2 Nkumi ya dikanga

25 L’ɔnɔnyi wa 9 w’ɛlɔmbwɛlɔ ka Zɛdɛkiya, lo ngɔndɔ ka 10 nshi 10, Nɛbukadinɛza+ nkumekanga ka Babilɔna akaye l’asɔlayi ande tshɛ dia ndjɔlɔsha Jɛrusalɛma.+ Nde akake mpango kande dia ndjilɔsha ndo akayidinge la lokombo l’otshimbedi ayɔ tshɛ,+ 2 ko osomba akɔ wakadingama polo l’ɔnɔnyi wa 11 w’ɛlɔmbwɛlɔ ka nkumekanga Zɛdɛkiya. 3 Lo ngɔndɔ ka 4 nshi 9, ndjala ka kasha+ kakayala l’osomba, ko anto wa lo wodja+ komonga ndooko la ɛngɔ ka ndɛ. 4 Ehele k’osomba kakatondɔma,+ ko asɔlayi tshɛ wakalawɔ l’otsho oma lo soko diaki lam’asa mpele 2 suke la ekambɔ ka nkumekanga etena kakadingaka ase Kaladiya osomba. Ndo nkumekanga akatshu lo mboka k’otsha lo Araba.+ 5 Koko asɔlayi w’ase Kaladiya wakatshanya nkumekanga ndo wakatowonda lo laandja l’oswe wa Jeriko, ko asɔlayi ande tshɛ wakoohandjɔ. 6 Ko vɔ wakande nkumekanga+ ndo wakɔɔtɔlɛ otsha la Ribila le nkumekanga ka Babilɔna ndo wakatoolombosha lɛkɔ. 7 Vɔ wakadiake ana waki Zɛdɛkiya lo washo ande. Oma laasɔ, Nɛbukadinɛza akole Zɛdɛkiya washo, akookeleka mɔlɔla wa nkonga ndo akɔɔtɔlɛ la Babilɔna.+

8 Lo ngɔndɔ ka 5 nshi 7, mbuta ate l’ɔnɔnyi wa 19 w’ɛlɔmbwɛlɔ ka Nɛbukadinɛza nkumekanga ka Babilɔna, Nɛbuzaradana+ owandji w’alami, okambi wa nkumekanga ka Babilɔna akaye la Jɛrusalɛma.+ 9 Nde akatshumbe luudu la Jehowa,+ luudu* la nkumekanga+ ndo mvudu tshɛ ya la Jɛrusalɛma.+ Ndo nto, nde akatshumbe mvudu y’anto tshɛ wa lokumu.+ 10 Ndo asɔlayi tshɛ w’ase Kaladiya waki kaamɛ l’owandji w’alami+ wakanyukola mpele diakadinge Jɛrusalɛma. 11 Nɛbuzaradana owandji w’alami akande anto wakatshikala l’osomba, wanɛ tshɛ wakete lo wedi wa nkumekanga ka Babilɔna ndo anto wakatshikala+ otsha lo lɔhɔmbɔ. 12 Koko owandji w’alami akatshike anto amɔtshi woleki wola lo wodja dia vɔ kambaka dikambɔ dia vinyɔ ndo dia mbakandjaka elimu la wolo.+ 13 Ase Kaladiya wakahendjahendja dikundji dia nkonga+ dia lo luudu la Jehowa ndo pusupusu+ la Oduwa+ wa nkonga waki lo luudu la Jehowa, ko vɔ wakɛmbɛ nkonga yakɔ otsha la Babilɔna.+ 14 Vɔ wakɔshi ndo nkenga ya mbidjaka otoko, mpawo, diangɔ dia dimaka dja, akɔhɔ ndo diangɔ tshɛ dia nkonga diakawakambaka la diɔ l’olimu wa lo tɛmpɛlɔ. 15 Owandji w’alami akɔshi diangɔ dia mɛmbaka dja ndo alɔnga w’afuku wakasalema la paonyi ka dimɛna+ ndo la mfɛsa.+ 16 Lo kɛnɛ kendana la dikundji 2, Oduwa ndo pusupusu yakasale Sɔlɔmɔna dikambo dia luudu la Jehowa, wotsho wa nkonga yaki lo diangɔ sɔ tshɛ kokoka mbɛdikama.+ 17 Ekundji l’ekundji kaki l’otale wa kubita*+ 18 ndo ɔtɛ waki lɔkɔ wakasalema la nkonga. Ɔtɛ akɔ waki la tanga dia kubita 3 ndo ɔtɛyi la pɔmɛgranatɛ yaki l’otshimbedi w’otondo w’ɔtɛ akɔ yakasalema la nkonga.+ Ekundji ka 2 la ɔtɛyi atɔ kaki oko ka ntondo.

