1 Ɛkɔndɔ

15 Nde akatetemala mbika mvudu yande lo Osomba wa Davidɛ, nde akalɔngɔsɔla dihole dikambo dia Ɔshɛtɛ wa Nzambi ka mɛtɛ, ndo nde akawokɛ luudu la dipɛma.+ 2 L’etena kɛsɔ mbakate Davidɛ ate: “Ndooko onto lakoka mɛmba Ɔshɛtɛ wa Nzambi ka mɛtɛ onyake ase Lɛwi, nɛ dia Jehowa akaasɔnɛ dia mɛmbaka Ɔshɛtɛ wa Jehowa ndo dia mbokambɛka nshi tshɛ.”+ 3 Ko Davidɛ akatshumanya ase Isariyɛlɛ tshɛ la Jɛrusalɛma dia tɛmba Ɔshɛtɛ wa Jehowa oya lo dihole diakandalɔngɔsɔla dikambo diawɔ.+

4 Davidɛ akatshumanya tokanula t’Arɔna+ ndo ase Lɛwi anɛ:+ 5 Oma le aseka Kɔhata: Owandji Uriyɛlɛ nde l’anango 120; 6 oma le aseka Merari: Owandji Asaya+ nde l’anango 220; 7 oma le aseka Ngɛrɛshɔmɛ: Owandji Jɔɛlɛ+ nde l’anango 130; 8 oma le tokanula ta Elizafana:+ Owandji Shemaya nde l’anango 200; 9 oma le tokanula ta Hɛbɛrɔna: Owandji Eliyɛlɛ nde l’anango 80; 10 oma le tokanula ta Uziyɛlɛ:+ Owandji Aminadaba nde l’anango 112. 11 Ndo nto, Davidɛ akelɛ ɛlɔmbɛdi ɛnɛ: Zadɔka+ nde la Abiyatara,+ la ase Lɛwi anɛ: Uriyɛlɛ, Asaya, Jɔɛlɛ, Shemaya, Eliyɛlɛ ndo Aminadaba, 12 ko nde akawatɛ ate: “Nyu mbele ɛtɛ wa nkumbo ya washe ase Lɛwi. Nyoyakidia nyu l’anangɛnyu, kele nyotɛmbɛ Ɔshɛtɛ wa Jehowa Nzambi k’Isariyɛlɛ oya lo dihole diamomɔlɔngɔsɔla dikambo diawɔ. 13 Lam’ele nyu kombɛɛmba mbala ka ntondo,+ nkɛlɛ ka Jehowa Nzambi kaso kakaye le so,+ nɛ dia sho konyanga dia mbeya yoho ya dimɛna ya nsala dui sɔ.”+ 14 Ko ɛlɔmbɛdi vɔ l’ase Lɛwi wakayakidia dia tɛmba Ɔshɛtɛ wa Jehowa Nzambi k’Isariyɛlɛ.

15 Ko ase Lɛwi wakɛmbɛ Ɔshɛtɛ wa Nzambi ka mɛtɛ lo ahɛka awɔ l’esembe,+ oko wakadjanga Mɔsɛ lo ndjela ɔtɛkɛta wa Jehowa. 16 Oma laasɔ, Davidɛ akatɛ ewandji w’ase Lɛwi dia nsɔna anangɛwɔ dia vɔ monga amembi dia vɔ membaka la ɔngɛnɔngɛnɔ kaamɛ la dihomahoma nɛ: Dihomahoma di’eshinga, nsɛsɛ+ ndo nsɛmbalɛ.+

