1 Nkumi ya dikanga
19 Oma laasɔ, Ahaba+ akatɛ Jezabɛlɛ+ kɛnɛ tshɛ kakasale Elidja ndo woho wakandadiake amvutshi tshɛ la lokuwa la ta.+ 2 Ko Jezabɛlɛ akatomɛ Elidja ɔkɛndji ate: “Waa nzambi mbayombisha dilanya dia wolo naka loyi lo wonya wa nganɛ dimi hakosale oko kɛnɛ kakakomɛ onto l’onto* l’atei awɔ!” 3 Ko nde akoke wɔma, akonɛɛ ndo akalawɔ dia nkokɛ lɔsɛnɔ* lande.+ Nde akakome la Bɛrɛ-Shɛba+ k’ase Juda,+ ko akatshike okambi ande laawɔ. 4 Nde akande lɔkɛndɔ la lushi l’otondo l’oswe, akakome ko akadjasɛ l’ɛse k’osongo wa lɔkɔnga, ko nde akalɔmbɛ dia nde* mvɔ. Nde akate ate: “Lambohekɔ! Jehowa le, wonya ɔnɛ, ɔsa lɔsɛnɔ* la mi,+ nɛ dia dimi handeki watshɛmi.”
5 Oma laasɔ, nde aketama ko akalale djɔ l’ɛse k’osongo wa lɔkɔnga. Koko ondjelo ɔmɔtshi akawonanda+ la shashimoya ndo akawotɛ ate: “Etɔ kele lɛka.”+ 6 Lam’akandende, nde akɛnyi mapa w’obolonga suke la ɔtɛ ande laadiko di’ave wa dja ndo mbidika k’ashi. Nde akale, akanɔ ashi ko aketama nto. 7 L’ɔkɔngɔ diko, ondjelo wa Jehowa akaye nto mbala ka 2, akawonanda ko akate ate: “Etɔ kele lɛka, nɛ dia lɔkɛndɔ layonga wolo le yɛ.” 8 Ko nde aketɔ, akale ndo akanɔ, ndo diɛsɛ la wolo wakandakondja oma lo diangɔ dia ndɛ, nde akande lɔkɛndɔ la tanyi 40 ndo etsho 40 polo lam’akandakome la Hɔrɛbɛ, dikona dia Nzambi ka mɛtɛ.+
9 Nde akatɔtɔ lo wooko+ ɔmɔtshi lɛkɔ ko akatolala laawɔ. Ko ɔtɛkɛta wa Jehowa wakaye le nde ndjowotɛ ɔnɛ: “Asalayɛ lanɛ na, Elidja?” 10 Ko nde akate ate: “Dimi lookongaka mɛtɛ la ohetoheto dikambo dia Jehowa Nzambi kanga lolembelembe;+ nɛ dia ase Isariyɛlɛ wambohɛ sheke yayɛ,+ dilambwelo diayɛ diambohandjɔma ndo wakadiake amvutshi ayɛ la lokuwa la ta,+ koko dimi oto kambotshikala. Wonya ɔnɛ, vɔ wekɔ lo nyanga lɔsɛnɔ* lami.”+ 11 Koko Nde akate ate: “Tomba kele emala lo dikona la ntondo ka Jehowa.” Nyolonge, Jehowa akatetaka laawɔ,+ lɔpɛpɛ l’efula ndo la wolo lakatshatshaka akona la ave la ntondo ka Jehowa,+ koko Jehowa komonga lo lɔpɛpɛ. L’ɔkɔngɔ wa lɔpɛpɛ, didimu dia nkɛtɛ diakayala,+ koko Jehowa komonga lo didimu dia nkɛtɛ. 12 L’ɔkɔngɔ wa didimu dia nkɛtɛ, dja yakayala,+ koko Jehowa komonga lo dja. L’ɔkɔngɔ wa dja, dui dia wɔlamu, dia ɔkɔkɛ diakokɛma.+ 13 Kam’akoke Elidja dui diakɔ, nde akafɛ elungi kande la dihɔndɔ diande+ dia omvutshi ko akatombe, ko akayemala la soko dia wooko. Oma laasɔ, dui dimɔtshi diakawombola ɔnɛ: “Asalayɛ lanɛ na, Elidja?” 14 Ko nde akate ate: “Dimi lookongaka mɛtɛ la ohetoheto dikambo dia Jehowa Nzambi kanga lolembelembe; nɛ dia ase Isariyɛlɛ wambohɛ sheke+ yayɛ, dilambwelo diayɛ diambohandjɔma ndo wakadiake amvutshi ayɛ la lokuwa la ta, koko dimi oto kambotshikala. Wonya ɔnɛ, vɔ wekɔ lo nyanga lɔsɛnɔ* lami.”+
15 Jehowa akawotɛ ate: “Kalola, tshɔka l’oswe wa Damasɛkɛ. Lam’ayoyokoma, kokite Hazaɛlɛ+ esɔ dia nde monga nkumekanga ka Suriya. 16 Kokite ndo Jehu+ okana wa Nimishi esɔ dia nde monga nkumekanga k’Isariyɛlɛ; ndo nto, kokite Elisha* ɔna Shafata y’oma la Abɛlɛ-Mehola esɔ dia nde monga omvutshi lo dihole diayɛ.+ 17 Onto tshɛ layohandɔ oma lo lokuwa la ta la Hazaɛlɛ,+ Jehu ayowodiaka.+ Onto tshɛ layohandɔ oma lo lokuwa la ta la Jehu, Elisha ayowodiaka.+ 18 Ndo dimi lekekɔ l’anto nunu esambele (7 000) wambotshikala lo Isariyɛlɛ,+ wanɛ wahatakusɛ Baala adwe+ ndo wanɛ wele enyɔ awɔ watashana la nde bizɛ.”+
19 Ɔnkɔnɛ nde akamɔ oma laawɔ, ko akatotana Elisha ɔna Shafata etena kakandafusaka la elui 12 wa ngɔmbɛ hiende hiende waki la ntondo kande ndo nde aki kaamɛ la olui wa 12. Ko Elidja akatshu dia tohomana la nde ndo akawookɛ dihɔndɔ+ diande dia omvutshi. 20 Ko nde akatshike ngɔmbɛ, akayele Elidja la lowango ndo akate ate: “Lam’alangayɛ, etawɔ dimi tasha papa la mama bizɛ. Oma laasɔ, dimi layokoyela.” Nde akakadimola ate: “Tshɔka, kalola, nɛ dia dimi hankoshimbi.” 21 Ɔnkɔnɛ nde akakalola, akatɔsa ngɔmbɛ 2 ko akayilambola ndo nde akɔshi nkɔhɔ yatowofusaka dia nkatɛ la yɔ nyama, ko akayisha anto ndo vɔ wakale. L’ɔkɔngɔ wa laasɔ, nde akonɛɛ, akayele Elidja ko akatatɛ mbokambɛ.+