Luka

22 Fɛtɛ ka mapa waha la wodoya kelɛwɔ ɔnɛ dambo di’Elekanelo+ kaki suke la nkoka.+ 2 Ndo ewandji w’ɛlɔmbɛdi la afundji wakayangaka diaaso dia dimɛna dia ndjaka Yeso,+ koko vɔ wakokaka anto wɔma.+ 3 Ko Satana akɔtɔ l’otema wa Judasɛ lakawelɛka Iskariyɔtɛ, ɔtɔi ɔmɔtshi wa l’atei w’apɔstɔlɔ ande 12,+ 4 ko nde akatshu, akatosawola la ewandji w’ɛlɔmbɛdi kaamɛ la ɛnɔmbɔdi w’alami wa lo tɛmpɛlɔ lo kɛnɛ kendana la woho wa nde mfunga Yeso le wɔ.+ 5 Vɔ wakangɛnangɛna ndo waketawɔ dia mbosha falanga ya mfɛsa.+ 6 Ko nde aketawɔ ndo akatatɛ nyanga diaaso dia dimɛna dia mbofunga le wɔ aha la olui w’anto monga laawɔ.

7 Lushi la ntondo la Mapa waha la wodoya lakawalambolaka+ olambo w’Elekanelo lakakoke, 8 ko Yeso akatome Petero la Joani ate: “Nyotshu nyotɔlɔngɔsɔlɛ dihole dia sho ndjɔlɛ+ dambo di’Elekanelo.” 9 Vɔ wakawombola vate: “Lende alangayɛ sho todilɔngɔsɔla?” 10 Nde akawatɛ ate: “Nyolonge, lam’ayonyɔtɔ l’osomba, nyayohomana la pami kɛmɔtshi ayɛmbɛ mbaka k’ashi. Kanyooyele polo lo luudu layondɔtɔ.+ 11 Kanyote kanga luudu lakɔ nyate: ‘Ombetsha kata ate: “Lende ele luudu la angɛndangɛnda lakokami ndɛ dambo di’Elekanelo la ambeki ami?”’ 12 Ko nde ayonyɛnya luudu la woke la la diko lele la diangɔ. Kanyodilɔngɔsɔlɛ lɔkɔ.” 13 Vɔ wakatshu ko wakatotana paka oko wakandawatɛ, ko vɔ wakalɔngɔsɔla dambo di’Elekanelo.

14 Lam’akakoke wonya, nde la apɔstɔlɔ+ ande wakadjasɛ la mɛsa. 15 Ko nde akawatɛ ate: “Lakakombolaka efula dia ndɛ dambo di’Elekanelo nɛ kaamɛ la nyu la ntondo ka dimi soyama; 16 nɛ dia lambonyotɛ nte, dimi hantɔlɛ dambo nɛ nto polo ndo lam’ayokotshama akambo tshɛ lo Diolelo dia Nzambi.” 17 Nde akɔshi dikɔhɔ, akoke losaka ndo akate ate: “Nyɔshi ndo nyetshetsha le onto l’onto lam’asanyu, 18 nɛ dia lambonyotɛ nte, ntatɛ oma ko kakianɛ, dimi hantɔnɔ vinyɔ nyɛ nto polo ndo lam’ayoya Diolelo dia Nzambi.”

19 Ndo nto, nde akɔshi mapa,+ akasha losaka, akoohembola ko akawasha, ata ate: “Mapa ɔnɛ wekɔ didjidji dia demba diami+ diayanga kimɔma dikambo dianyu.+ Kanyotshake ɔnkɔnɛ dia mbohɔkami.”+ 20 Ndo nto, l’ɔkɔngɔ wa vɔ ndɛ mma dia dikɔlɔ, nde akɔshi dikɔhɔ, ko akate ate: “Dikɔhɔ nɛ nembetshiyaka sheke+ y’oyoyo yambodjama l’ekimanyielo ka dikila+ diami diayotshulɔma lo wahɔ anyu.+

21 “Koko nyolonge, lonya laki ofungi ami lekɔ kaamɛ la mi la mɛsa.+ 22 Nɛ dia lo mɛtɛ, Ɔna onto ayanga minyɛma oko wakadiatama,+ koko mananu le ɔnɛ layowofunga!”+ 23 Ko vɔ wakatatɛ mimbɔna lam’asawɔ dia mbeya akɔna mɛtɛ l’atei awɔ akakoke nsala dikambo sɔ.+

