Isaya
2 Ndo nyuma ka Jehowa kayodjasɛ le nde,+
Nyuma ka lomba+ ndo ka yimba,
Nyuma ka dako ndo ka wolo,+
Nyuma k’ewo ndo ka wɔma wa Jehowa.
3 Ko nde ayɔngɛnangɛna lo wɔma wa Jehowa.+
Nde hatolombosha lo ndjela kɛnɛ kɛnande la washo ande,
Ndo hatohangɔ tsho lo ndjela kɛnɛ kokande la atoyi ande.+
4 Nde ayolombosha tombolambola la losembwe,
Ndo nde ayohangɔ lo yoho yosembwe lo wahɔ wa akanga wa memakana wa la nkɛtɛ.
5 Losembwe kayonga oya lo lokende lande,
Ndo kɔlamelo oya wa lo dikundju diande.+
6 Laondo ayodjasɛ etena kɛmɔtshi kaamɛ la ɔna ɔkɔkɔ,+
Ndo nkɔi ayetama kaamɛ la ɔsɔngɔ wa mbudi,
Ndo ɔsɔngɔ wa ngɔmbɛ la ntambwɛ* ndo nyama ka wata wayonga kaamɛ;*+
Ko ɔna dikɛnda ayowalɔmbɔla.
7 Ngɔmbɛ la laondo wayɔlɛ kaamɛ,
Ndo anawɔ wayetama kaamɛ.
Ntambwɛ ayɔlɛ adiyo oko ngɔmbɛ.+
8 Ɔna lalɔma ayɔkɛnya suke la wosho w’oloyi wa kɔbra,
Ndo ɔna lambokila awɛlɛ ayodja lonya lande lo wosho w’oloyi wa lɔlɛngɔ.
9 Vɔ hawotosala ndooko kɔlɔ+
Kana ndanya dikona diami di’ekila di’otondo,+
Nɛ dia nkɛtɛ kayolola mɛtɛ la ewo ka Jehowa
Oko watololaka ashi lo ndjale.+
10 Lushi lɔsɔ odio wa Jɛse+ wayemala oko djembetelo* le anto.+
11 Lushi lɔsɔ Jehowa ayɔlɛkɛ lonya lande nto mbala ka 2 dia nyanga atshikadi w’anto ande waakatshikadi oma la Asuriya,+ oma la Edjibito,+ oma la Patɛrɔsɛ,+ oma la Kusha,*+ oma la Elama,+ oma la Shinara,* oma la Hamatɛ ndo oma l’asɛnga wa lo ndjale.+ 12 Nde ayodiya djembetelo* dikambo dia wedja ndo ayosanganya ase Isariyɛlɛ+ wakahandjɔ, ndo nde ayotshumanya ase Juda wakahandjɔ oma lo atshuku akɔ 4 wa nkɛtɛ.+
13 Kandjema ka Efrayimɛ kayeta,+
Ndo wanɛ wahetsha Juda wayolanyema.
Efrayimɛ hatoka Juda kandjema,
Ndo Juda hatohetsha Efrayimɛ.+
14 Ndo vɔ wayɔsɛlɔ lo eholola* w’ase Filistiya lo owɛstɛ;
Vɔ tshɛ kaamɛ wayomba diangɔ di’ase Ɛstɛ.
Vɔ wayosembola lonya lawɔ dia ndɔsha* Ɛdɔmɛ+ la Mɔaba,+
Ndo ase Amɔna wayokitshakitshama l’ɛse kawɔ.+