Danyɛlɛ
2 Lo ɔnɔnyi wa 2 wa lowandji lande, Nɛbukadinɛza akɛnyi alɔ efula, ndo nde* akatshimbaka wɔɔngɔ+ efula polo ndo nde kokoka ndala djɔ. 2 Ko nkumekanga akadjanga dia vɔ mbelɛ ɛlɔmbɛdi wakasalaka awui wa maji, asaki w’awolo, akanga w’alɔka ndo ase Kaladiya* dia ndjotɛ nkumekanga alɔ ande. Ko vɔ wakaye ndo wakemala la ntondo ka nkumekanga.+ 3 Ko nkumekanga akawatɛ ate: “Dimi lakɛnyi dɔ ndo dimi* lambohandjɔ wɔɔngɔ nɛ dia dimi nangaka mbeya kɛnɛ kakamɛnyi lo dɔ.” 4 Ase Kaladiya wakakadimola nkumekanga lo Arameyɛ*+ vate: “Nkumekanga le, olombake pondjo. Kɔndɔlɛ ekambi ayɛ dɔ diakɔ ko sho tayokotɛ kitshimudi yadiɔ.”
5 Nkumekanga akakadimola ase Kaladiya ate: “Ɔtɛkɛta ami w’ekomelo vɔ ɔnɛ: Naka hanyombewoyisha dɔ diakɔ kaamɛ la kitshimudi yadiɔ, layonyohembola anya la ekolo ndo layetɛ mvudu yanyu nkomba y’anto tshɛ. 6 Ko naka nyu mbutɛmi dɔ diakɔ la kitshimudi yadiɔ, kete nyayolongola oma le mi weshasha ndo difuto ndo kɛnɛmɔ+ k’efula. Ɔnkɔnɛ nyombute dɔ diakɔ la kitshimudi yadiɔ.”
7 Vɔ wakookadimola mbala ka 2 vate: “Nkumekanga akɔndɔlɛ ekambi ande dɔ diakɔ ko sho tayota kitshimudi yadiɔ.”
8 Nkumekanga akakadimola ate: “Dimi mbeyaka dimɛna dia nyekɔ lo nyanga dia nkondja etena, nɛ dia nyu mbeyaka ɔtɛkɛta ami w’ekomelo. 9 Naka hanyombewoyisha dɔ diakɔ, dilanya 1 mbanyokongɛ nyu tshɛ. Koko nyu nyaketawɔ dia mbutɛmi kashi ndo lokeso edja ndo lam’ayotshikitana akambo. Ɔnkɔnɛ nyombute dɔ diakɔ kele kambeye dia nyayokoka nembetshiyami kitshimudi yadiɔ.”
10 Ase Kaladiya wakakadimola nkumekanga vate: “Ndooko onto lele lanɛ la nkɛtɛ* lele la akoka wa nsala kɛnɛ kalɔmba nkumekanga, nɛ dia ndooko nkumekanga ka woke kana nguvɛrnɛrɛ kakalɔmbɛ dui dia ngasɔ le onto ɔmɔtshi lasala awui wa maji kana osaki w’awolo kana ose Kaladiya. 11 Kɛnɛ kalɔmba nkumekanga kekɔ wolo ndo ndooko onto latanema lakoka mbutɛ nkumekanga dui sɔ onyake waa nzambi, wanɛ wahadjasɛ kaamɛ l’anto wokovɔ.”*
12 Ko nkumekanga akadunganɛ la nkɛlɛ ka wolo ndo akasha didjango dia ndjaka ase tomba tshɛ wa la Babilɔna.+ 13 Lam’akadjangema didjango sɔ ndo lam’aki ase tomba suke la ndjakema, vɔ wakayange ndo Danyɛlɛ l’asekande dia mbadiaka.
14 Etena kɛsɔ, Danyɛlɛ akasawola la kɛsɔ ndo la yewo tshɛ nde la Ariyɔkɛ owandji w’alami wa nkumekanga lakatshu dia todiaka ase tomba wa la Babilɔna. 15 Nde akambola Ariyɔkɛ ɔlɔhɛ wa nkumekanga ate: “Lande na didjango dia wolo dia ngasɔ oma le nkumekanga?” Ko Ariyɔkɛ akatɛ Danyɛlɛ dikambo+ diakɔ. 16 Ko Danyɛlɛ akɔtɔ ndo akalɔmbɛ nkumekanga dia nde mbosha etena dia nde ndjotɛ nkumekanga kitshimudi.
17 Oma laasɔ, Danyɛlɛ akatshu lo luudu lande ndo akatewoya Hananiya, Mishaɛlɛ ndo Azariya w’asekande dikambo sɔ. 18 Nde akawatɛ dia nɔmba kɛtshi oma le Nzambi ka l’olongo lo kɛnɛ kendana la sheke shɔ, diaha Danyɛlɛ l’asekande ndjakema kaamɛ la ase tomba akina wa la Babilɔna.
