Ɛnyɛlɔ
12 Djembetelo ya woke yakɛnama l’olongo: Womoto+ ɔmɔtshi akayalɛngɛ* la wonya ndo ngɔndɔ kaki l’ekolo ande ndo nde akalɔtɛ dɛmbɔ dia nkoso diaki la tɔɔtɔ 12 l’ɔtɛ ande, 2 ndo womoto akɔ aki la diemi. Nde akalelaka dikambo nde aki la kandji ndo akatataka lɔɔnɔ.
3 Djembetelo kina yakɛnama l’olongo. Nyolonge, dragɔ+ dia woke dia beela oko dja diaki la ɛtɛ 7 la nseke 10 ndo diaki la diadɛmɛ* 7 l’ɛtɛ adiɔ. 4 Wela adiɔ wakakotola k’asato ɔtɔi ka tɔɔtɔ+ ta l’olongo, ko akatikasha la nkɛtɛ.+ Dragɔ diakɔ diakemala la ntondo ka womoto+ laki la diemi suke la mbota l’oyango wa diɔ ndɛ ɔna lam’ayota womoto akɔ.
5 Ko nde akote ɔna pami+ lahomba nama wedja tshɛ la okalemba wa lowolo.+ Ko ɔna aki womoto akɔ akɔsama otsha le Nzambi ndo otsha lo kiti kande ka lowandji. 6 Ko womoto akalawɔ otsha l’oswe, lɛnɛ ele dihole diakɔɔlɔngɔsɔlɛ Nzambi ndo lɛnɛ akawahombe mbolesha l’edja ka nshi kinunu la nkama hiende l’akumi asamalo (1 260).+
7 Ko ta diakatombe l’olongo: Mikayɛlɛ*+ l’andjelo ande wakalɔ la dragɔ, ko dragɔ l’andjelo ande wakaalɔsha, 8 koko vɔ kombaleka wolo* ndo vɔ komonga la dihole nto l’olongo. 9 Ko wakakasha dragɔ+ dia woke, oloyi akɔ w’edjedja+ welamɛ Diabolo+ ndo Satana,+ ɔnɛ langanyiya nkɛtɛ k’otondo.+ Wakawokasha la nkɛtɛ+ nde l’andjelo ande. 10 Dimi lakoke dui dia wolo oma l’olongo diata ɔnɛ:
“Kakianɛ, panda+ kamboyala ndo wolo ndo Diolelo dia Nzambi kaso+ ndo lowandji la Kristo kande, nɛ dia ɔsɔngwɛdi w’anangɛso ambokashema, ɔnɛ lataasɔngwɛka la yanyi ndo l’otsho la ntondo ka Nzambi kaso!+ 11 Ko vɔ wakɔɔlɛndja+ l’ɔtɛ wa dikila dia Ɔna Ɔkɔkɔ+ ndo l’ɔtɛ wa losango lakawasambishaka,+ ndo vɔ komboka anima*+ awɔ ngandji oyadi kaanga la ntondo ka nyɔi. 12 Diakɔ diele olongo le, ɔngɛnɛngɛnɛ ndo wanɛ wodjashi lɔkɔ! Mananu kayanga monga la nkɛtɛ ndo lo ndjale,+ nɛ dia Diabolo amboya le nyu ele la nkɛlɛ k’efula, eeya dia etena kambootshikalɛ kaya mondo.”+
13 Lam’akɛnyi dragɔ dia wambowokasha la nkɛtɛ,+ nde akahɛnyahɛnya womoto+ lakote ɔna pami. 14 Koko, wakasha womoto akɔ ahafu 2 wa mpongo+ ka woke dia nde mfumbɔ otsha l’oswe lo dihole diande, lɛnɛ ahombande ndeshama l’edja k’etena 1 ndo tena ndo etenyi k’etena,*+ anganyi etale la oloyi.+
15 Ko oloyi akatowɔ ashi wele oko tshondo y’ɔkɛdi oma l’onyɔ awɔ l’ɔkɔngɔ wa womoto dia womoto akɔ dinda lo ashi. 16 Koko nkɛtɛ yakakimanyiya womoto akɔ ndo nkɛtɛ yakadihola onyɔ ayɔ ndo yakamɛnɛ ɔkɛdi w’ashi wakatowɔ dragɔ oma l’onyɔ adiɔ. 17 Ko dragɔ diakomalɛ womoto akɔ ndo diakatshu tɔlɔsha atshikadi wa kanula*+ ya womoto, wanɛ wakitanyiya ɛlɛmbɛ wa Nzambi ndo wakamba olimu wa nsambisha dikambo dia Yeso.+