Jɛrɛmiya
25 Ɔtɛkɛta wakaye le Jɛrɛmiya wendana l’ase Juda tshɛ l’ɔnɔnyi wa 4 w’ɛlɔmbwɛlɔ ka Jɛhɔyakima+ ɔna Jɔsiya nkumekanga ka Juda, vɔ mbaki ɔnɔnyi wa ntondo w’ɛlɔmbwɛlɔ ka Nɛbukadinɛza* nkumekanga ka Babilɔna. 2 Omvutshi Jɛrɛmiya akate lo dikambo* di’ase Juda tshɛ ndo anto tshɛ wadjasɛ la Jɛrusalɛma ate:
3 “Oma lo ɔnɔnyi wa 13 w’ɛlɔmbwɛlɔ ka Jɔsiya+ ɔna Amɔna, nkumekanga ka Juda polo ndo ɛlɔ, ɛnɔnyi 23 ɛnɛ, ɔtɛkɛta wa Jehowa wakaye le mi ndo dimi lakatetemalaka nyotɛ mbala la mbala,* koko nyu kompokamɛ.+ 4 Ndo Jehowa akanyotomɛ ekambi ande amvutshi tshɛ, akawatomaka mbala la mbala,* koko nyu kompokamɛ kana mpokɛ atoyi anyu dia mboka.+ 5 Vɔ wakataka ɔnɛ: ‘Lam’alanganyu, nyokadimɔ nyu tshɛ oma lo mboka yanyu ya kɔlɔ ndo oma lo etsha anyu wa kɔlɔ;+ ko nyu nyayotetemala mbidjasɛ lo etena k’otale kayaye lo wodja wakanyosha Jehowa deko aha nɛ nyu la watshɛnyu. 6 Tanyoyelake tozambizambi tokina kana tikambɛ ndo tikusamɛ dia mbotshami nkɛlɛ la olimu w’anya anyu; naka nyu nsala ngasɔ, dimi layonyela mpokoso.’
7 “‘Koko nyu kompokamɛmi,’ mbata Jehowa. ‘Nyu nyakambotsha nkɛlɛ la olimu w’anya anyu, dia mpokoso kanyu hita.’+
8 “Ɔnkɔnɛ, Jehowa kanga lolembelembe kata ate: ‘“Lam’ele nyu kokitanyiya ɛtɛkɛta ami, 9 dimi layanga ntoma nkumbo tshɛ ya lo nɔrdɛ,”+ mbata Jehowa, “layanga ntoma Nɛbukadinɛza* nkumekanga ka Babilɔna, okambi ami,+ ndo dimi layowaela dia ndjɔlɔsha wodja ɔnɛ,+ anto wadjasɛ lɔkɔ ndo dia ndjɔlɔsha wedja ɛnɛ tshɛ woodingi.+ Dimi layowakimɔ lo elanyelo, layowaetɛ ɛngɔ ka wɔnɔnyi, ɛngɔ ka mbidɛ ekoko ndo elanyelo ka pondjo. 10 Dimi layokomiya londjo l’ɔngɛnɔngɛnɔ ndo londjo l’ɔlɔ le wɔ,+ dui dia otshuki ndo dui dia otshukami,+ londjo la dive di’ɔhɛlɔ dia l’anya ndo osase wa tala. 11 Ko wodja ɔnɛ w’otondo wayolanyema ndo wayonga ɛngɔ ka wɔnɔnyi ndo wedja ɛsɔ tshɛ wayohomba kambɛ nkumekanga ka Babilɔna l’edja k’ɛnɔnyi 70.”’+
12 “‘Koko lam’ayoshila ɛnɔnyi 70,+ dimi layokoya* la nkumekanga ka Babilɔna ndo la wodja ɔsɔ l’ɔtɛ wa munga kawɔ,’+ mbata Jehowa, ‘ndo dimi layetɛ wodja w’ase Kaladiya nkɛtɛ ya womu ndo yele tɔngɔ to pondjo pondjo.+ 13 Dimi layokotsha ɛtɛkɛta ami tshɛ wakamate lo dikambo dia wodja ɔsɔ, kɛnɛ tshɛ kofundami lo dibuku nɛ kakate Jɛrɛmiya prɔfɛsiya yendana la wedja tshɛ. 14 Nɛ dia wedja efula ndo nkumi ya dikanga ya weke+ wayowaetɛ mfumbe+ ndo dimi layowafuta lo ndjela etsha awɔ ndo olimu w’anya awɔ.’”+
15 Nɛ dia Jehowa Nzambi k’Isariyɛlɛ akambutɛ ate: “Ɔsa dikɔhɔ nɛ dia wanu wa nkɛlɛ oma lo lonya lami ndo todinɔsha wedja tshɛ wayomokotoma le wɔ. 16 Ko vɔ wayɔnɔ, wayotshingatshinga ndo wayosala akambo oko akanga w’aladi l’ɔtɛ wa lokuwa la ta layangami ntoma l’atei awɔ.”+
