1 Ɛkɔndɔ
18 L’ɔkɔngɔ w’etena kɛmɔtshi, Davidɛ akalɛndja ase Filistiya ndo akawaahemɛ, ko akɔshi Ngata+ kaamɛ la tosombasomba tendɛ le tɔ* oma l’anya w’ase Filistiya.+ 2 Oma laasɔ, nde akalɛndja ase Mɔaba,+ ko ase Mɔaba wakayala ekambi wa Davidɛ ndo wakelaka elambo.+
3 Davidɛ akalɛndja Hadadɛzɛrɛ+ nkumekanga ka Zoba+ suke la Hamatɛ+ etena kakandatatshɔka dia tokaloya lowandji lande lo Ɔkɛdi w’Efaratɛ.+ 4 Davidɛ akande pusupusu kinunu (1 000), ambahemi wa mfalasa nunu esambele (7 000), ndo asɔlayi wakɛndakɛnda l’ekolo w’oma le nde nunu akumi ahende (20 000).+ Oma laasɔ, Davidɛ akahembola eshisha wa mfalasa tshɛ yakotola pusupusu, onyake 100.+ 5 Lam’akaye ase Suriya wa la Damasɛkɛ dia ndjokimanyiya Hadadɛzɛrɛ nkumekanga ka Zoba, Davidɛ akadiake ase Suriya+ nunu akumi ahende la pende (22 000). 6 Oma laasɔ, Davidɛ akakitsha elui w’asɔlayi la Suriya ka la Damasɛkɛ, ko ase Suriya wakayala ekambi wa Davidɛ ndo wakawelaka elambo. Jehowa akakimanyiyaka Davidɛ dia nde mbidja otshumba* dihole tshɛ diakandatshɔka.+ 7 Ndo nto, Davidɛ akɔshi dingawo dia paonyi di’ebolonga oma le ekambi wa Hadadɛzɛrɛ, ko akaditɔlɛ la Jɛrusalɛma. 8 Davidɛ akɔshi nkonga efula ka mamba oma la Tibihatɛ ndo Kuna, esomba wa Hadadɛzɛrɛ. La yɔ mbakasale Sɔlɔmɔna Oduwa wa nkonga,+ dikundji ndo diangɔ dikina dia nkonga.+
9 Lam’akoke Tɔu nkumekanga ka Hamatɛ dia Davidɛ ambɔlɛndja asɔlayi tshɛ wa Hadadɛzɛrɛ+ nkumekanga ka Zoba,+ 10 mbala kakɔ ɔtɔi, nde akatome ɔnande Hadɔrama le nkumekanga Davidɛ dia towombola kana nde ekɔ ki ndo dia towandola l’ɔtɛ wakandalɔsha ndo wakandalɛndja Hadadɛzɛrɛ (nɛ dia tena efula, Hadadɛzɛrɛ akalɔshaka Tɔu), ko nde akawela weho tshɛ wa diangɔ dia paonyi, mfɛsa ndo nkonga. 11 Nkumekanga Davidɛ akakidia diangɔ sɔ dikambo dia Jehowa+ kaamɛ la mfɛsa ndo paonyi yakandaye la yɔ oma lo wedja ɛnɛ tshɛ: Oma lo Ɛdɔmɛ ndo oma la Mɔaba, oma le ase Amɔna,+ ase Filistiya+ ndo ase Amalɛka.+
12 Abishai+ ɔna Zeruya+ akadiake ase Ɛdɔmɛ nunu dikumi l’enanɛi (18 000) lo Okidi wa Lɛɛhɔ.+ 13 Nde akakitsha elui w’asɔlayi lo Ɛdɔmɛ, ko ase Ɛdɔmɛ tshɛ wakayala ekambi wa Davidɛ.+ Jehowa akakimanyiyaka Davidɛ dia mbidja otshumba* dihole tshɛ diakandatshɔka.+ 14 Davidɛ akatetemala mbolɛ Isariyɛlɛ w’otondo,+ ndo nde akalomboshaka anto ande tshɛ+ la losembwe ndo la sambo k’ɔlɔlɔ. 15 Jɔaba ɔna Zeruya aki owandji w’asɔlayi,+ Jɛhɔshafata+ ɔna Ahiludɛ aki ɔkɔndɔdi, 16 Zadɔka ɔna Ahitubɛ nde la Ahimɛlɛkɛ ɔna Abiyatara waki ɛlɔmbɛdi, ndo Shavisha aki ofundji. 17 Bɛnaya ɔna Jɛhɔyada aki owandji w’ase Kerɛtɛ+ ndo w’ase Pelɛtɛ.+ Ana w’apami wa Davidɛ waki anto wa weke wahɔnyi la nkumekanga.