24 Koko owanu wa wolo wakonge lam’asawɔ dia mbeya ɔnɛ loleki woke+ l’atei awɔ. 25 Ko nde akawatɛ ate: “Nkumi ya dikanga ya wedja mbahemɛka anto awɔ ndo anto wele la lowandji le wɔ mbelamɛka ɔnɛ: Atshi w’akambo w’ɛlɔlɔ.+ 26 Koko nyu hanyohombe monga ngasɔ.+ Ɔnɛ loleki woke l’atei anyu ayale oko ɔnɛ loleki dikɛnda+ ndo ɔnɛ lele oko owandji ayale oko okambi. 27 Nɛ dia lam’asa ɔnɛ lalɛ* la ɔnɛ lawokitshɛ diangɔ la mɛsa,* akɔna oleki woke? Shi ɔnɛ lalɛ?* Koko dimi lekɔ l’atei anyu oko onto lanyokitshɛ diangɔ la mɛsa.*+

28 “Koko, nyu mbele wanɛ wambotetemala ntshikala kaamɛ la mi+ lo ehemba ami;+ 29 dimi lambodja la nyu sheke oko wakadje Papa la mi sheke dikambo dia diolelo,+ 30 dia nyu ndɛ ndo nnɔ lo mɛsa ami lo Diolelo+ diami ndo mbidjasɛ lo kiti ya lowandji+ dia nombosha waoho 12 w’Isariyɛlɛ.+

31 “Simɔna, Simɔna, hokamɛ! Satana akalɔmbi dia nyofufola nyu tshɛ oko eponga.+ 32 Koko lakalɔmbi dikambo diayɛ, diaha wɛ nshisha mbetawɔ kayɛ+ ndo lam’ayoyokalola, kokeketsha ananyɔ.”+ 33 Oma laasɔ, Petero akawotɛ ate: “Nkumadiɔndjɔ, dimi lekɔ suke dia ntshɔ la yɛ lo lokanu ndo lo nyɔi.”+ 34 Koko Yeso akawotɛ ate: “Petero, dimi lambokotɛ nte, ɛlɔ, la ntondo ka nkɔkɔ mbeka, wɛ ayanguna mbala 3+ dia wɛ hambeye.”

35 Yeso akawatɛ nto ate: “Lam’akamanyotome aha la tshapatapa ya falanga ndo tapa dia mbo ya ndɛ la sabata+ nkina, onde nyakahombe ɛngɔ?” Vɔ wakate vate: “Keema!” 36 Ko nde akawatɛ ate: “Kakianɛ, onto lele la tshapatapa ya falanga ayɔsɛ, onto lele la tapa dia mbo ya ndɛ, adiɔsɛ ndo onto lele bu la lokuwa, asondja dihɔndɔ diande dia laadiko ndo alisombe. 37 Nɛ dia dimi lambonyotɛ nte, akambo wakafundama ɔnɛ: ‘Wakawadia l’ɔnɔngɔ w’amɔnyɔdi w’ɛlɛmbɛ’+ pombaka kotshama. Nɛ dia akambo wendana la mi+ wekɔ lo kotshama.” 38 Ko vɔ wakate vate: “Nkumadiɔndjɔ, enda tekɔ la tokuwa 2 lanɛ!” Nde akawatɛ ate: “Efula kɛsɔ.”

39 Lam’akawatombe, nde akatshu oko waki mbekelo kande otsha lo Dikona di’esongo w’Ɔlivɛ ndo ambeki ande wakooyele.+ 40 Lam’akawakome lɛkɔ, nde akawatɛ ate: “Nyɔlɔmbake diaha nyu nkɔ l’ehemba.”+ 41 Ko nde akatshu tshalola y’onto mboka lɔwɔkɔ, akake adwe ndo akatatɛ nɔmba, 42 ata ate: “Papa, naka wɛ nangaka, ominye dikɔhɔ nɛ. Kele aha oko walangami, koko lolango layɛ latshame.”+ 43 Oma laasɔ, ondjelo ɔmɔtshi w’oma l’olongo akɛnama le nde ndo akookeketsha.+ 44 Koko lam’ele nde aki la lɔkɔnyɔ l’efula, nde akanyomoleka nɔmba la etete;+ ko dungu diande diakayala oko apɔpɔ wa dikila mbakɔ la nkɛtɛ. 45 Lam’akandashidiya nɔmba, nde akemala ndo akatshu otsha le ambeki ande, ko akaatane woladi djɔ, nɛ dia wakalɛmbɛ efula l’ɔtɛ wa lɔkɔnyɔ+ laki la wɔ. 46 Nde akawatɛ ate: “Lande na kalalanyu djɔ? Nyemɔ ndo nyotetemale nɔmba diaha nyu nkɔ l’ehemba.”+