17 Ɔnkɔnɛ, dimi lakɔshi dikɔhɔ oma lo lonya la Jehowa ko lakanɔsha wedja tshɛ wakantome Jehowa:+ 18 Ntatɛ la Jɛrusalɛma ndo esomba wa Juda,+ nkumi ya dikanga yayɔ ndo ewandji ayɔ, dia mbalanya, mbaetɛ ɛngɔ ka wɔnɔnyi, ɛngɔ ka mbidɛ ekoko ndo ka mananu,+ oko wediɔ ɛlɔ; 19 ko Farawɔ nkumekanga k’Edjibito, ekambi ande, ewandji ande la anto ande tshɛ,+ 20 ndo anto awɔ tshɛ wakasɔhana; nkumi ya dikanga tshɛ ya lo wodja wa Uzɛ; nkumi ya dikanga tshɛ ya lo wodja w’ase Filistiya,+ Ashikɛlɔna,+ Ngaza, Ɛkɛrɔna ndo wanɛ wakatshikala la Ashidɔdɛ; 21 Ɛdɔmɛ,+ Mɔaba,+ ndo ase Amɔna;+ 22 nkumi ya dikanga tshɛ ya Tura, nkumi ya dikanga tshɛ ya Sidɔna,+ ndo nkumi ya dikanga tshɛ ya disɛnga dia lo ndjale; 23 Dedana,+ Tema, Buza, ndo wanɛ tshɛ wakanya avo awɔ lo mpakatoyi;+ 24 nkumi ya dikanga tshɛ y’ase Arabiya+ ndo nkumi ya dikanga tshɛ y’anto wɔsɔhanyi wadjasɛ lo oswe; 25 nkumi ya dikanga tshɛ ya Zimiri, nkumi ya dikanga tshɛ ya Elama,+ ndo nkumi ya dikanga tshɛ y’ase Mediya;+ 26 ndo nkumi ya dikanga tshɛ ya lo nɔrdɛ yele suke ndo yele etale, ɔtɔi ɔtɔi, ndo waolelo akina tshɛ wa la nkɛtɛ wele laadiko dia nkɛtɛ; ndo nkumekanga ka Sheshakɛ*+ ayɔnɔ l’ɔkɔngɔ awɔ.
27 “Ndo wɛ pombaka mbatɛ wate: ‘Jehowa kanga lolembelembe, Nzambi k’Isariyɛlɛ kata ate: “Nyɔnɔ, nyodjɔ, nyotowɔ ndo nyɔkɔ woho wahanyakoke monɛɛ+ l’ɔtɛ wa lokuwa la ta layangami ntoma l’atei anyu.”’ 28 Ndo naka vɔ wambotona mbɔsa dikɔhɔ oma lo lonya layɛ dia nnɔ, ko wɛ mbatɛ wate: ‘Jehowa kanga lolembelembe kata ate: “Nyu pombaka dinɔ! 29 Nɛ dia nyende, naka dimi layanga mbela mpokoso ntondo le wodja wele la lokombo lami,+ onde nyu mbahahombe nongola dilanya?”’+
“‘Nyu nyayolongola dilanya, nɛ dia dimi layanga mbela lokuwa la ta le anto tshɛ wadjasɛ la nkɛtɛ,’ mbata Jehowa kanga lolembelembe.
30 “Ndo wɛ pombaka mbatɛ ɛtɛkɛta wa prɔfɛsiya ɛnɛ tshɛ ndo mbatɛ ɔnɛ:
‘Jehowa ayodikita oma la diko,
Ndo oma lo edjaselo kande k’ekila, nde ayokiya dui diande.
Nde ayodikitɛ dihole diande dia pondjo la wolo tshɛ.
Ayohangɔ oko wanɛ waamula lo diamula dia wanu,
Nde ayemba lembo l’edjelo k’otshumba dikambo dia wanɛ tshɛ wadjasɛ la nkɛtɛ.’
31 ‘Londjo layokɛma nto lo tokoma ta nkɛtɛ,
Nɛ dia Jehowa ekɔ la owanu la wedja.
Nde ndamɛ ayela kilombo le anto tshɛ.*+
Ndo nde ayodja akanga wa kɔlɔ lo lokuwa la ta,’ mbata Jehowa.
32 Jehowa kanga lolembelembe kata ate:
‘Eenda, mpokoso kekɔ lo tadiangana lo wodja la wodja.+
Ndo lɔpɛpɛ la wolo layoya oma lo bɛtshi dia nkɛtɛ dioleki etale.+
33 “‘Ndo wanɛ wayodiakema oma le Jehowa lo lushi lɔsɔ wayoyala oma lo koma mɔtshi ya nkɛtɛ polo lo koma kina ya nkɛtɛ. Vɔ hawotolelama kana tshumanyema kana kundɛma. Vɔ wayoyala oko tumi laadiko dia nkɛtɛ.’
34 Nyolele, nyu alami w’ɛkɔkɔ ndo nyode ekoko!
Nyongitɔ lo nkɛtɛ, nyu ɛnɛnɛ wa l’olui w’ɛkɔkɔ,
Nɛ dia etena ka nyu ndjakema ndo ka nyu dianganyema kambokoka,
Ko nyu nyayɔkɔ oko ɛngɔ ka nɛmɔ!
35 Alami w’ɛkɔkɔ bu la dihole dia ndawɔ,
Ndo ɛnɛnɛ wa l’olui w’ɛkɔkɔ bu la dihole dia ndjatsha.
36 Nyohokame! Tokoko t’alami w’ɛkɔkɔ
Ndo alelo w’ɛnɛnɛ wa l’olui w’ɛkɔkɔ,
Nɛ dia Jehowa ekɔ lo nanya dihole diawɔ dia ndesha dongalonga.
37 Ndo ahole wa mbidjasɛ wa wɔladi waya ahole waha la lɔsɛnɔ
L’ɔtɛ wa nkɛlɛ kalombalomba ka Jehowa.