2 Nkumi ya dikanga

6 Ana w’amvutshi+ wakatɛ Elisha vate: “Eenda, dihole dieso kaamɛ la yɛ diamboleka mpika le so. 2 Lam’alangayɛ, etawɔ dia sho ntshɔ lo Jɔrdana. Onto l’onto l’atei aso atɛmbɛ osembe oma lɛkɔ kele totoke dihole diakokaso mbidjasɛ.” Nde akate ate: “Nyotshu.” 3 Ɔmɔtshi l’atei awɔ akate ate: “Lam’alangayɛ, onde wɛ ayotshɔ kaamɛ la ekambi ayɛ?” Ko nde akate ate: “Layotshɔ.” 4 Ɔnkɔnɛ nde akatshu kaamɛ la wɔ ndo wakakome lo Jɔrdana, ko wakatatɛ nkɔta esongo. 5 Lam’akakɔtaka ɔmɔtshi l’atei awɔ osongo ɔmɔtshi, ɛsɛlɛngɛ ka shɔka kakakɔ lo ashi, ko nde akate la dui dia wolo ate: “Hayii nkumɛmi, enda laamba kakamayiambi!” 6 Okambi wa Nzambi ka mɛtɛ akate ate: “Lende ɔkwɛtɔ?” Ko nde akawɛnya dihole diakɔ. Oma laasɔ, nde akakɔtɛ tshenyi ya shongo, akayitambiya laawɔ, ko yɔ yakatopola ɛsɛlɛngɛ kakɔ ka shɔka. 7 Nde akate ate: “Ɔsatɔ.” Ko nde akasembola lonya lande ndo akakiɔshi.

8 L’etena kɛsɔ, nkumekanga ka Suriya akatshu dia tɔlɔsha ase Isariyɛlɛ.+ Nde akambola ekambi ande kanyi ndo akate ate: “Dimi layoka mpango lɛnɛ la lɛnɛ kaamɛ la nyu.” 9 Oma laasɔ, okambi wa Nzambi ka mɛtɛ+ akatomɛ nkumekanga k’Isariyɛlɛ dui ate: “Yalama diaha wɛ mbeta lo dihole kapanda, nɛ dia ase Suriya wekɔ lo tatshu lɛkɔ.” 10 Ko nkumekanga k’Isariyɛlɛ akatome dui lo dihole diakɔɔhɛmɔla okambi wa Nzambi ka mɛtɛ. Nde akatetemala mbɔhɛmɔla, ko nde akewɔ dihole diakɔ lo waaso efula.*+

11 Dui sɔ diakomadia nkumekanga* ka Suriya nkɛlɛ k’efula, ko nde akatshumanya ekambi ande ndo akawatɛ ate: “Nyombute! Akɔna l’atei aso ele lo wedi wa nkumekanga k’Isariyɛlɛ?” 12 Ko okambi ande ɔmɔtshi akate ate: “Nkumɛmi nkumekanga le, ndooko onto l’atei aso! Ekɔ paka Elisha, omvutshi wele lo Isariyɛlɛ katɛ nkumekanga k’Isariyɛlɛ akambo watayɛ lo luudu layɛ la ndala.”+ 13 Nde akate ate: “Nyotshu nyotoyange dia mbeya lɛnɛ eende, kele ndjotome anto dia towonda.” L’ɔkɔngɔ diko, wakayowotɛka ɔnɛ: “Nde ekɔ la Dɔtana.”+ 14 Mbala kakɔ ɔtɔi, nde akatome mfalasa ndo pusupusu ya ta lɛkɔ, kaamɛ la olui wa woke w’asɔlayi. Vɔ wakakome l’otsho ko wakadinge osomba.

15 Lam’aketɔ okimanyedi* w’okambi wa Nzambi ka mɛtɛ la pindju ndo lam’akandatombe l’andja, nde akɛnyi dia asɔlayi wele la mfalasa ndo la pusupusu ya ta wambodinga osomba. Ko okimanyedi akɔ akawotɛ ate: “Hayii nkumɛmi! Ayangaso nsala?” 16 Koko nde akate ate: “Tokake wɔma!+ Dikambo wanɛ wele kaamɛ la so ndeka wanɛ wele kaamɛ la wɔ efula.”+ 17 Ko Elisha akatatɛ nɔmba ate: “Jehowa le, lam’alangayɛ, dihola washo ande kele nde ɛnyi.”+ Aha la ntshimbatshimba, Jehowa akadihola washo w’okimanyedi akɔ, ɛnyinde ko lɛkɛ l’akona lambololanɛ la mfalasa ndo la pusupusu ya ta ya dja+ yodingi Elisha.+