19 Ko wakasholɛ Danyɛlɛ sheke yakɔ lo ɛnɛlɔ l’otsho.+ Ɔnkɔnɛ Danyɛlɛ akatombola Nzambi ka l’olongo. 20 Danyɛlɛ akate ate:
“Lokombo la Nzambi latombɔmake pondjo pondjo,
Nɛ dia nde ndamɛ+ kele la lomba ndo la wolo.
21 Nde tshikitanyaka tena la deko,+
Nde minyaka nkumi ya dikanga ndo mbidjaka nkumi ya dikanga,+
Nde mbishaka lomba le akanga wa lomba ndo ewo le wanɛ wele la shɛnɔdi.+
22 Nde mbisholaka akambo wa lotshimola ndo akambo woshɛmi,+
Nde mbeyaka kɛnɛ kele lo wodjima,+
Ndo le nde mbadjasɛ+ osase.
23 Nzambi ka watshɛmi le, wɛ kashami losaka ndo lotombo,
Nɛ dia wɛ ambombisha lomba ndo wolo.
Ndo wɛ ambombewoya kɛnɛ kakatakɔlɔmbɛ;
Wɛ ambotewoya kɛnɛ kayakiyanya nkumekanga.”+
24 Oma laasɔ, Danyɛlɛ akɔtɔ le Ariyɔkɛ, ɔnɛ lele nkumekanga akɔɔsɔnɛ dia ndjaka ase tomba wa la Babilɔna,+ ko nde akawotɛ ate: “Todiakake ndooko ose lomba la la Babilɔna. Ɔntɔlɛ la ntondo ka nkumekanga kele tote nkumekanga kitshimudi yakɔ.”
25 Ariyɔkɛ akatɔlɛ Danyɛlɛ esadi esadi la ntondo ka nkumekanga ndo akawotɛ ate: “Dimi lambotana onto ɔmɔtshi l’oma la Juda+ lakaye lo lɔhɔmbɔ lakoka mbutɛ nkumekanga kitshimudi.” 26 Nkumekanga akambola Danyɛlɛ lelamɛ ɔnɛ Bɛlɛtɛshaza+ ate: “Onde mɛtɛ wɛ kokaka mbutɛmi dɔ diakamɛnyi ndo kitshimudi+ yadiɔ?” 27 Danyɛlɛ akakadimola nkumekanga ate: “Ndooko ose lomba kana osaki w’awolo kana ɔlɔmbɛdi wasala awui wa maji kana ombeyi w’akambo wa tɔɔtɔ lakoka mbutɛ nkumekanga sheke yambolande.+ 28 Koko ekɔ Nzambi kɛmɔtshi l’olongo kele Ombishodi wa toseke,+ ndo nde ambewoya nkumekanga Nɛbukadinɛza kɛnɛ kayohomba salema lo etena k’ekomelo ka nshi. Dɔ diayɛ diɔ nɛ, ndo waɛnɛlɔ waki lo ɔtɛ ayɛ etena kakayetama lo mbeto kayɛ vɔ anɛ:
29 “Nkumekanga le, etena kakiyɛ lo mbeto kayɛ tokanyi tayɛ takakadimɔ lo kɛnɛ kayohomba salema lo nshi yayaye, ndo Ombishodi wa toseke ambokewoya kɛnɛ kayohomba salema. 30 Sheke nyɛ kombishɔma le mi l’ɔtɛ w’ɔnɛ dimi lekɔ la lomba efula ndeka onto okina tshɛ lasɛna; koko aki dia mbewoya nkumekanga kitshimudi dia wɛ mbeya tokanyi ta lo otema ayɛ.+
31 “Nkumekanga le, wɛ akendaka ko wɛ akɛnyi lohingu* la woke. Lohingu lakɔ laki shaka ndo ngaingai ka mamba, lakemala la ntondo kayɛ, ndo ɛnamelo kalɔ kakokiyaka wɔma. 32 Ɔtɛ wa lohingu lakɔ wakasalema la paonyi+ ka pudipudi, ntolo kalɔ ndo anya alɔ la mfɛsa,+ dikundju dialɔ ndo pɛlɔhɛlɔ dialɔ la nkonga,+ 33 ekolo alɔ la lowolo,+ ndo akaka alɔ waki yema lowolo ndo yema diwomba.*+ 34 Wɛ akendaka polo lam’akahanɔ dive dimɔtshi, aha la anya w’onto, ko diɔ diakakɔmɔla lohingu lakɔ lo akaka alɔ wa lowolo la diwomba ko diakaatɛtshatɛtsha.+ 35 L’etena kɛsɔ, lowolo, diwomba, nkonga, mfɛsa ndo paonyi, diɔ tshɛ diakatɛtshatɛtshama ndo diakayala oko fufudi y’oma lo dihole di’esuswelo lo nshi y’ɔwɔ, ko lɔpɛpɛ lakadiɛmbɛ woho wele diɔ kokoka tanema nto. Koko dive diakakɔmama lo lohingu lakɔ diakayala dikona dia woke, ndo diɔ diakalole lo nkɛtɛ k’otondo.