18 Ndo nto, owandji w’alami akɔshi Seraya+ owandji w’ɛlɔmbɛdi, Zɛfaniya+ ɔlɔmbɛdi wa lo dihole dia 2 ndo alami 3 w’asoko.+ 19 Nde akɔshi ɔnɛnɛ ɔmɔtshi waki la ɔkɛndɛ wa nama asɔlayi, angɛnyi 5 wa suke suke waki nkumekanga wakatanema l’osomba, kaamɛ ndo ofundji wa owandji w’asɔlayi, ɔnɛ lakasanganyaka anto wa lo wodja, ndo apami 60 wakɔsama oma l’atei w’anto k’anto wa lo wodja, wanɛ waki weke lo osomba. 20 Nɛbuzaradana+ owandji w’alami akawaɔshi, ko akaatɔlɛ otsha la Ribila+ le nkumekanga ka Babilɔna. 21 Nkumekanga ka Babilɔna akaakɔmɔla ko akaadiake la Ribila lo ɛtshi ka nkɛtɛ ka Hamatɛ.+ Ngasɔ mbakatɔlama Juda oma lo wodja awɔ+ otsha lo lɔhɔmbɔ.

22 Nɛbukadinɛza nkumekanga ka Babilɔna akasɔnɛ Ngedaliya+ ɔna Ahikama+ ɔna Shafana+ dia nde monga owandji w’anto wakatshikala l’ɛtshi ka nkɛtɛ ka Juda.+ 23 Lam’akoke ewandji tshɛ w’asɔlayi l’anto awɔ dia nkumekanga ka Babilɔna ambɔsɔna Ngedaliya, mbala kakɔ ɔtɔi vɔ wakaye le Ngedaliya la Mizipa. Ishimaɛlɛ ɔna Netaniya, Johanana ɔna Karea, Seraya ɔna Tanumɛta ose Netɔfa ndo Jazɛniya ɔna Maakata, kaamɛ l’anto awɔ+ mbakaye. 24 Ngedaliya akaatshibɛ vɔ la anto awɔ ndo akawatɛ ate: “Tanyokake wɔma dia monga ekambi w’ase Kaladiya. Nyodjasɛ lo wodja ndo nyokambee nkumekanga ka Babilɔna, ko akambo wayeta dimɛna le nyu.”+

25 Lo ngɔndɔ ka 7, Ishimaɛlɛ+ ɔna Netaniya ɔna Elishama laki lo ɔlɔndji wa nkumekanga* akaye kaamɛ l’apami akina 10, ko vɔ wakakɔmɔla Ngedaliya ko nde akavu nde l’ase Juda l’ase Kaladiya waki kaamɛ la nde la Mizipa.+ 26 L’ɔkɔngɔ wa laasɔ, anto tshɛ, oyadi akɛnda kana epalanga wakonɛɛ ko wakatshu otsha l’Edjibito,+ nɛ dia vɔ wakoke ase Kaladiya+ wɔma.

27 L’ɔnɔnyi wa 37 waki Jɛhɔyakina+ nkumekanga ka Juda lo lɔhɔmbɔ, lo ngɔndɔ ka 12 nshi 27, Evilɛ-Mɛrɔdaka nkumekanga ka Babilɔna akatshungola* Jɛhɔyakina nkumekanga ka Juda oma lo lokanu+ l’ɔnɔnyi wakandayala nkumekanga. 28 Nde akasawola la nde dimɛna ndo akakitsha kiti kande ka lowandji la diko oleki kiti ya lowandji ya nkumi ya dikanga nkina yaki kaamɛ la nde la Babilɔna. 29 Ko Jɛhɔyakina akakolola ahɔndɔ ande wa lokanu ndo nde akalɛka mbala la mbala la ntondo kande lo nshi tshɛ ya lɔsɛnɔ lande. 30 Nkumekanga akawoshaka mbo ya ndɛ mbala la mbala, lushi la lushi, nshi tshɛ ya lɔsɛnɔ lande.