Ɛzɛkiyɛlɛ

20 Lo ɔnɔnyi wa 7, lo ngɔndɔ ka 5 nshi 10, dikumanyi dimɔtshi dia lo Isariyɛlɛ wakaye ndo wakadjasɛ la ntondo kami dia ndjombola Jehowa kanyi. 2 Ko ɔtɛkɛta wa Jehowa wakaye le mi ɔnɛ: 3 “Ɔna onto, sawola la dikumanyi dia lo Isariyɛlɛ kele tɛwɔ wate: ‘Nkum’Olongo Nkumadiɔndjɔ Jehowa kata ate: “Onde nyu nyamboya dia ndjomimbola kanyi? ‘Lo mɛtɛ oko wemi la lɔsɛnɔ, dimi hatonyokadimola,’+ mbata Nkum’Olongo Nkumadiɔndjɔ Jehowa.”’

4 “Onde wɛ ekɔ suke dia mbalombosha?* Ɔna onto, onde wɛ ekɔ suke dia mbalombosha? Ewoyawɔ akambo wa wɔnɔnyi wakasale watshɛwɔ.+ 5 Tɛwɔ wate: ‘Nkum’Olongo Nkumadiɔndjɔ Jehowa kata ate: “Lushi lakamasɔnɛ Isariyɛlɛ,+ dimi lakatshibɛ* ana* wa lo luudu la Jakɔbɔ ndo dimi lakayaeyanya le wɔ lo wodja wa Edjibito.+ Eelo, dimi lakaatshibɛ nte: ‘Dimi kele Jehowa Nzambi kanyu.’ 6 Lushi lakɔ, dimi lakatshibe dia dimi layowatondja oma lo wodja wa Edjibito otsha lo wodja wakamayange* dikambo diawɔ, wodja wakɛlanɛ abɛlɛ la osanga.+ Ɔsɔ aki wodja woleki dimɛna* l’atei wa wedja tshɛ. 7 Ko dimi lakawatɛ nte: ‘Onto tshɛ l’atei anyu pombaka mbikasha diangɔ dia wɔnɔnyi diele la ntondo kanyu; tanyoyadjake mindo la dikishi dia nyɛtɛɛtɛ* dia lo Edjibito.+ Dimi kele Jehowa Nzambi kanyu.’+

8 “‘“Koko vɔ wakantɔmbɔkwɛ ndo vɔ konanga mpokamɛmi. Vɔ kombikasha diangɔ dia wɔnɔnyi diaki la ntondo kawɔ ndo vɔ kotshika dikishi dia nyɛtɛɛtɛ dia lo Edjibito.+ Ɔnkɔnɛ, dimi lakalake dia mbatsholɛ odudu ami ndo mbahongolɛ nkɛlɛ kami lo wodja wa Edjibito. 9 Koko dimi lakasale akambo dia wahɔ wa lokombo lami diaha lɔ mɔnyɔma la ntondo ka wedja wakawadjasɛka+ l’atei awɔ. Nɛ dia dimi lakayaeyanya le wɔ* la ntondo ka wedja ɛsɔ etena kakamaatondja* oma lo wodja wa Edjibito.+ 10 Ɔnkɔnɛ, dimi lakaatondja oma lo wodja wa Edjibito ndo lakaalɔmbɔla lo oswe wa shɛnga.+

11 “‘“Ko dimi lakawasha wadjango ami ndo lakawaewoya tɛdikɔ tami ta dombo+ dia onto latiyela nkondja lɔsɛnɔ oma lɔkɔ.+ 12 Dimi lakawasha nto sabato+ yami oko djembetelo lam’asami lawɔ,+ dia vɔ mbeya dia dimi Jehowa mbele ɔnɛ lawakidia.

13 “‘“Koko luudu la Isariyɛlɛ lakantɔmbɔkwɛ lo oswe wa shɛnga.+ Vɔ kɔkɛndakɛnda lo wadjango ami ndo wakatone tɛdikɔ tami ta dombo, tele naka onto tiyela nde ayonga la lɔsɛnɔ oma lɔkɔ. Vɔ wakɔnyɔla tshɛ lo tshɛ sabato yami. Ɔnkɔnɛ, dimi lakalake dia mbatshulolɛ nkɛlɛ kami lo oswe wa shɛnga dia mbashila oshiki.+ 14 Koko lakasale akambo dia wahɔ wa lokombo lami hita diaha lɔ mɔnyɔma la ntondo ka wedja wakɛnyi woho wakamaatondja.*+ 15 Dimi lakaatshibɛ nto lo oswe wa shɛnga dia dimi hatowatɔla lo wodja wakamawasha,+ wodja wakɛlanɛ abɛlɛ la osanga,+ wodja woleki dimɛna* l’atei wa wedja tshɛ, 16 nɛ dia vɔ wakatone tɛdikɔ tami ta dombo, vɔ kɔkɛndakɛnda lo wadjango ami ndo wakɔnyɔla sabato yami, nɛ dia etema awɔ wakayelaka dikishi diawɔ dia nyɛtɛɛtɛ.+