18 Lam’akaye ase Suriya le nde, Elisha akalɔmbɛ Jehowa ate: “Lam’alangayɛ, etɛ anto* anɛ totshungu.”+ Ko nde akawaetɛ totshungu, oko wakalɔmbɛ Elisha. 19 Oma laasɔ, Elisha akawatɛ ate: “Aha lendo kele mboka ndo aha lendo kele osomba. Nyondjele kele nyɔlɔmbɔlɛ otsha le onto layanganyu.” Koko nde akaalɔmbɔla otsha la Samariya.+

20 Lam’akawakome la Samariya, Elisha akate ate: “Jehowa le, dihola washo awɔ kele vɔ wɛnyi.” Ko Jehowa akadihola washo awɔ ndo vɔ wakɛnyi dia waki l’atei wa Samariya. 21 Lam’akawaɛnyi nkumekanga k’Isariyɛlɛ, nde akatɛ Elisha ate: “Papa le, mbadiake, mbadiake?” 22 Koko nde akate ate: “Towadiakake. Onde wate ndjake wanɛ wamboyonda mfumbe la lokuwa layɛ la ta ndo la ota ayɛ? Shawɔ mapa la ashi dia vɔ ndɛ la nnɔ+ kele wakalole le nkumɛwɔ.” 23 Ɔnkɔnɛ nde akaasalɛ fɛtɛ ka woke, ko vɔ wakale ndo wakanɔ, oma laasɔ nde akaakɛndja dia vɔ nkalola le nkumɛwɔ. Ndooko mbala kakaye olui wa dengalenga w’ase Suriya+ nto lo wodja w’Isariyɛlɛ.

24 L’ɔkɔngɔ wa laasɔ, Bɛnɛ-Hadada nkumekanga ka Suriya akatshumanya asɔlayi* ande tshɛ, ko akatshu dia todinga Samariya.+ 25 Ɔnkɔnɛ ndjala ka kasha+ kakayala la Samariya ndo vɔ wakayidinge polo ndo ɔtɛ wa mponda+ waya oshinga wa ekenga 80 wa mfɛsa, ndo k’anɛi ɔtɔi ka kabɛ* ka akake wa tokudumba kaya oshinga wa ekenga 5 wa mfɛsa. 26 Lam’akatetaka nkumekanga k’Isariyɛlɛ l’omamu w’ehele, womoto ɔmɔtshi akoowelɛ ate: “Nkumɛmi nkumekanga le, otokimanyiya!” 27 Ko nde akate ate: “Naka Jehowa hanyokimanyiyisha, lende akokami nyotanɛ ekimanyielo? Oma lo dihole di’esuswelo? Kana oma lo diamula dia vinyɔ kana dia esɔ?” 28 Nkumekanga akawombola ate: “Ambotomba?” Womoto akɔ akakadimola ate: “Womoto ɔnɛ akambutɛ ate: ‘Kimɔ ɔnayɛ dia sho mbɔlɛ ɛlɔ kele katole ɔnami loyi.’+ 29 Ɔnkɔnɛ takakatɛ ɔnami ndo takoole.+ La wedi a pindju, dimi lakawotɛ nte: ‘Kimɔka ɔnayɛ kele toole.’ Koko nde akashɛ ɔnande.”

30 Kam’akoke nkumekanga ɛtɛkɛta waki womoto akɔ, nde akaatshatsha ahɔndɔ+ ande. Lam’akandatetaka l’omamu w’ehele, anto wakɛnyi dia nde akalɔtɛ akoto l’ɛse k’ahɔndɔ ande.* 31 Oma laasɔ, nde akate ate: “Nzambi kambisha dilanya dia wolo naka ɔtɛ wa Elisha ɔna Shafata wayotshikala le nde ɛlɔ!”+

32 Elisha akadjasɛka lo luudu lande ndo dikumanyi wakadjasɛ kaamɛ la nde. Nkumekanga akatome pami kɛmɔtshi la ntondo kande, koko la ntondo k’ɔkɛndji akɔ nkoma, Elisha akatɛ dikumanyi ate: “Aha nyekɔ lo mɛna woho wambotoma ɔnaki ondjakanyi+ ɔnɛ onto dia ndjompembola ɔtɛ? Nyende wonya wayokoma ɔkɛndji, kanyodihe lokuke ndo tanyowɔtshiyake. Shi nkindo ya nkumɛnde yɔ shɔ l’ɔkɔngɔ ande?” 33 Etena kakandatɛkɛtaka la wɔ, ɔkɛndji akɔ akakome le nde, ko nkumekanga akate ate: “Sui nɛ ndja oma le Jehowa. Lande na katomokongɛ le Jehowa nto?”