17 Ɔnkɔnɛ, ase Lɛwi wakasɔnɛ Hemana+ ɔna Jɔɛlɛ kaamɛ l’anango, Asafu+ ɔna Bɛrɛkiya, ndo oma le aseka Merari w’anangɛwɔ, Etana+ ɔna Kushaya. 18 Anangɛwɔ wa l’olui wa 2+ anɛ waki kaamɛ la wɔ: Zɛkariya, Bɛnɛ, Jaziyɛlɛ, Shemiramɔta, Jɛhiyɛlɛ, Uni, Eliyabɛ, Bɛnaya, Maseya, Matitiya, Elifɛlɛhu, ndo Mikineya. Ɔbɛdɛ-Ɛdɔmɛ kaamɛ la Jeyɛlɛ waki alami w’asoko. 19 Amembi anɛ: Hemana,+ Asafu+ ndo Etana wakahombaka mpoma nsɛmbalɛ ya nkonga;+ 20 Zɛkariya, Aziyɛlɛ, Shemiramɔta, Jɛhiyɛlɛ, Uni, Eliyabɛ, Maseya ndo Bɛnaya wakahomaka dihomahoma di’eshinga lo wendjo wa Alamɔtɛ;*+ 21 Matitiya,+ Elifɛlɛhu, Mikineya, Ɔbɛdɛ-Ɛdɔmɛ, Jeyɛlɛ ndo Azaziya wakahomaka nsɛsɛ lo wendjo wa Shemina*+ dia monga oko ɛnɔmbɔdi. 22 Kɛnaniya+ owandji w’ase Lɛwi kakalɔmbɔla wɛmbɛlɔ, dikambo nde aki manyi; 23 Bɛrɛkiya nde la Elekana waki alami wa soko di’otsha lɛnɛ aki Ɔshɛtɛ. 24 Ɛlɔmbɛdi ɛnɛ: Shɛbaniya, Jɔshafata, Netanɛlɛ, Amasai, Zɛkariya, Bɛnaya ndo Eliɛzɛrɛ wakadaka amama la wolo la ntondo k’Ɔshɛtɛ wa Nzambi ka mɛtɛ,+ ndo Ɔbɛdɛ-Ɛdɔmɛ nde la Jɛhiya waki alami wa soko di’otsha lɛnɛ aki Ɔshɛtɛ.

25 Oma laasɔ, Davidɛ nde la dikumanyi dia l’Isariyɛlɛ ndo ewandji w’anto nunu nunu wakatakɛndakɛndaka kaamɛ dia tɛmba ɔshɛtɛ wa sheke wa Jehowa oma lo luudu laki Ɔbɛdɛ-Ɛdɔmɛ+ la ɔngɛnɔngɛnɔ.+ 26 Etena kakakimanyiya Nzambi ka mɛtɛ ase Lɛwi wakayɛmbaka ɔshɛtɛ wa sheke wa Jehowa, vɔ wakalambola ɛsɔngɔ wa ngɔmbɛ 7 ndo ɛkɔkɔ wa waomi 7.+ 27 Davidɛ akalɔtɛ okutu wele bu l’anya wa dihɔndɔ dia dimɛna efula woho wakalɔtɛ ase Lɛwi tshɛ wakayɛmbaka Ɔshɛtɛ, amembi ndo Kɛnaniya laki owandji wa wɛmbɛlɔ ndo w’amembi. Davidɛ akalɔtɛ ndo efodɛ+ wa linɛnɛ. 28 Ase Isariyɛlɛ tshɛ wakayayaka la ɔshɛtɛ wa sheke wa Jehowa, wayade ekoko w’ɔngɛnɔngɛnɔ,+ la wendjo wa wɔɔndjɔ, kaamɛ la amama,+ nsɛmbalɛ ndo wayahome dihomahoma di’eshinga ndo nsɛsɛ la wolo.+

29 Koko lam’akakome ɔshɛtɛ wa sheke wa Jehowa l’Osomba wa Davidɛ,+ Mikalɛ+ ɔna Saolo akalengɛ lo didishi, ko akɛnyi nkumekanga Davidɛ ayalembɔlembɔ ndo ayangɛnangɛna; ko nde akatatɛ mbɔɔnyɔla l’otema ande.+