2 Samuɛlɛ

24 Nkɛlɛ ka Jehowa kadɔdɔ kakaye le Isariyɛlɛ+ nto lam’akatshutshuya onto ɔmɔtshi Davidɛ* dia ndɔshana la wɔ, ata ate: “Tshɔka, taadia+ ase Isariyɛlɛ ndo ase Juda.”+ 2 Ko nkumekanga akatɛ Jɔaba,+ owandji w’asɔlayi waki kaamɛ la nde ate: “Lam’alangayɛ, eteta lo waoho tshɛ w’Isariyɛlɛ, oma la Danɛ polo la Bɛrɛ-Shɛba+ kele fundja anto nkombo kele mbeye lofulo l’anto.” 3 Koko Jɔaba akatɛ nkumekanga ate: “Jehowa Nzambi kayɛ afudia lofulo l’anto mbala 100, ndo washo wa nkumɛmi nkumekanga wɛnyi dui sɔ. Ko lande na kalanga nkumɛmi nkumekanga nsala dui dia ngasɔ?”

4 Koko dui dia nkumekanga diakaleke dia Jɔaba ndo dia ewandji w’asɔlayi. Ko Jɔaba nde l’ewandji w’asɔlayi wakamɔ oma la ntondo ka nkumekanga dia tofundja ase Isariyɛlɛ nkombo.+ 5 Vɔ wakatehɔ Jɔrdana ko wakatohanga la Aroɛrɛ+ lo lonya l’omi* la osomba l’atei atei w’okidi ndo wakatshu lo lɛkɛ l’otsha laka ase Ngada ndo otsha la Jazɛrɛ.+ 6 L’ɔkɔngɔ wa laasɔ, vɔ wakatshu la Ngiliyadɛ+ ndo l’ɛtshi ka nkɛtɛ ka Tahitimɛ-Hɔdishi ndo wakatetemala polo la Danɛ-Janɛ, ko wakatshimbe otsha la Sidɔna.+ 7 Ko vɔ wakatshu lo ahole w’eshamelo wa la Tura+ ndo l’esomba tshɛ w’ase Hivi,+ w’ase Kanana, ko wakatokomɛ la Nɛngɛbɛ+ ka la Juda lo Bɛrɛ-Shɛba.+ 8 Ɔnkɔnɛ, vɔ waketeta lo wodja w’otondo ndo wakatokoma la Jɛrusalɛma l’ɔkɔngɔ wa ngɔndɔ 9 la nshi 20. 9 Ko Jɔaba akasha nkumekanga lofulo l’anto wakafundjama nkombo. Isariyɛlɛ aki la andɔshi wa ta nunu nkama enanɛi (800 000) waki la tokuwa ta ta ndo apami w’ase Juda waki nunu nkama tshanu (500 000).+

10 Koko otema* wa Davidɛ wakawaanya+ l’ɔkɔngɔ wa nde mbadia lofulo l’anto. Ko Davidɛ akatɛ Jehowa ate: “Dimi lambosala pɛkato+ ka woke lo woho wosadimi dikambo nɛ. Koko Jehowa le, lam’alangayɛ, odimanyiya okambi ayɛ munga kande,+ nɛ dia lambosala dikambo di’enginya efula.”+ 11 Lam’aketɔ Davidɛ la pindju, ɔtɛkɛta wa Jehowa wakaye le omvutshi Ngada+ laki ɔmɛnyi wa waɛnɛlɔ waki Davidɛ ɔnɛ: 12 “Tshɔka tote Davidɛ wate: ‘Jehowa kata ate: “Layanga kosha awui 3 wa wɛ nsɔna. Sɔna dui dimɔtshi diahombami kosalɛ.”’”+ 13 Ko Ngada akɔtɔ le Davidɛ ndo akawotɛ ate: “Onde wɛ nangaka ɛnɔnyi 7 wa ndjala ka kasha ndja lo wodja ayɛ?+ Kana onde wɛ nangaka talawɔka atunyi ayɛ wayotakotshanyaka l’edja ka ngɔndɔ 3?+ Kana onde wɛ nangaka olando ndja lo wodja ayɛ+ l’edja ka nshi 3? Laasɔ kana yimba dimɛna lo kɛnɛ kahombami totɛ Ɔnɛ lakantomi.” 14 Ɔnkɔnɛ Davidɛ akatɛ Ngada ate: “Dui sɔ diambompandjola wɔɔngɔ efula. Lam’alanganyu, nyɛsɔ tetawɔ dia nkɔ lo anya wa Jehowa,+ nɛ dia kɛtshi kande kekɔ efula,+ koko tanyetawɔke dia dimi nkɔ lo anya w’onto.”+

