2 Ɛkɔndɔ
8 L’ekomelo k’ɛnɔnyi 20 wakake Sɔlɔmɔna luudu la Jehowa ndo luudu* lande hita,+ 2 Sɔlɔmɔna akanyomoka esomba wakasha Hirama+ Sɔlɔmɔna ndo akadjashiya ase Isariyɛlɛ* lɛkɔ. 3 Laadiko dia laasɔ, Sɔlɔmɔna akatshu la Hamatɛ-Zɔba ko akatokiɔsa. 4 Oma laasɔ, nde akake* Tadɛmɔrɛ lo oswe ndo esomba+ tshɛ w’apɛngɛ wakandake la Hamatɛ.+ 5 Nde akake ndo Bɛtɛ-Hɔrɔna+ ka la Diko la Bɛtɛ-Hɔrɔna+ ka l’Ɛse, esomba wodingami la mpele dia wolo, akasale nkuke ndo tokengete, 6 Baalata+ kaamɛ la esomba tshɛ wa mombaka diangɔ waki Sɔlɔmɔna, esomba tshɛ wa pusupusu,+ esomba w’ambahemi wa mfalasa ndo kɛnɛ tshɛ kakakombola Sɔlɔmɔna dia mbika la Jɛrusalɛma, la Lɛbanɔna ndo lo wodja w’otondo wakandolɛka.
7 Lo kɛnɛ kendana l’anto tshɛ wakatshikala oma laka ase Hiti, ase Amɔra, ase Perizi, ase Hivi ndo ase Jɛbusɛ,+ wanɛ waki komonga ase Isariyɛlɛ,+ 8 tokanula tawɔ takatshikala lo wodja, mbuta ate wanɛ waki ase Isariyɛlɛ kombashila oshiki,+ Sɔlɔmɔna akaakitsha dia mbakandjaka elimu la wolo polo ndo ɛlɔ.+ 9 Koko Sɔlɔmɔna kombetɛ kaanga ose Isariyɛlɛ 1 mfumbe dikambo di’olimu ande,+ nɛ dia vɔ waki andɔshi ande wa ta, ewandji w’ewandji w’asɔlayi ande ndo ewandji w’anto ande wakotola pusupusu ndo w’ambahemi wa mfalasa.+ 10 Ewandji 250 wakikɔ dikambo dia topita ta nkumekanga Sɔlɔmɔna, ewandji w’ase olimu.+
11 Sɔlɔmɔna akaye ndo la ɔna Farawɔ la womoto+ oma l’Osomba wa Davidɛ oya lo luudu lakandawokɛ,+ nɛ dia nde akate ate: “Kaanga mbende wadɛmi, nde hahombe mbidjasɛ lo luudu la Davidɛ nkumekanga k’Isariyɛlɛ, nɛ dia ahole wambokoma Ɔshɛtɛ wa Jehowa laawɔ wekɔ ekila.”+
12 Oma laasɔ, Sɔlɔmɔna akalambola Jehowa elambo wa lotshumba+ lo elambwelo+ ka Jehowa kakandasale la ntondo ka tshoto y’otale.+ 13 Nde akayele awui wakasalemaka lushi la lushi ndo akalambola elambo lo ndjela ɛlɛmbɛ wa Mɔsɛ wendana la Sabato,+ towalelo ta ngɔndɔ+ ndo fɛtɛ yakashikikɛma mbala 3 lo ɔnɔnyi,+ mbuta ate Fɛtɛ ka mapa waha la wodoya,+ Fɛtɛ ka mingu+ ndo Fɛtɛ ka totombotombo.*+ 14 Ndo nto, nde akasɔnɛ elui w’ɛlɔmbɛdi+ dikambo di’elimu awɔ lo ndjela didjango dia Davidɛ dia she, ndo ase Lɛwi lo ahole awɔ w’olimu dia tombolaka Nzambi+ ndo dia kambaka la ntondo k’ɛlɔmbɛdi lo ndjela kɛnɛ kakasalemaka lushi la lushi, ndo alami w’asoko lo elui awɔ dikambo di’asoko wotshikitanyi,+ nɛ dia ngasɔ mbakadjanga Davidɛ okambi wa Nzambi ka mɛtɛ. 15 Vɔ kotshika ndjela kɛnɛ kakadjangɛ nkumekanga ɛlɔmbɛdi ndo ase Lɛwi lo oseka dikambo tshɛ ndo lo kɛnɛ kendana la mvudu ya waombelo. 16 Ɔnkɔnɛ, olimu waki Sɔlɔmɔna tshɛ wakakongɛma dimɛna,* oma ko lushi lakawatatɛ nsala etshina ka luudu la Jehowa+ polo lushi lakashile olimu. Ko luudu la Jehowa lakashile.+
17 L’etena kɛsɔ mbakatshu Sɔlɔmɔna otsha la Eziɔna-Ngɛbɛrɛ+ ndo otsha la Elɔtɛ+ lo omamu wa ndjale, lo wodja w’Ɛdɔmɛ.+ 18 Hirama+ akootomɛ masuwa ndo apami weya ashi dimɛna lo tshimbo y’ekambi ande hita. Vɔ wakatshu kaamɛ la ekambi wa Sɔlɔmɔna otsha la Ɔfira+ ndo vɔ wakatoya la talata* 450 ya paonyi+ oma lɛkɔ, ko wakayitɔlɛ nkumekanga Sɔlɔmɔna.+