Ɛnyɛlɔ
6 Lam’akadihola Ɔna Ɔkɔkɔ+ odihɔ ɔmɔtshi wa l’edihɔ 7,+ dimi lakɛnyi ndo lakoke etongami kɛmɔtshi l’atei wa ditongami 4 diasɛna+ ata la dui diele oko dikungola ate: “Yaka!” 2 Ko dimi lakɛnyi, nyolonge mfalasa ka wɛma+ ndo ɔnɛ lakakiahema aki la ota ndo wakawosha dɛmbɔ dia nkoso,+ ko nde akatshu, atalɛndja ndo dia toshidiya ɔlɛndjɛlɔ ande.+
3 Lam’akandadihola odihɔ wa 2, dimi lakoke etongami kasɛna+ ka 2 kata ate: “Yaka!” 4 Mfalasa kekina ka beela oko dja kakatombe. Wakasha ɔnɛ lakakiahema lotshungɔ la minya wɔladi oma la nkɛtɛ di’anto ndjakana lam’asawɔ, ndo wakawosha lokuwa la woke la ta.+
5 Lam’akandadihola odihɔ wa 3,+ dimi lakoke etongami kasɛna+ ka 3 kata ate: “Yaka!” Ko dimi lakende, mɛnyi ko mfalasa k’odima ndo ɔnɛ lakakiahema aki la kilɔ lo lonya lande. 6 Lakoke wondjo wele oko dui l’atei wa ditongami 4 diasɛna diata ɔnɛ: “Karɛtɛ* k’eponga aya dɛnariyo*+ 1 ndo karɛtɛ 3 y’asami dɛnariyo 1 ndo tolanyake esɔ k’ɔlivɛ ndo wanu.”+
7 Lam’akandadihola odihɔ wa 4, dimi lakoke dui di’etongami kasɛna+ ka 4 diata ate: “Yaka!” 8 Ko dimi lakende, mɛnyi ko mfalasa k’ɛkɛsɛkɛsɛ. Lokombo la ɔnɛ lakakiahema laki Nyɔi. Ndo Diombo* diakayawoyelaka. Wakawasha lowandji la mbolɛ k’anɛi ɔtɔi ka nkɛtɛ, dia ndjaka anto la lokuwa la ta l’otale ndo la ndjala ya kasha+ ndo la hemɔ yadiaka ndo la nyama ya ngala ya la nkɛtɛ.+
9 Lam’akandadihola odihɔ wa 5, dimi lakɛnyi l’ɛse k’elambwelo,+ anima*+ wa wanɛ wakadiakema l’ɔtɛ w’ɔtɛkɛta wa Nzambi ndo l’ɔtɛ wakawasambisha.+ 10 Vɔ wakawelɛka la dui dia wolo, wata vate: “Nkum’Olongo Nkumadiɔndjɔ k’ekila ndo ka mɛtɛ+ le, polo l’etena kakɔna kayoyokonga dia nombosha ndo nsɔmbɔya akila aso le wanɛ wodjashi la nkɛtɛ?”+ 11 Ko wakawasha onto l’onto+ okutu wa wɛma ndo wakawatɛ dia vɔ nyomomuya yema nto edja ndo lam’ayokoka lofulo l’asekawɔ ekambi ndo anangɛwɔ waki suke la ndjakema oko wakawadiakema.+
12 Dimi lakɛnyi etena kakandadihola odihɔ wa 6, ko didimu dia nkɛtɛ dia wolo diakasalema ndo wonya wakayala odima tshududu oko dikoto diakasalema la wɛɔsa* ndo tshondo ya ngɔndɔ kakayala oko dikila,+ 13 ndo tɔɔtɔ ta l’olongo takakɔ la nkɛtɛ oko watɔkɔka elowa weke ɛpɛpɛ oma l’osongo wa fingo etena kasutshasutshamawɔ la lɔpɛpɛ la wolo. 14 Ko olongo wakamɔ oko wɔɔmbɔ wambowɔmba+ ndo akona tshɛ la asɛnga tshɛ wakamɔ oma l’ahole awɔ.+ 15 Ndo nkumi ya dikanga ya la nkɛtɛ la ɛnɛnɛ la ewandji w’asɔlayi la akanga w’ɛngɔnyi la akanga wa wolo la mfumbe tshɛ ndo anto tshɛ wele la lotshungɔ wakayashɛ lo weoko w’ave ndo lam’asa ave wa l’akona.+ 16 Ko vɔ wakatetemala mbutɛ akona l’ave vate: “Nyotokongotwe+ ndo nyotoshɛ oma la ntondo ka Ɔnɛ lodjashi lo kiti ka lowandji+ ndo oma lo odudu w’Ɔna Ɔkɔkɔ,+ 17 nɛ dia lushi la woke la odudu awɔ lambokoka.+ Akɔna akoka memala?”+