Rɔmɔ
12 Ɔnkɔnɛ analengo, dimi lambonyɔsɛngasɛnga lo kɛtshi ka Nzambi dia nyu nambola alemba+ anyu oko olambo wasɛna, w’ekila+ ndo wetawɔma le Nzambi, olimu w’ekila kaamɛ la akoka anyu w’ekanelo ka yimba.+ 2 Ndo nyotshike tshikitanyema oma le dikongɛ di’akambo nɛ,* koko nyohilwame lo nɔngɔsɔla timba tanyu+ dia nyuamɛ+ mbeya dimɛna lolango la Nzambi l’ɔlɔlɔ, letawɔma ndo la kokele.
3 Nɛ dia lo ndjela ɔlɔlɔ waheyama mbɛdika wakawansalɛ mbatɛmi onto tshɛ la l’atei anyu diaha nde nkanyiya efula dikambo diande hita oleki kɛnɛ kele ohomba nde nkanyiya,+ koko dia nde nkanyiya woho wa monga la yimba y’ɔlɔlɔ, onto l’onto lo ndjela yɛdikɔ ya mbetawɔ+ kakawosha* Nzambi. 4 Dikambo oko weso la tenyi dia demba efula lo demba ɔtɔi,+ koko tenyi dia demba diakɔ tshɛ hadiokambe olimu ɔtɔi, 5 ngasɔ mbeso ndo sho lawɔ. Kaanga mbeso efula, tekɔ demba ɔtɔi kaamɛ la Kristo, koko l’onto ndo l’onto tekɔ tenyi dia demba diokakatanyi kaamɛ.+ 6 Ko lam’ele onto l’onto la l’atei aso ekɔ la losha lotshikitanyi lo ndjela ɔlɔlɔ waheyama mbɛdika wakawatosalɛ,+ naka losha la mbuta prɔfɛsiya, toyite lo ndjela yɛdikɔ ya mbetawɔ kaso. 7 Naka olimu, totetemale mbokamba. Ɔnɛ letsha, ayasha lo wetshelo ande.+ 8 Ɔnɛ lakeketshana,* asha ekeketshelo.*+ Ɔnɛ lashana,* ashane la lokaho tshɛ.+ Ɔnɛ lalɔmbɔla,* alɔmbɔlɛ la ɔkɔmi tshɛ.*+ Ɔnɛ lokana kɛtshi, asale dikambo sɔ l’ɔngɛnɔngɛnɔ.+
9 Ngandji kanyu katongake ka dungi pende.+ Nyohetsha kɛnɛ kele kɔlɔ+ ndo nyokukute kɛnɛ kele ɔlɔlɔ. 10 Lo kɛnɛ kendana la ngandji k’onto l’ɔnango, nyokane ngandji k’efula. Lo kɛnɛ kendana la nɛmiyana, nyosha ɛnyɛlɔ.*+ 11 Nyonge anto wakamba olimu,* aha esuwa.*+ Nyɔhɛtɛhɛtɛ la nyuma.+ Nyokambe Jehowa* olimu oko ɛhɔmbɔ.+ 12 Nyɔngɛnɛngɛnɛ lo elongamelo. Nyokikɛ etena kenyu l’asui.+ Nyotetemale nɔmba.+ 13 Nyokimanyiya ekilami lo ndjela ehomba awɔ.+ Nyonge la mbekelo ka nongolaka angɛndangɛnda.+ 14 Nyotetemale ntshɔkɔla wanɛ wanyɔhɛnyahɛnya.+ Nyɔtshɔkɔlake anto ndo tanyowadjake mananu.+ 15 Nyɔngɛnɛngɛnɛ la wanɛ wangɛnangɛna; nyolele la wanɛ walela. 16 Nyɔshi anto akina woho wayaɔsanyu nyuamɛ. Tanyahɛke timba tanyu lo akambo wa ndjadiya,* koko nyɔlɔmbwame la akambo w’okitshakitsha.+ Tanyongake akanga wa lomba lo washo anyu hita.+
17 Tanyokaloyake kɔlɔ lo kɔlɔ.+ Nyodje yimba lo kɛnɛ kele ɔlɔlɔ lo washo* w’anto tshɛ. 18 Naka kokaka, lo edja tshɛ kaakadialemanɛ la nyu, nyodjasɛ l’anto tshɛ ki.+ 19 Anangemi ami, tanyɔsɔmbɔyake nyuamɛ, koko nyotshikee nkɛlɛ+ ka Nzambi dihole, nɛ dia akafundama ɔnɛ: “‘Nsɔmbɔya ekɔ dikambo diami. Dimi kayɔsɔmbɔya,’ mbata Jehowa.”*+ 20 Koko “naka otunyi ayɛ ekɔ la ndjala, shande ɛngɔ ka ndɛ. Naka nde ekɔ la mposa, shande ɛngɔ ka nnɔ, nɛ dia lo nsala ngasɔ, wɛ ayowahɛ akalanga wa dja l’ɔtɛ.”+ 21 Tɔlɛndjamake la akambo wa kɔlɔ, koko otetemale nɛndja akambo wa kɔlɔ oma lo akambo w’ɛlɔlɔ.+