2 Ɛkɔndɔ
2 Sɔlɔmɔna akadjanga dia mbika luudu dikambo dia lokombo la Jehowa+ ndo luudu* dikambo dia diolelo diande.+ 2 Sɔlɔmɔna aki l’apami nunu akumi esambele (70 000) waki ase olimu ko ase olimu,* apami nunu akumi enanɛi (80 000) waki ambatshi w’ave lo akona+ ndo emendji awɔ nunu sato la nkama shamalo (3 600).+ 3 Ndo nto, Sɔlɔmɔna akatomɛ Hirama+ nkumekanga ka Tura dui ate: “Onsalee oko wakayasalɛ Davidɛ papa lam’akayootomɛ abaya w’olondo dia mbika luudu* la nde mbidjasɛ.+ 4 Wonya ɔnɛ, dimi loka luudu dikambo dia lokombo la Jehowa Nzambi kami, dia mbokidiɛlɔ, dia tshumbaka tshɔ+ y’opumu la ntondo kande, ndo dia kitshaka mapa wa lahatanya*+ tena tshɛ la elambo wa lotshumba pindju la dikɔlɔ+ lo Sabato,+ lo towalelo ta ngɔndɔ+ ndo lo fɛtɛ ya deko+ dikambo dia Jehowa Nzambi kaso. Ɔsɔ ekɔ didjango dia pondjo le Isariyɛlɛ. 5 Luudu lakami layonga woke, nɛ dia Nzambi kaso ndeka tozambizambi tokina tshɛ woke. 6 Ko akoka mɛmba ɔkɛndɛ wa mbokɛ luudu? Nɛ dia olongo ndo olongo wa la diko di’elongo hawokoke le nde,+ ko dimi eemi katomohomba mbokɛ luudu naka aha mbika dihole dia tshumbaka elambo la ntondo kande? 7 Ɔnkɔnɛ, ontomee otshudi ɔmɔtshi wele la diewo di’efula lo nkamba la paonyi, mfɛsa, nkonga,+ mbolo, eshinga w’ebelabela, eshinga wa beela ka telele, eshinga wa bule ndo leya woho wa nsanga la otshimɔ. Nde ayoyokamba la Juda ndo la Jɛrusalɛma kaamɛ la etshudi ami wele la diewo di’efula wakatasɔnyi Davidɛ papa.+ 8 Ontomee ndo abaya w’olondo, wa dihake+ ndo w’okolongo+ oma la Lɛbanɔna, nɛ dia dimi mbeyaka dimɛna dia ekambi ayɛ wekɔ la diewo dia nkɔta esongo wa la Lɛbanɔna.+ Ekambi ami wayoyokamba kaamɛ la ekambi ayɛ+ 9 dia nɔngɔsɔlɛmi yɛdikɔ y’efula y’abaya, dikambo luudu layangami mbika layonga woke wa mamba. 10 Eenda, dimi layosha ekambi ayɛ,+ ambatshi w’abaya, akɔtshi w’esongo mbo ya ndɛ nyɛ: kɔra* nunu akumi ahende (20 000) y’eponga, kɔra nunu akumi ahende (20 000) y’asami, bata* nunu akumi ahende (20 000) ya wanu ndo bata nunu akumi ahende (20 000) y’esɔ.”
11 Ko Hirama nkumekanga ka Tura akatomɛ Sɔlɔmɔna losango la lofunda lɔnɛ: “Lam’ele Jehowa nangaka wodja ande, nde amboketɛ nkumekanga kawɔ.” 12 Oma laasɔ, Hirama akate ate: “Jehowa Nzambi k’Isariyɛlɛ atombɔme, nde lakatonge olongo la nkɛtɛ, nɛ dia nde ambosha nkumekanga Davidɛ ɔna la lomba,+ lele la shɛnɔdi ndo la yimba+ layanga mbika luudu dikambo dia Jehowa ndo luudu dikambo dia diolelo diande. 13 Dimi layanga kotomɛ Hirama-Abi,+ otshudi wele la diewo di’efula ndo wele la yimba; 14 nde ekɔ ɔnaki womoto ɔmɔtshi l’oseka Danɛ, koko she aki ose Tura. Nde ekɔ la diewo di’efula lo nkamba olimu wa la paonyi, mfɛsa, nkonga, mbolo, ave, abaya, eshinga w’ebelabela, eshinga wa bule, ahɔndɔ w’amɛna efula ndo eshinga wa beela ka telele.+ Nde koka nsala oseka olimu tshɛ wa la otshimɔ ndo nsanga sango tshɛ diɔlɔmbawɔ.+ Nde ayoyokamba kaamɛ la etshudi ayɛ wele la diewo di’efula ndo etshudi wa nkumɛmi Davidɛ shɔ wele la diewo di’efula. 15 Laasɔ nkumɛmi atome eponga, asami, esɔ ndo wanu wakandalake ekambi ande.+ 16 Ko sho tayɔkɔta esongo wa la Lɛbanɔna+ yɛdikɔ tshɛ yeyɛ l’ohomba ndo tayokelawɔ lo mbakeleka ko mbakɛdia lo ndjale polo la Jɔpa,+ kele kotaatɔlɛ polo la Jɛrusalɛma.”+
17 Oma laasɔ, Sɔlɔmɔna akadia apami tshɛ waki angɛndangɛnda lo wodja w’Isariyɛlɛ+ l’ɔkɔngɔ wa wadielo wakasale Davidɛ she,+ ko waki nunu lokama l’akumi atanu la sato la nkama shamalo (153 600). 18 Ɔnkɔnɛ, nde akakonya nunu akumi esambele (70 000) l’atei awɔ ase olimu ko ase olimu,* nunu akumi enanɛi (80 000) ambatshi w’ave+ lo akona, ndo nunu sato la nkama shamalo (3 600) emendji wakakandjaka anto olimu.+