Jɛrɛmiya
11 Ɛtɛkɛta w’oma le Jehowa le Jɛrɛmiya vɔ ɛnɛ: 2 “Nyu anto, nyohokame ɛtɛkɛta wa sheke nyɛ!
“Tɛ* ase Juda ɛtɛkɛta akɔ ndo anto wadjasɛ la Jɛrusalɛma 3 ndo tɛwɔ ɔnɛ: ‘Jehowa Nzambi k’Isariyɛlɛ kata ate: “Mananu le onto lahakitanyiya ɛtɛkɛta wa sheke nyɛ,+ 4 wakamadjangɛ watshɛnyu lushi lakamaatondja oma lo wodja w’Edjibito,+ oma lo nkuka kalɛlɔla mbolo,+ lata nte: ‘Nyokitanyiya dui diami ndo nyosale kɛnɛ tshɛ kanyodjangɛmi; ko nyu nyayoyala wodja ami ndo dimi layoyala Nzambi kanyu,+ 5 dia dimi nkotsha etshibelo kakamatshibɛ watshɛnyu, dia mbasha wodja wakɛlanɛ abɛlɛ la osanga+ oko wediɔ ɛlɔ.’”’”
Ko dimi lakakadimola nte: “Jehowa le, aamɛɛ.”*
6 Oma laasɔ, Jehowa akambutɛ ate: “Ewoya ɛtɛkɛta ɛsɔ tshɛ lo esomba wa la Juda ndo lo toshinga ta la Jɛrusalɛma ɔnɛ: ‘Nyohokame ɛtɛkɛta wa sheke nyɛ ndo nyaakitanyiya. 7 Nɛ dia dimi lakahɛmɔla watshɛnyu lushi lakamaatondja oma lo wodja w’Edjibito polo ndo ɛlɔ, lekɔ lo mbahɛmɔla mbala la mbala* nte: “Nyokitanyiya dui diami.”+ 8 Koko vɔ kompokamɛ ndo kompokɛ atoyi awɔ; la ɔtɛ wolo tshɛ, onto l’onto akatetemala ndjela otema ande wa kɔlɔ.+ Ɔnkɔnɛ, dimi lakakotsha le wɔ ɛtɛkɛta tshɛ wa lo sheke nyɛ wakamawadjangɛ dia nsala ko vɔ wakatone mbakitanyiya.’”
9 Ko Jehowa akambutɛ ate: “Ase Juda ndo anto wadjasɛ la Jɛrusalɛma wambɔtɔ sheke. 10 Vɔ wambokalola lo munga ya watshɛwɔ wa lo nshi y’edjedja, wanɛ wakatone nkitanyiya ɛtɛkɛta ami.+ Vɔ la wɔ wamboyela tozambizambi tokina ndo wambotikambɛ.+ Luudu l’Isariyɛlɛ ndo luudu la Juda wambolanya sheke yami yakamadje la watshɛwɔ.+ 11 Ɔnkɔnɛ, Jehowa kata ate: ‘Dimi layanga mbaela mpokoso+ kahawatokoka mbewɔ. Etena kayowombelɛ dia nyanga ekimanyielo, dimi halowahokamɛ.+ 12 Ko esomba wa la Juda ndo anto wadjasɛ la Jɛrusalɛma wayotshɔ le tozambizambi tɔnɛ talambolawɔ elambo* dia toyanga ekimanyielo,+ koko tɔ hatotowashimbɛ kaanga yema lo etena ka mpokoso kawɔ. 13 Juda le, nɛ dia tozambizambi tayɛ taya efula oko wele efula k’esomba ayɛ, ndo wɛ ambosalɛ ɛngɔ ka nsɔnyi* dilambwelo efula oko wele efula ka toshinga ta la Jɛrusalɛma, dilambwelo dia nambola Baala elambo.’+
14 “Koko wɛ,* tɔlɔmbake lo wahɔ w’anto anɛ. Tolelake lo wahɔ awɔ kana nsala dɔmbɛlɔ lo dikambo diawɔ,+ nɛ dia dimi haloohokamɛ etena kayowombelɛ l’ɔtɛ wa mpokoso kawɔ.
15 Lotshungɔ lakɔna lele la olangemi ami la monga lo luudu lami
Etena kele anto efula kongɛka kɛnɛ kele kɔlɔ?
Onde la emunyi w’ekila* mbayowoshimba mpokoso etena kayotoya le yɛ?
Onde wɛ ayɔngɛnangɛna lo etena kɛsɔ?
16 Mbala kɛmɔtshi, Jehowa akakelɛ osongo w’ɔlivɛ wambofukanɛ,
W’olangala wele la elowa w’amɛna.
La londjo la dikita dia wolo, nde akawodje lo dja,
Ndo vɔ wakahembola ntahe yawɔ.
17 “Jehowa kanga lolembelembe, Ɔnɛ lakakoonɛ,+ akate dia mpokoso kɛmɔtshi kayoya le yɛ l’ɔtɛ wa kɔlɔ kakasale luudu l’Isariyɛlɛ ndo luudu la Juda, wanɛ wakanyangiya lo nambola Baala elambo.”+
18 Jehowa akambewoya dia dimi mbeya;
L’etena kɛsɔ, wɛ akasale dia dimi mɛna kɛnɛ kakawasalaka.
19 Dimi laki oko ɔna ɔkɔkɔ wa wɔlamu watawatɔlɛ otsha lo ediakelo.
Dimi kombeyaka dia vɔ wekɔ lo nkongɛ lo dikambo diami ɔnɛ:+
“Nyɛsɔ tolanya osongo la elowa awɔ,
Ndo nyɛsɔ toohembole oma lo wodja wa wasɛna,
Diaha lokombo lande mbohɔma nto.”
20 Koko Jehowa kanga lolembelembe nomboshaka la losembwe;
Ontshike mɛnyi woho waasɔmbɔyayɛ,
Nɛ dia le yɛ mbakamela dikambo diami dia kilombo.
21 Ɔnkɔnɛ, Jehowa kata lo dikambo di’ase Anatɔta+ wayanga dia mbɔsa lɔsɛnɔ layɛ* ndo wata ɔnɛ: “Wɛ hahombe mbuta prɔfɛsiya lo lokombo la Jehowa+ kana ɔnɛ wɛ ayovɔ lo anya aso”; 22 Jehowa kanga lolembelembe kata ate: “Dimi layanga mbikoya la wɔ. Ɛlɔngɔ w’apami wayovɔ la lokuwa la ta+ ndo anawɔ w’apami la anawɔ wa wamato wayovɔ la ndjala ka kasha.+ 23 Ndooko kaanga onto ɔtɔi l’atei awɔ layotshikala, nɛ dia dimi layela mpokoso le ase Anatɔta+ lo ɔnɔnyi wayomokoya la wɔ.”