Etsha

26 Angripa+ akatɛ Pɔɔlɔ ate: “Wɛ ekɔ la lotshungɔ la ntɛkɛta lo dikambo diayɛ.” Ko Pɔɔlɔ akemɛ lonya ndo akatatɛ ntɛkɛta dia ndjaswɛ, ata ate:

2 “Nkumekanga Angripa le, lo kɛnɛ kendana l’akambo tshɛ wafunda ase Juda,+ dimi lekɔ l’ɔngɛnɔngɛnɔ lo woho wayangami nsamba la ntondo kayɛ ɛlɔ, 3 djekoleko lam’ele wɛ ekɔ manyi lo kɛnɛ kendana la mbekelo tshɛ ndo ekakatanu wele lam’asa ase Juda. Ɔnkɔnɛ, lambokɔlɔmba dia wɛ pokamɛmi yema la solo dia lotutsha tshɛ.

4 “Lo mɛtɛ, yoho ya lɔsɛnɔ yakamasɛnɛ oma ko dikɛnda diami l’atei w’anto* ami ndo la Jɛrusalɛma mbeyamaka dimɛna le ase Juda tshɛ+ 5 wakambeyaka ntondo; naka walanga, vɔ wayonyotɛ dia lo ndjela yaato y’ɔtɛmwɛlɔ yoleki awui wolo lo ɔtɛmwɛlɔ aso,+ dimi lakasɛnɛ oko Ofarisɛ.+ 6 Koko kakianɛ, lo dikambo dia elongamelo ka daka diakalake Nzambi watshɛso+ mbemadimi wonya ɔnɛ lo kilombo, 7 daka diakɔ diamɛ sɔ mbele waoho aso 12 wekɔ lo nongamɛ dia mɛna ekotshamelo lo kambɛ Nzambi olimu w’ekila otsho la yanyi. Nkumekanga le, lo kɛnɛ kendana l’elongamelo kɛsɔ mbambofunda ase Juda.+

8 “Lande na kahetawɔ anto amɔtshi wa l’atei anyu dia Nzambi ayolola wanɛ wavɔ? 9 Dimi lo wedi ami, lakɛnyi dia dimi pombaka nsala tshɛ dia ndɔsha lokombo la Yeso y’ose Nazarɛtɛ. 10 Kɛsɔ mɛtɛ mbakamasale la Jɛrusalɛma, ndo lakadje ekilami efula lo nkanu+ nɛ dia lakalongola lotshungɔ oma le ewandji w’ɛlɔmbɛdi;+ ndo lam’akawahombaka ndjakema, dimi laketawɔka. 11 Lo mbasha alanya mbala efula lo toshinangɔnga tshɛ, dimi lakayangaka dia mbatshutshuya la wolo dia vɔ nsɛka mbetawɔ kawɔ ndo lam’ele dimi lakawaokaka nkɛlɛ k’efula, dimi lakakome polo ndo lo mbahɛnyahɛnya ndo l’esomba ekina.

12 “Etena kakamadjaka welo ɛsɔ, lam’akamatatshɔka otsha la Damasɛkɛ la lotshungɔ ndo la wolo w’oma le ewandji w’ɛlɔmbɛdi, 13 Nkumekanga le, lam’akimi la midi lo mboka, osase wa wolo woleki ndo osase wa wonya wakahɛtɛ oma l’olongo lo dihole diakimi dimi la wanɛ wakatatshɔka la mi.+ 14 Ndo lam’akatakɔ sho tshɛ la nkɛtɛ, dimi lakoke dui diambutɛ l’ɔtɛkɛta wa Hɛbɛru ɔnɛ: ‘Saolo, Saolo, lande na kampɛnyahɛnyayɛ? Laadiko di’ɛsɔngɔ* mbangitɔyɛ, wɛ ayoyasalɛ kɔlɔ.’ 15 Ko dimi lakate nte: ‘Nkumadiɔndjɔ, wɛ na?’ Ko Nkumadiɔndjɔ akate ate: ‘Dimi Yeso kahɛnyahɛnyayɛ. 16 Koko etɔ ndo emala lo ekolo ayɛ. L’ɔtɛ wa dikambo nɛ mbambomɛnama le yɛ dia kɔsɔna oko okambi ndo oko ɔmɛnyi w’akambo wakayɛnyi ndo w’akambo wayomokɛnya lo dikambo diami.+ 17 Dimi layokotshungola oma le anto anɛ ndo oma le wedja wayangami kotoma+ le wɔ 18 dia mbadihola washo,+ dia mbanya oma lo wodjima+ oya l’osase+ ndo oma lo lowandji la Satana+ oya le Nzambi, dia vɔ dimanyiyama pɛkato+ yawɔ ndo dia vɔ nkondja sango diawɔ l’atei w’anto wakakidiama oma lo mbetawɔ kele la wɔ le mi.’