47 Oshimu kele edja, nyolonge, olui w’anto kaamɛ la ɔnɛ lakawelɛka Judasɛ, ɔmɔtshi l’atei w’apɔstɔlɔ 12 akayawalɔmbɔlaka ndo nde akasukana la Yeso dia mbosha bizɛ.+ 48 Koko Yeso akawotɛ ate: “Judasɛ, wɛ ambofunga Ɔna onto lo mbosha bizɛ?” 49 Lam’akɛnyi wanɛ waki kaamɛ la Yeso kɛnɛ kaki suke la salema, vɔ wakate vate: “Nkumadiɔndjɔ, towake tokuwa?” 50 Ɔmɔtshi la l’atei awɔ akakɔtɛ ose olimu wa ɔlɔmbɛdi a laadiko lokuwa ndo akoohembola toyi dia lonya l’omi.+ 51 Koko Yeso akate ate: “Ambokoka.” Nde akananda toyi diakɔ, ko nde akɔɔkɔnɔla. 52 Oma laasɔ, Yeso akatɛ ewandji w’ɛlɔmbɛdi la ɛnɔmbɔdi w’alami wa tɛmpɛlɔ ndo dikumanyi diakaye ndjowonda ate: “Onde nyu nyamboya la tokuwa ta ta ndo la tokalemba oko anto walanga minda ɔpɔtwanyi?+ 53 Dimi laki kaamɛ la nyu lushi la lushi+ lo tɛmpɛlɔ, nyu komindami,+ koko ɔnɛ ekɔ wonya anyu ndo lowandji la wodjima.”+

54 Ko vɔ wakawonde, wakatshu la nde+ ndo wakatowodja lo luudu la ɔlɔmbɛdi a laadiko, koko Petero akayawoyelaka lo tshalola.+ 55 Lam’akawahɛtsha dja l’atei wa sɛkɛ dia lokombo ndo lam’akadjasɛ anto kaamɛ, Petero akadjasɛ l’atei awɔ.+ 56 Ko ose olimu ɔmɔtshi wa womoto akawɛnyi odjashi lo osase wa dja, nde akooshishima ndo akate ate: “Ndo pami kɛnɛ aki kaamɛ la nde.” 57 Koko nde akanguna, ata ate: “Womoto, dimi haaweye.” 58 L’ɔkɔngɔ wa tshanda mɔtshi, onto okina akawɛnyi ndo akate ate: “Wɛ lawɔ ekɔ ɔmɔtshi la l’atei awɔ.” Koko Petero akate ate: “Pami, keema.”+ 59 Ndo l’ɔkɔngɔ wa yɛdikɔ yele oko wonya wa ntango, pami kekina nto akashikikɛ la wolo tshɛ ate: “Lo mɛtɛ, ndo pami kɛnɛ aki kaamɛ la nde, nɛ dia nde ekɔ ose Ngalileya!” 60 Koko Petero akate ate: “Pami, dimi haleye kɛnɛ katayɛ.” Ko mbala kakɔ ɔtɔi, kam’akandatɛkɛtaka, nkɔkɔ kakeke. 61 Nkumadiɔndjɔ akakadimɔ ndo akende Petero, ko Petero akohɔ ɛtɛkɛta wakawotɛ Nkumadiɔndjɔ ate: “Ɛlɔ, la ntondo ka nkɔkɔ mbeka, wɛ ayomanguna mbala 3.”+ 62 Ko nde akatombe l’andja ndo akalele efula.

63 Wanɛ wakande Yeso wakatatɛ mbɔsɔka+ ndo mbɔkɔmɔla;+ 64 ndo l’ɔkɔngɔ wa vɔ mbofɛ elungi, vɔ wakawombola vate: “Naka wɛ ekɔ omvutshi, otote okɔkɔmɔdi?” 65 Ko vɔ wakate akambo akina efula wa lɔtɛngɔ lo lokombo lande.

66 Lam’akahotɔ wonya, dikumanyi, ewandji w’ɛlɔmbɛdi la afundji wakasangana+ ndo wakɔɔtɔlɛ lo luudu lawɔ la tominadi ta laadiko t’ase Juda, wata vate: 67 “Otote+ kana wɛ kele Kristo.” Koko nde akawatɛ ate: “Oyadi kaanga dimi konyotɛka, hanyotetawɔ. 68 Ndo naka dimi nyoka dimbola, hanyotokadimola. 69 Koko oma ko kakianɛ, Ɔna onto+ ayodjasɛ lo lonya l’omi la wolo laki Nzambi.”+ 70 Ko vɔ tshɛ wakate vate: “Laasɔ wɛ ekɔ Ɔna Nzambi?” Nde akawatɛ ate: “Nyuamɛ asɔ wadita, dimi kele nde.” 71 Vɔ wakate vate: “Kakɔna kaakatayange nto? Shoamɛ tamboka oma l’onyɔ+ ande ndamɛ.”