2 Ɛkɔndɔ

30 Hɛzɛkiya akatome dui lo Isariyɛlɛ w’otondo+ ndo la Juda, ndo nde akafundɛ aseka Efrayimɛ l’aseka Manase+ mikanda dia vɔ ndja lo luudu la Jehowa la Jɛrusalɛma dia ndjosalɛ Jehowa Nzambi k’Isariyɛlɛ+ Fɛtɛ k’Elekanelo. 2 Koko nkumekanga, ewandji ande la etshumanelo k’otondo ka la Jɛrusalɛma wakɔshi yɛdikɔ ya nsala Fɛtɛ k’Elekanelo lo ngɔndɔ ka hende,+ 3 nɛ dia vɔ komonga la akoka wa kisala l’etena kokotosalemaka+ dikambo ɛlɔmbɛdi efula kondjakidia+ ndo anto kotshumana la Jɛrusalɛma. 4 Yɛdikɔ shɔ yakɛnama dia yekɔ dimɛna lo washo wa nkumekanga ndo wa etshumanelo k’otondo. 5 Ɔnkɔnɛ, vɔ wakɔshi yɛdikɔ ya mbisha diewoyelo lo Isariyɛlɛ w’otondo, oma la Bɛrɛ-Shɛba polo la Danɛ+ dia anto ndja ndjosalɛ Jehowa Nzambi k’Isariyɛlɛ Fɛtɛ k’Elekanelo la Jɛrusalɛma, nɛ dia oko olui, vɔ watakisalaka lo ndjela kɛnɛ kofundami.+

6 Ko amɛmbi wa mikanda* waketeta lo Isariyɛlɛ w’otondo ndo lo Juda la mikanda w’oma le nkumekanga nde l’ewandji ande oko wakadjanga nkumekanga ate: “Ase Isariyɛlɛ le, nyokalole le Jehowa Nzambi ka Abrahama, ka Isaka ndo ka Isariyɛlɛ dia nde nkalola le atshikadi wakahande oma l’anya wa nkumi ya dikanga y’Asuriya.+ 7 Tanyongake oko watshɛnyu ndo oko anangɛnyu waki komonga la kɔlamelo le Jehowa Nzambi ka watshɛwɔ, diakɔ diakandawaetɛ ɛngɔ ka wɔnɔnyi, oko wadiɛnanyu.+ 8 Kakianɛ, tanyongake ɛtɛ wolo oko watshɛnyu.+ Nyoyakitshakitsha l’ɛse ka Jehowa ndo nyoye lo tɛmpɛlɔ kande k’ekila+ kakandakidia lo pondjo ndo nyoyokambe Jehowa Nzambi kanyu, dia nkɛlɛ kande kadɔdɔ mimɔ oma le nyu.+ 9 Nɛ dia naka nyu nkalola le Jehowa, kete anangɛnyu la ananyu wayokama kɛtshi oma le wanɛ wakawande mfumbe+ ndo wayokondja lotshungɔ la nkalola lo wodja ɔnɛ,+ dikambo Jehowa Nzambi kanyu mbokanaka kandji* ndo kɛtshi,+ ndo nde hatonya elungi kande oma le nyu naka nyu nkalola le nde.”+

10 Ko amɛmbi wa mikanda* waketeta lo osomba l’osomba lo ɛtshi ka nkɛtɛ k’Efrayimɛ ndo ka Manase,+ mbidja ndo ka Zebuluna, koko anto wakaasɔkaka ndo wakawaɔlaka.+ 11 Koko anto amɔtshi w’aseka Ashɛrɛ, aseka Manase ndo aseka Zebuluna wakayakitshakitsha ko wakaye la Jɛrusalɛma.+ 12 Ndo nto, lonya la Nzambi ka mɛtɛ laki la Juda dia mbaetɛ kaamɛ* la oyango wa vɔ nkotsha kɛnɛ kakadjanga nkumekanga nde l’ewandji lo ndjela ɔtɛkɛta wa Jehowa.