15 Ko Jehowa akatome olando+ lo Isariyɛlɛ oma ko pindju polo l’etena kakashikikɛma, ko anto nunu akumi esambele (70000) oma la Danɛ polo la Bɛrɛ-Shɛba+ wakavu.+ 16 Lam’akasembola ondjelo lonya lande otsha la Jɛrusalɛma dia ndjilanya, Jehowa akanyange* l’ɔtɛ wa mpokoso kakɔ,+ ko nde akatɛ ondjelo wakalanyaka anto ate: “Ambokoka! Kaloya lonya layɛ.” Ondjelo wa Jehowa aki suke la dihole di’esuswelo dia Arauna+ ose Jɛbusɛ.+

17 Lam’akɛnyi Davidɛ ondjelo wakadiakaka anto, nde akatɛ Jehowa ate: “Dimi kakasale pɛkato ndo dimi kakasale kɔlɔ. Ko ɛkɔkɔ ɛnɛ+ ambowosala? Lam’alangayɛ, lonya layɛ lankɔmɔlɛ ndo lakɔmɔlɛ ase luudu la papa.”+

18 Ko Ngada akaye le Davidɛ lushi lɔsɔ ndo akawotɛ ate: “Dɛ, tosale Jehowa elambwelo lo dihole di’esuswelo dia Arauna ose Jɛbusɛ.”+ 19 Ɔnkɔnɛ Davidɛ akadɛ lo ndjela ɛtɛkɛta wa Ngada, oko wakadjanga Jehowa. 20 Lam’akende Arauna ndo lam’akandɛnyi nkumekanga nde l’ekambi ande wayaye oya le nde, mbala kakɔ ɔtɔi Arauna akatshu, ko akatokusamɛ nkumekanga elungi polo la nkɛtɛ. 21 Arauna akambola ate: “Lande na kamboya nkumɛmi nkumekanga le okambi ande?” Davidɛ akakadimola ate: “Dia ndjosomba dihole di’esuswelo oma le yɛ, la oyango wa salɛ Jehowa elambwelo dia mpokoso kambokomɛ wodja nshila.”+ 22 Koko Arauna akatɛ Davidɛ ate: “Nkumɛmi nkumekanga adiɔshi kele alambole kɛnɛ kele ɔlɔlɔ le nde.* Ngɔmbɛ tɔ kɛnɛ dikambo di’olambo wa lotshumba ndo ehomɔ k’esuswelo ndo dihomɔ dia ngɔmbɛ diakoka monga nkunyi diɔ nɛ. 23 Nkumekanga le, diangɔ nɛ tshɛ Arauna ambodisha nkumekanga.” Oma laasɔ, Arauna akatɛ nkumekanga ate: “Jehowa Nzambi kayɛ akohomuya lokolo l’ɔlɔ.”

24 Koko nkumekanga akatɛ Arauna ate: “Keema, dimi pombaka kisomba losomba oma le yɛ. Dimi hantolambola Jehowa Nzambi kami elambo wa lotshumba wahamasombi losomba.” Ɔnkɔnɛ Davidɛ akasombe dihole di’esuswelo ndo ngɔmbɛ la tɔshɛkɛlɛ*+ 50 ta mfɛsa. 25 Ko Davidɛ akasalɛ Jehowa elambwelo+ laawɔ ndo akalambola elambo wa lotshumba ndo elambo w’osanga. Oma laasɔ, Jehowa akakadimola lo alɔmbɛlɔ wakawɔɔlɔmbɛ dikambo dia wodja,+ ko mpokoso kakakomɛ Isariyɛlɛ kakashile.