17 “‘“Koko dimi* lakawaoke kɛtshi ndo dimi kombalanya; dimi kombashila oshiki lo oswe wa shɛnga. 18 Dimi lakatɛ anawɔ lo oswe wa shɛnga+ nte: ‘Tanyɔkɛndakɛndake lo ɛlɛmbɛ wa washɛnyu,+ tanyolamake dombwelo diawɔ kana ndjadja mindo la dikishi diawɔ dia nyɛtɛɛtɛ. 19 Dimi kele Jehowa Nzambi kanyu. Nyɔkɛndɛkɛndɛ lo wadjango ami, nyokitanyiya tɛdikɔ tami ta dombo ndo nyokambe la tɔ.+ 20 Nyokidia sabato+ yami, ko yɔ yayonga oko djembetelo lam’asami la nyu dia nyu mbeya dia dimi kele Jehowa Nzambi kanyu.’+

21 “‘“Koko ana wakatatɛ tɔmbɔkwɛmi.+ Vɔ kɔkɛndakɛnda lo wadjango ami ndo vɔ kondjela ndo kokitanyiya tɛdikɔ tami ta dombo, tele naka onto tiyela nde ayonga la lɔsɛnɔ oma lɔkɔ. Vɔ wakɔnyɔla sabato yami. Diakɔ diakamaalake dia mbatsholɛ odudu ami ndo mbahongolɛ nkɛlɛ kami lo yɛdikɔ y’efula lo oswe wa shɛnga.+ 22 Koko dimi lakayakimɛ+ ndo lakasale akambo lo wahɔ wa lokombo+ lami, diaha lɔ mɔnyɔma la ntondo ka wedja wakɛnyi woho wakamaatondja.* 23 Dimi lakaatshibɛ nto lo oswe wa shɛnga dia layowadianganya l’atei wa wedja ndo mbahandjola l’atei wa wedja,+ 24 nɛ dia vɔ kokitanyiya tɛdikɔ tami ta dombo ndo wakatone wadjango+ ami, wakɔnyɔla sabato yami ndo vɔ wakayele* dikishi dia wɔnɔnyi dia watshɛwɔ.+ 25 Dimi lakaatshike nto dia vɔ ndjela wadjango waki komonga amɛna ndo tɛdikɔ ta dombo tahawatokondja lɔsɛnɔ+ oma lɔkɔ. 26 Dimi laketawɔ dia vɔ mbɔtɔ mindo oma lo elambo awɔ hita etena katshumbawɔ ɔnawɔ tshɛ l’enondo lo dja,+ l’oyango wa mbalanya, dia vɔ mbeya dia dimi kele Jehowa.”’

27 “Ɔnkɔnɛ ɔna onto le, sawola la luudu la Isariyɛlɛ kele tɛwɔ wate: ‘Nkum’Olongo Nkumadiɔndjɔ Jehowa kata ate: “Lo yoho shɔ nto, watshɛnyu wakantɛngɛ lo woho wakiwɔ komonga la kɔlamelo le mi. 28 Dimi lakawaela lo wodja wakamatshibe dia mbasha.+ Lam’akawɛnyi tokonakona tshɛ t’etale ndo esongo wele la akatshi efula,+ vɔ wakatatɛ nambola elambo awɔ ndo weshasha awɔ washa nkɛlɛ. Vɔ wakalambola opumu wa dimɛna* wa elambo awɔ ndo wakatshola elambo awɔ wa lotɛ lɛkɔ. 29 Ko dimi lakawambola nte: ‘Naa kitshimudi ya dihole dia la diko diatanyatshu lɛkɔ? (Diɔ mbelamɛka Dihole dia la Diko polo ndo ɛlɔ.)’”’+

30 “Tɛ luudu la Isariyɛlɛ wate: ‘Nkum’Olongo Nkumadiɔndjɔ Jehowa kata ate: “Onde nyamboyadja mindo oko wakayadje watshɛnyu mindo lo ndjela dikishi diawɔ dia nyɛtɛɛtɛ dia nsala kinumba ka lo nyuma la diɔ?+ 31 Onde ndo nyu lawɔ nyekɔ lo ntetemala ndjadja mindo polo ndo ɛlɔ lo nambola dikishi dianyu tshɛ dia nyɛtɛɛtɛ elambo, lo ntshumba ananyu lo dja?+ Luudu la Isariyɛlɛ le,+ onde lo etena kakɔ kaamɛ dimi pombaka nyokadimola lo woho wambolanyu kanyi?”’

“‘Lo mɛtɛ oko wemi la lɔsɛnɔ,’ mbata Nkum’Olongo Nkumadiɔndjɔ Jehowa, ‘dimi hatonyokadimola.+ 32 Ndo kɛnɛ kele la nyu lo yimba* etena katanyu nyate: “Nyɛsɔ toyale oko wedja, oko nkumbo ya lo wedja ekina yatɛmɔla* esongo la ave,”+ dui sɔ hadiosalemaki pondjo.’”