13 Leemba l’anto wakasangana la Jɛrusalɛma dia nsala Fɛtɛ ka mapa waha la wodoya+ lo ngɔndɔ ka hende;+ aki etshumanelo ka woke efula. 14 Vɔ wakemala, ko wakanya dilambwelo diaki la Jɛrusalɛma+ ndo vɔ wakanya dilambwelo+ dia tshɔ tshɛ, ko wakadikasha lo Okidi wa Kidirɔna. 15 Oma laasɔ, vɔ wakadiake nyama k’olambo w’Elekanelo lo ngɔndɔ ka hende nshi 14. Ɛlɔmbɛdi la dikumanyi wakoke nsɔnyi, ko vɔ wakayakidia ndo wakela elambo wa lotshumba lo luudu la Jehowa. 16 Vɔ wakemala lo ahole awɔ lo ndjela Ɛlɛmbɛ wa Mɔsɛ okambi wa Nzambi ka mɛtɛ. Oma laasɔ, ɛlɔmbɛdi wakamɔngɛ dikila+ diakawɔshi oma l’anya w’ase Lɛwi. 17 Anto efula waki lo etshumanelo kondjakidia, ndo ase Lɛwi waki la ɔkɛndɛ wa ndjaka nyama y’olambo w’Elekanelo dikambo dia wanɛ tshɛ waki komonga pudipudi+ dia mbakidia dikambo dia Jehowa. 18 Nɛ dia leemba la woke l’anto, djekoleko aseka Efrayimɛ, Manase,+ Isakara ndo Zebuluna kondjaɛdia, koko vɔ wakalɛka nyama k’Elekanelo otshikitanyi la kɛnɛ kofundami. Ko Hɛzɛkiya akalɔmbɛ dikambo diawɔ ate: “Jehowa lele ɔlɔlɔ+ adimanyiya 19 onto tshɛ lambɔlɔngɔsɔla otema ande dia nyanga Jehowa Nzambi ka mɛtɛ,+ Nzambi ka watshɛnde kaanga mbakinde kondjaɛdia lo ndjela atɔndɔ w’ekila.”+ 20 Ko Jehowa akahokamɛ Hɛzɛkiya ndo akadimanyiya* anto.

21 Ɔnkɔnɛ, ase Isariyɛlɛ waki la Jɛrusalɛma wakasale Fɛtɛ ka mapa+ waha la wodoya l’edja ka nshi 7, wele la ɔngɛnɔngɛnɔ+ w’efula ndo ase Lɛwi la ɛlɔmbɛdi wakatombolaka Jehowa lushi la lushi, wahomɛ Jehowa dihomahoma diawɔ la wolo.+ 22 Ndo nto, Hɛzɛkiya akatɛkɛta ndo akakeketsha* ase Lɛwi tshɛ wakakambɛka Jehowa la kɛsɔ. Vɔ wakalɛka lo nshi yakɔ 7+ ya fɛtɛ, wakalambolaka elambo w’osanga+ ndo wakashaka Jehowa Nzambi ka watshɛwɔ losaka.

23 Oma laasɔ, etshumanelo k’otondo wakɔshi yɛdikɔ ya kisala nto l’edja ka nshi 7 nkina, ko vɔ wakakisale l’edja ka nshi 7 nto, wele la ɔngɛnɔngɛnɔ.+ 24 Hɛzɛkiya nkumekanga ka Juda akakimɔ ngɔmbɛ ya waomi kinunu (1 000) ndo ɛkɔkɔ nunu esambele (7 000) dikambo dia etshumanelo; ewandji wakakimɔ ngɔmbɛ ya waomi kinunu (1 000) ndo ɛkɔkɔ nunu dikumi (10 000)+ dikambo dia etshumanelo; ndo leemba la woke l’ɛlɔmbɛdi wakayakidiaka.+ 25 Etshumanelo k’otondo ka la Juda, ɛlɔmbɛdi, ase Lɛwi, etshumanelo k’otondo kakaye oma l’Isariyɛlɛ,+ ndo angɛndangɛnda+ wakaye oma lo ɛtshi ka nkɛtɛ k’Isariyɛlɛ ndo wanɛ wakadjasɛka la Juda wakatetemala ngɛnangɛna. 26 Ɔngɛnɔngɛnɔ wa mamba waki la Jɛrusalɛma, nɛ dia oma ko nshi ya Sɔlɔmɔna ɔna Davidɛ nkumekanga k’Isariyɛlɛ, dui dia ngasɔ diatasalemaka la Jɛrusalɛma.+ 27 L’ekomelo, ɛlɔmbɛdi w’ase Lɛwi wakemala, ko wakatshɔkɔla anto+ ndo Nzambi akoke dui diawɔ ndo dɔmbɛlɔ diawɔ diakakome lo edjaselo kande k’ekila, l’olongo.