelo, dia mbika ehele k’odingelo.+ 23 Koko dui sɔ diayɛnama oko diendja dia kashi lo washo wa wanɛ* wakawatshibɛ.+ Koko, nde mbohɔka onongo awɔ ndo ayowanda.+

24 “Ɔnkɔnɛ, Nkum’Olongo Nkumadiɔndjɔ Jehowa kata ate: ‘Nyu nyambosala dia onongo anyu mbohɔma lo mɛnya kɔlɔ yanyu lo sɛkɛ ndo lo nsala dia pɛkato yanyu mɛnama oma lo etsha anyu tshɛ. Kakianɛ lam’ele nyambohɔma, nyu nyayondama la wolo.’*

25 “Koko lushi layɛ lambokoka, wɛ owandji wa kɔlɔ wa Isariyɛlɛ+ wakahomɔ wolo, etena ka dilanya diayɛ di’ekomelo. 26 Nkum’Olongo Nkumadiɔndjɔ Jehowa kata ate: ‘Nya dihɔndɔ diadingawɔ l’ɔtɛ ndo nya dɛmbɔ dia nkoso.+ Diɔ hadiototshikala woho akɔ ɔtɔi.+ Diya kɛnɛ kele l’ɛse+ ndo holoya kɛnɛ kele la diko.+ 27 Elanyelo, elanyelo, elanyelo kayomodietɛ. Ndo diɔ hadiotonga diaki onto okina tshɛ polo lam’ayoya ɔnɛ lele la lotshungɔ lo ndjela ɛlɛmbɛ,+ ko dimi layowoshadiɔ.’+

28 “Wɛ ɔna onto, ta prɔfɛsiya ndo tɛkɛta wate: ‘Ɔnkɔnɛ mbata Nkum’Olongo Nkumadiɔndjɔ Jehowa lo dikambo dia ase Amɔna ndo lo dikambo dia ntɛngɔ yawɔ.’ Ta wate: ‘Lokuwa la ta! Lokuwa la ta lambɔsɔmɔma dikambo dia odiakelo; lɔ lambɛdiama dia ndɛ ndo dia ntondja esase oko dingadimu. 29 Kaanga mbɛnawɔ waɛnɛlɔ wa kashi ndo mbasalawɔ diendja dia kashi lo dikambo diayɛ, wayokahatanya laadiko dia edo,* akanga wa kɔlɔ wanɛ wele lushi lawɔ lambokoka, etena ka dilanya diawɔ di’ekomelo. 30 Kaloyalɔ lo dihoso dialɔ. Dimi layokolombosha lo dihole diakayatongama lo wodja wakayotɔ. 31 Dimi layokotshulwɛ nkɛlɛ kami. Dimi layokofufa dja ya odudu ami ndo dimi layokokimɔ le apami wa ngala wanɛ wele tomanyi lo olanyelo.+ 32 Wɛ ayoyala nkunyi dikambo dia dja;+ dikila diayɛ diayotshulɔ la nkɛtɛ, ko wɛ hatohɔma nto, nɛ dia dimi Jehowa dimɛ kambɔtɛkɛta.’”