33 “‘Lo mɛtɛ oko wemi la lɔsɛnɔ’ mbata Nkum’Olongo Nkumadiɔndjɔ Jehowa, ‘dimi layonyolɛ oko nkumekanga la lonya la wolo ndo la lonya losembwe tɔɔ, ndo la nkɛlɛ kadɔdɔ.+ 34 Dimi layonyotondja oma l’atei w’anto ndo layonyosanganya oma lo wedja wakanyadiangana la lonya la wolo, la lonya losembwe tɔɔ, ndo la nkɛlɛ kadɔdɔ.+ 35 Dimi layonyɔtɔla lo oswe wa shɛnga wa anto ndo layɔtɔ lo kilombo la nyu lɛkɔ okoko lo okoko.+

36 “‘Oko wakamɔtɔ lo kilombo la watshɛnyu lo oswe wa shɛnga wa wodja wa Edjibito, ngasɔ kayomɔtɔ lo kilombo la nyu,’ mbata Nkum’Olongo Nkumadiɔndjɔ Jehowa. 37 ‘Dimi layonyetsha l’ɛse ka danga+ dia olami w’ɛkɔkɔ ndo layonyɔtshiya la wolo lo* sheke. 38 Koko dimi layonya atɔmbɔki ndo wanɛ wansalɛ kɔlɔ oma le nyu.+ Nɛ dia dimi layowatondja oma lo wodja wewɔ angɛndangɛnda, koko vɔ hawotɔtɔ lo wodja wa Isariyɛlɛ;+ ko nyayohomba mbeya dia dimi kele Jehowa.’

39 “Koko le nyu, luudu la Isariyɛlɛ le, Nkum’Olongo Nkumadiɔndjɔ Jehowa kata ate: ‘Onto l’onto l’atei anyu atshu atokambee dikishi diande dia nyɛtɛɛtɛ.+ Koko l’ɔkɔngɔ diko naka nyu hanyompokamɛ, kete hanyotonga la akoka wa mɔnyɔla lokombo lami l’ekila la elambo ndo la dikishi dianyu dia nyɛtɛɛtɛ.’+

40 “‘Nɛ dia lo dikona diami di’ekila, lo dikona di’otale dia lo Isariyɛlɛ,’+ mbata Nkum’Olongo Nkumadiɔndjɔ Jehowa, ‘lɛkɔ mbayonkambɛ luudu l’otondo la Isariyɛlɛ, vɔ tshɛ lo wodja.+ Dimi layowangɛnangɛna lɛkɔ ndo layɔlɔmba weshasha anyu ndo ɛlɔnga wa elambo anyu, diangɔ dianyu di’ekila tshɛ.+ 41 L’ɔtɛ wa opumu wa dimɛna,* nyu nyayɔngɛnyangɛnya lam’ayomonyotondja oma l’atei w’anto ndo lam’ayomonyosanganya oma lo wedja wakanyadiangana;+ ndo dimi layokidiama l’atei anyu lo washo wa wedja.’+

42 “‘Ko nyayohomba mbeya dia dimi kele Jehowa+ lam’ayomonyotoma lo nkɛtɛ y’Isariyɛlɛ,+ lo wodja wakamatshibe dia mbisha watshɛnyu. 43 Ko lɛkɔ nyayohɔ lɔkɛwɔ lanyu ndo etsha anyu wakanyayadje mindo,+ ndo nyayoyahetsha* l’ɔtɛ w’akambo wa kɔlɔ tshɛ wakanyasale.+ 44 Ko nyayohomba mbeya dia dimi kele Jehowa lam’ayomonyosalɛ akambo lo wahɔ wa lokombo+ lami, aha lo ndjela lɔkɛwɔ lanyu la kɔlɔ kana lo ndjela toho tanyu ta nsala akambo ta kɔlɔ, nyu luudu l’Isariyɛlɛ,’ mbata Nkum’Olongo Nkumadiɔndjɔ Jehowa.”

45 Ɔtɛkɛta wa Jehowa wakaye nto le mi ɔnɛ: 46 “Ɔna onto, kadimola elungi kayɛ otsha lo lɛkɛ la sidɛ ndo ewoya lo sidɛ, ta prɔfɛsiya otsha lo ɛtshi ka nkɛtɛ k’okonda ka lo sidɛ. 47 Tɛ okonda wa lo sidɛ wate: ‘Hokamɛ ɔtɛkɛta wa Jehowa. Nkum’Olongo Nkumadiɔndjɔ Jehowa kata ate: “Dimi layanga mbidja dja yalombalomba dia kotshumba+ ko yɔ yayotshumba osongo tshɛ w’oyoyo ndo osongo tshɛ wamboma wele le yɛ. Loombe la dja hatodimala+ ndo elungi tshɛ kayolongola la lɔ, oma lo sidɛ polo lo nɔrdɛ. 48 Ko anto* tshɛ wayɛna dia dimi Jehowa, dimɛ kambodja dja lɔkɔ diaha yɔ nyimala.”’”+

49 Ko dimi lakate nte: “Hayii, Nkum’Olongo Nkumadiɔndjɔ Jehowa! Vɔ wekɔ lo mbuta lo dikambo diami ɔnɛ: ‘Shi nde ekɔ lo ntɛkɛta tsho lo wɛɛla?’”*