2 Ɛkɔndɔ

4 Oma laasɔ, nde akasale elambwelo+ ka nkonga kaki la otale wa kubita 20, woke wa kubita 20 ndo tanga dia kubita 10.

2 Nde akasale Oduwa*+ wa la mbolo ya lɔlɛlɔla. Vɔ waki obolonga ndo woke awɔ oma l’ohembo ɔmɔtshi polo l’ohembo okina aki kubita 10; tanga diawɔ kubita 5 ndo otshimbedi awɔ waki la otale wa kubita 30 y’ɔkɔdi wa yɛdikɔ.+ 3 Asango wa sɛlɛ waki l’ɛse kawɔ+ l’otshimbedi awɔ tshɛ, 10 lo kubita 1 l’otshimbedi w’otondo w’Oduwa akɔ. Ɛnɔngɔ 2 w’asango wa sɛlɛ waki lɔkɔ ndo waki ɛngɔ ɔtɔi. 4 Vɔ wakakitshama laadiko dia ngɔmbɛ 12,+ shato mbɛlɛ lo nɔrdɛ, 3 mbɛlɛ lo owɛstɛ, 3 mbɛlɛ lo sidɛ ndo 3 mbɛlɛ lo ɛstɛ; ko Oduwa akɔ wakahema laadiko diayɔ ndo yɔ tshɛ yakɛdiya ɛkɔngɔ ayɔ otsha l’atei atei. 5 Nkeka kawɔ kaki yɛdikɔ ya etambe ka lonya,* ndo ohembo awɔ wakasalema oko ohembo wa dikɔhɔ, oko dɛmbɔlɛmbɔ. Oduwa akɔ wakakokaka mbɔtɔ bata* nunu sato (3 000) y’ashi.

6 Ndo nto, nde akasale alɔnga wa weke 10 dia solaka diangɔ, ko akakitsha 5 lo lonya l’omi ndo 5 lo lonya la lɔmɔsɔ.+ Vɔ wakasolaka diangɔ diakakambaka la wɔ dikambo di’olambo wa lotshumba lɔkɔ.+ Koko Oduwa wakikɔ dia ɛlɔmbɛdi mbɔkaka.+

7 Oma laasɔ, nde akasale dikundji dia atala 10 dia paonyi,+ oko wakadiashikikɛma,+ ko akadidje lo tɛmpɛlɔ, 5 lo lonya l’omi ndo 5 lo lonya la lɔmɔsɔ.+

8 Nde akasale ndo mɛsa 10, ko akaakitsha lo tɛmpɛlɔ, 5 lo lonya l’omi ndo 5 lo lonya la lɔmɔsɔ;+ nde akasale ndo alɔnga w’afuku 100 wa paonyi.

9 Oma laasɔ, nde akasale sɛkɛ+ di’ɛlɔmbɛdi+ ndo sɛkɛ*+ dia woke, kaamɛ ndo nkuke ya sɛkɛ diakɔ, ko nde akakite nkonga lo nkuke yawɔ. 10 Nde akakitsha Oduwa lo lɛkɛ la lonya l’omi, otsha lo sidɛ ɛstɛ.+

11 Ndo nto, Hirama akasale nkenga ya mbidjaka otoko, mpawo ndo alɔnga w’afuku.+

Ko Hirama akashidiya olimu tshɛ wakandasalɛ nkumekanga Sɔlɔmɔna lo luudu la Nzambi ka mɛtɛ:+ 12 Dikundji+ 2 ndo ɛtɛ wele oko alɔnga w’afuku waki lo tɔsɔdi ta dikundji diakɔ 2; ɛtɛyi 2+ dia mbifɛ ɛtɛ wele oko alɔnga w’afuku waki lo tɔsɔdi ta dikundji diakɔ; 13 asango wa pɔmɛgranatɛ+ 400 dikambo dia ɛtɛyi akɔ 2, ɛnɔngɔ 2 wa pɔmɛgranatɛ dikambo dia ɔtɛyi l’ɔtɛyi dia mbifɛ ɛtɛ 2 wele oko alɔnga w’afuku waki lo dikundji diakɔ;+ 14 pusupusu 10 ndo alɔnga wa weke 10 wa lo pusupusu yakɔ;+ 15 Oduwa la ngɔmbɛ 12 yele l’ɛse kawɔ;+ 16 nkenga ya mbidjaka otoko, mpawo,+ nsɔmɔ ndo diangɔ dikina tshɛ dia la nkonga ka dimɛna diakasalɛ Hirama-Abivɛ+ nkumekanga Sɔlɔmɔna dikambo dia luudu la Jehowa. 17 Nkumekanga akadilɛlɔla lo distrikɛ dia Jɔrdana lo nkɛtɛ ya diwomba ya lam’asa Sukɔta+ la Zɛrɛda. 18 Sɔlɔmɔna akasale diangɔ sɔ tshɛ efula ka mamba. Wotsho wa nkonga kombeyama shikaa.+

19 Sɔlɔmɔna akasale diangɔ nɛ tshɛ+ dikambo dia luudu la Nzambi ka mɛtɛ: Elambwelo ka paonyi;+ mɛsa+ la mapa wa lɛɛnya lɔkɔ;+ 20 dikundji dia atala kaamɛ la atala adiɔ wa paonyi ka pudipudi+ dia pɛtaka la ntondo ka luudu loleki l’etei lo ndjela kɛnɛ kalɔmbama; 21 alɛmbɔlɛmbɔ, atala ndo manu, la paonyi, paonyi koleki pudipudi; 22 diangɔ dia dimaka dja, alɔnga w’afuku, akɔhɔ ndo diangɔ dia mɛmbaka dja, la paonyi ka pudipudi; ndo soko dia luudu, nkuke yalɔ ya l’etei dikambo dia Dihole dioleki Ekila,+ ndo nkuke ya luudu la tɛmpɛlɔ, la paonyi.+