19 “Ɔnkɔnɛ nkumekanga Angripa le, dimi kotona nkitanyiya ɛnɛlɔ k’oma l’olongo kɛsɔ. 20 Dimi lakɛmbɛ losango lɔnɛ ntondo le ase Damasɛkɛ,+ oma laasɔ le ase Jɛrusalɛma+ ndo l’ɛtshi ka nkɛtɛ ka Judeya k’otondo, ko le ase wedja dia vɔ pombaka ndjatshumoya ndo nkadimɔ le Nzambi lo nsala akambo wɛnya dia wamboyatshumoya.+ 21 L’ɔtɛ w’akambo asɔ mbakaminde ase Juda lo tɛmpɛlɔ ndo mbakawayange ndjakami.+ 22 Koko lam’ele lakakondja ekimanyielo k’oma le Nzambi, dimi lekɔ lo ntetemala nsambisha polo ndo ɛlɔ kɛnɛ la ntondo k’anto wa totshitshɛ ndo k’ɛnɛnɛ, lata paka akambo wakate Amvutshi la Mɔsɛ dia wayosalema,+ 23 ɔnɛ Kristo akahombe soyama+ ndo ɔnɛ oko wakandahombe monga onto la ntondo la mbolɔ oma lo nyɔi,+ nde akahombe mbewoya osase le anto anɛ ndo le ase wedja.”+

24 Lam’akataka Pɔɔlɔ akambo asɔ dia ndjaswɛ, Fɛsto akate la dui dia wolo ate: “Pɔɔlɔ, wɛ ambodjɔ dadi! Ewo kayɛ k’efula kambokodjoya dadi!” 25 Koko Pɔɔlɔ akate ate: “Shakasaka Fɛsto le, dimi hambidjwe dadi, koko lekɔ lo mbuta akambo wa mɛtɛ ndo w’eshika. 26 Lo mɛtɛ, nkumekanga katɛmi awui hwe hwe mbeyaka akambo asɔ dimɛna, dikambo dimi lekɔ l’eshikikelo dia ndooko dikambo dia ngasɔ diahandeye, nɛ dia ndooko dikambo diele l’atei w’akambo asɔ diakasalema lo woshɛshɛ.+ 27 Nkumekanga Angripa, onde wɛ mbetawɔka Amvutshi? Dimi mbeyaka dia wɛ mbetawɔka.” 28 Koko Angripa akatɛ Pɔɔlɔ ate: “Lo tshenyi ya wonya tsho, wɛ kokaka mbetawoyami dia dimi nkoma Okristo.” 29 Ko Pɔɔlɔ akate ate: “Dimi kombolaka la ntondo ka Nzambi oyadi lo tshenyi ya wonya kana l’etena k’otale, aha wɛ oto, koko ndo wanɛ tshɛ wapokamɛ ɛlɔ kɛnɛ, dia nyu nkoma oko dimi, koko aha la ɛkɔdi wa lokanu ɛnɛ.”

30 Ko nkumekanga akemala kaamɛ ndo nguvɛrnɛrɛ la Bɛrnisɛ ndo anto wakadjasɛ kaamɛ la wɔ. 31 Koko lam’akawatatombaka, vɔ wakatatɛkɛtaka lam’asawɔ vate: “Ndooko kɔlɔ kakasale onto ɔnɛ kakokande ndjakema kana kelekama ɛkɔdi wa lokanu.”+ 32 Ndo nto, Angripa akatɛ Fɛsto ate: “Pami kɛnɛ akakoke tshungɔma otondonga ndamɛ kɔnɔmba dia Kayisa menda dikambo diande.”+