36 “Ɔsɔ kele dɔ diakɔ ndo tayanga mbutɛ nkumekanga kitshimudi yadiɔ. 37 Nkumekanga le, wɛ nkumekanga ka nkumi ya dikanga ɔnɛ lele Nzambi ka l’olongo akawosha diolelo,+ nkudu, wolo ndo lotombo, 38 ndo ɔnɛ lakandakimɔ anto wadjasɛ ahole tshɛ lo anya ande, mbidja ndo nyama ya l’okonda la tofudu ta l’olongo, ndo ɔnɛ lakandetɛ omboledi awɔ vɔ tshɛ,+ wɛmɛ kele ɔtɛ wa paonyi.+
39 “Koko l’ɔkɔngɔ ayɛ, diolelo dikina diayotomba+ diele l’ɛse kayɛ; oma laasɔ, diolelo dikina dia 3, dia nkonga diayolɛ nkɛtɛ+ k’otondo.
40 “Diolelo dia 4, diayonga wolo oko lowolo.+ Nɛ dia oko watɔtɛtshatɛtshaka ndo watatshatshaka lowolo ɛngɔ kekina tshɛ, ɛɛ, oko lowolo lahandjola, diɔ diayɔtɛtshatɛtsha ndo diayohandjola wasɔ tshɛ.+
41 “Ndo oko wakayɛnyi akaka la mpita ya l’ekolo yema diwomba ndo yema lowolo, diolelo diayokakitɔna, koko yema ya wolo wa lowolo yayonga lɔkɔ, oko wakayɛnyi dia lowolo sanganyema la diwomba dia wɔdu. 42 Ndo oko waki mpita ya l’ekolo yema lowolo yema diwomba, diolelo diakɔ diayonga yema wolo yema wɔdu. 43 Oko wakayɛnyi dia lowolo sanganyema la diwomba dia wɔdu, vɔ wayosanganyema la anto;* koko vɔ hawotokakatanyema lam’asawɔ, woho wahakakatanyema lowolo la diwomba.
44 “Lo nshi ya nkumi ya dikanga yakɔ, Nzambi ka l’olongo ayotondja Diolelo+ diahalanyemaki+ pondjo. Diolelo diakɔ hadiotoshama le anto akina.+ Diɔ diayominola waolelo+ akɔ tshɛ ndo diayowashila oshiki, ko diɔ diɔamɛ diayotshikala pondjo,+ 45 oko wakayɛnyi dia dive dimɔtshi diakahanɔ oma lo dikona aha la anya w’onto, ko diɔ diakatɛtshatɛtsha lowolo, nkonga, diwomba, mfɛsa ndo paonyi.+ Nzambi ka Woke ambewoya nkumekanga kɛnɛ kayosalema lo nshi yayaye.+ Dɔ diakɔ diekɔ mɛtɛ ndo kitshimudi yadiɔ kokaka mbɛkɛ otema.”
46 Ko nkumekanga Nɛbukadinɛza akayakɔsha ekukumadi la ntondo ka Danyɛlɛ ndo akawosha kɛnɛmɔ. Nde akadjanga dia mbolambola woshasha ndo tshɔ. 47 Nkumekanga akatɛ Danyɛlɛ ate: “Lo mɛtɛ Nzambi kayɛ ekɔ Nzambi ka waa nzambi ndo Nkumi ka nkumi ya dikanga ndo Ombishodi wa toseke, nɛ dia wɛ aki la akoka wa mbishola sheke+ nyɛ.” 48 Ko nkumekanga akadiya Danyɛlɛ ndo akawosha weshasha efula w’amɛna, ndo nde akawetɛ omboledi wa prɔvɛnsɛ k’otondo ka Babilɔna+ ndo prefɛ ka laadiko kenda ase tomba tshɛ wa la Babilɔna. 49 Lo ndjela kɛnɛ kakalɔmbɛ Danyɛlɛ, nkumekanga akasɔnɛ Shadrakɛ, Meshakɛ ndo Abɛdɛ-Nɛngɔ+ ewandji w’elimu wa lo prɔvɛnsɛ ka Babilɔna, koko Danyɛlɛ akakambaka laka nkumekanga.