Etsha
24 L’ɔkɔngɔ wa nshi 5, ɔlɔmbɛdi a laadiko Ananiya+ akaye kaamɛ la dikumanyi dimɔtshi ndo la Tɛrɛtulo laki ɔtɛkɛtshi wa lo sɛkɛ,* ko wakayofunda Pɔɔlɔ le nguvɛrnɛrɛ.+ 2 Lam’akawasha Tɛrɛtulo ɔtɛkɛta, nde akatatɛ mbofunda ate:
“Wɛ owandji, lam’ele tekɔ la wɔladi w’efula oma le yɛ ndo etshikitanu wekɔ lo salema lo wodja ɔnɛ oma lo woho wakongɛyɛ akambo la ntondo, 3 wonya tshɛ ndo l’ahole tshɛ sho mbeyaka akambo asɔ ndo tekɔ la lowando l’efula. 4 Dimi haakombola kɔsɛ wenya efula, koko lambokɔlɔmba oma lo ɔlɔlɔ ayɛ w’otema dia wɛ tohokamɛ yema. 5 Nɛ dia sho takɛnyi dia pami kɛnɛ ekɔ ɛngɔ ka kɔlɔ*+ ndo ekɔ lo ntɔmbɔsha+ ase Juda tshɛ wa lo nkɛtɛ k’otondo ndo nde kele ɔnɔmbɔdi wa yaato y’ɔtɛmwɛlɔ y’ase Nazarɛtɛ.+ 6 Ndo nto, nde akahembe mbidja tɛmpɛlɔ mindo, ko takawonde.+ 7* —— 8 Naka wɛ mbombola ndamɛ, wɛ ayɛna dia akambo tshɛ woofundaso wekɔ mɛtɛ.”
9 Ko ase Juda vɔ lawɔ wakɔsɔngwɛ, washikikɛ dia akambo asɔ wekɔ mɛtɛ. 10 Lam’akɛnya nguvɛrnɛrɛ l’anya dia Pɔɔlɔ ntɛkɛta, nde akate ate:
“Lam’ele dimi mbeyaka dia wodja ɔnɛ wambokɔsɔnɔla oko shushi aya ɛnɔnyi efula, dimi lekɔ l’ɔngɛnɔngɛnɔ dia ndjaswɛ+ l’akambo asɔ. 11 Oko wakokayɛ nshikikɛ wɛmɛ, atalekana nshi 12 ntatɛ lam’akamatshu dia tɔtɛmɔla la Jɛrusalɛma,+ 12 vɔ kotanami lo tɛmpɛlɔ ladjana taamu l’onto kana latshumanya olui w’anto oyadi lo toshinangɔnga kana l’osomba. 13 Ndo vɔ hawokoke koshikikɛ dia akambo wafundawɔ wonya ɔnɛ asɔ wekɔ mɛtɛ. 14 Koko, dikambo ɔtɔi nɛ mbasuyami la ntondo kayɛ, dia lo ndjela mboka ketawɔ vate yaato y’ɔtɛmwɛlɔ, lo yoho shɔ mbakambɛmi Nzambi ka watshɛso olimu w’ekila,+ lele la mbetawɔ lo akambo tshɛ wotami lo Ɛlɛmbɛ ndo wofundami lo Amvutshi.+ 15 Ndo dimi lekɔ l’elongamelo le Nzambi oko wele anto anɛ la elongamelo dia eolwelo+ k’anto w’ɛlɔlɔ ndo k’anto wa kɔlɔ kayoyala.+ 16 Diakɔ diele dimi mbidjaka welo nshi tshɛ dia monga la nkum’otema ka pudipudi* la ntondo ka Nzambi ndo la ntondo k’anto.+ 17 Ɔnkɔnɛ, l’ɔkɔngɔ w’ɛnɔnyi ɛmɔtshi, dimi lakakome la Jɛrusalɛma dia ndjosha wodja ami weshasha wa kɛtshi+ ndo dia ndjolambola Nzambi elambo. 18 Lam’akamasalaka akambo asɔ, vɔ wakatane layaɛdia lo tɛmpɛlɔ+ lo ndjela ɛlɛmbɛ, aha l’olui w’anto ndo aha la lofunge. Koko ase Juda amɔtshi w’oma lo prɔvɛnsɛ ka Aziya waki laawɔ. 19 Otondongaka vɔ wakatane la dikambo dimɔtshi dia kɔlɔ, tshike vɔ wotoya la ntondo kayɛ dia ndjofunda.+ 20 Kana anto wele lanɛ wate kɔlɔ kakawatane le mi etena kakamemala la ntondo k’ase tominadi ta laadiko t’ase Juda, 21 onyake kɛnɛ kakamate la dui dia wolo lam’akamemala l’atei awɔ nte: ‘Lo dikambo dia eolwelo ka wanɛ wavɔ kalomboshamami la ntondo kanyu!’”+
22 Koko lam’ele Feliksɛ akeyaka dimɛna akambo wendana la Mboka kɛnɛ,+ nde akahandjola anto ndo akate ate: “Lam’ayoya Lusiya kɔmanda k’asɔlayi, dimi layoyɔsa yɛdikɔ lo dikambo dianyu.” 23 Ko nde akatɛ owandji w’asɔlayi dia nama Pɔɔlɔ ndo mbosha yema ya lotshungɔ ndo diaha vɔ nshimba anto ande dia vɔ mbokimanyiya.
24 Nshi mɔtshi l’ɔkɔngɔ wa laasɔ, Feliksɛ akaye nde la wadɛnde Drusila laki ose Juda, ko nde akelɛ Pɔɔlɔ ndo akawombola lo kɛnɛ kendana la dietawɔ diande le Kristo Yeso.+ 25 Koko lam’akatatɛ Pɔɔlɔ ntɛkɛta dikambo dia losembwe, dia ndjakimɛ ndo dia kilombo kayaye,+ Feliksɛ akoke wɔma ndo akate ate: “Kakianɛ tshɔka, koko lam’ayomotana diaaso, layokelɛ nto.” 26 L’etena kakɔ kaamɛ, nde akalongamɛka dia Pɔɔlɔ mbosha falanga. Diakɔ diele nde akawelɛka mbala ko mbala ndo akasawolaka la nde. 27 Lam’akete ɛnɔnyi 2, Pɔrkiyo Fɛsto akahɛnɛ Feliksɛ ndo lam’ele Feliksɛ akalangaka ngɛnyangɛnya ase Juda,+ nde akatshike Pɔɔlɔ lo lokanu.