2 Nkumi ya dikanga
16 L’ɔnɔnyi wa 17 w’ɛlɔmbwɛlɔ ka Peka ɔna Rɛmaliya, Ahaza+ ɔna Jɔtama nkumekanga ka Juda akayala nkumekanga. 2 Ahaza aki l’ɛnɔnyi 20 lam’akandayala nkumekanga ndo nde akolɛ l’edja k’ɛnɔnyi 16 la Jɛrusalɛma. Nde kosala kɛnɛ kaki ɔlɔlɔ lo washo wa Jehowa Nzambi kande oko wakasale Davidɛ tshɛnde.+ 3 Koko nde akakɛndakɛnda lo mboka ka nkumi ya dikanga y’Isariyɛlɛ,+ ndo nde akakome polo lo ntshumba ɔnande lo dja,+ lo ndjela ditshelo dia wɔnɔnyi dia wedja+ wele Jehowa akawatshanya oma la ntondo k’ase Isariyɛlɛ. 4 Ndo nto, nde akatetemala nambola ndo ntshumba olambo lo ahole wa la diko,+ lo tokonakona ndo l’ɛse k’osongo tshɛ wele l’akatshi efula.+
5 L’etena kɛsɔ mbakaye Rɛzina nkumekanga ka Suriya ndo Peka ɔna Rɛmaliya nkumekanga k’Isariyɛlɛ dia ndjɔlɔsha Jɛrusalɛma.+ Vɔ wakadinge Ahaza dia mbɔlɔsha, koko vɔ komonga la akoka wa mbɔsa osomba. 6 L’etena kɛsɔ, Rɛzina nkumekanga ka Suriya akakaloya Elatɛ+ le ase Ɛdɔmɛ ndo l’ɔkɔngɔ wa laasɔ, nde akatshanya ase Juda oma la Elatɛ, ko ase Ɛdɔmɛ wakɔtɔ la Elatɛ ndo vɔ mbidjasɛ lɛkɔ polo ndo ɛlɔ. 7 Ɔnkɔnɛ, Ahaza akatome akɛndji le Tingilatɛ-Pilɛsɛrɛ+ nkumekanga k’Asuriya ate: “Dimi lekɔ okambi ayɛ ndo ɔnayɛ. Yaka kele yombitsha oma l’anya wa nkumekanga ka Suriya ndo oma l’anya wa nkumekanga k’Isariyɛlɛ wanɛ wandɔsha.” 8 Oma laasɔ, Ahaza akɔshi mfɛsa la paonyi yaki lo luudu la Jehowa ndo lo waombelo wa lo luudu* la nkumekanga, ko akatomɛ nkumekanga k’Asuriya oko woshasha.+ 9 Nkumekanga k’Asuriya aketawɔ kɛnɛ kakandɔɔlɔmbɛ, ko nde akatshu la Damasɛkɛ ndo akɔshi osomba akɔ, ko akatɔlɛ anto wa lɔkɔ lo lɔhɔmbɔ la Kirɛ+ ndo akadiake Rɛzina.+
10 Oma laasɔ, nkumekanga Ahaza akatshu dia tohomana la Tingilatɛ-Pilɛsɛrɛ nkumekanga k’Asuriya la Damasɛkɛ. Lam’akandɛnyi elambwelo kaki la Damasɛkɛ, nkumekanga Ahaza akatomɛ ɔlɔmbɛdi Uridja sango dia elambwelo lo mɛnya tenyi diatɔ ndo woho wakatasalema.+ 11 Ɔlɔmbɛdi Uridja+ akahike elambwelo+ lo ndjela kɛnɛ tshɛ kakootomɛ nkumekanga Ahaza oma la Damasɛkɛ. Ɔlɔmbɛdi Uridja akashidiya mbika dihole diakɔ la ntondo ka nkumekanga Ahaza nkalola oma la Damasɛkɛ. 12 Lam’akakalola nkumekanga oma la Damasɛkɛ ndo lam’akandɛnyi elambwelo kakɔ, nde akasukana la tɔ ndo akalambola elambo lɔkɔ.+ 13 Ndo elambwelo kɛsɔ kakandatetemala nambola elambo ande wa lotshumba ndo ntutola edinga w’elambo ande wa ntɔngɔ. Ndo nto, nde akatɛ elambo ande wa lotɛ lɔkɔ ndo akamɔngɛ dikila di’elambo ande w’osanga lɔkɔ. 14 Oma laasɔ, nde akanya elambwelo+ ka nkonga kaki la ntondo ka Jehowa oma lo dihole diatɔ, mbɛlanɛ la luudu, lam’asa elambwelo kande hita la luudu la Jehowa, ko nde akakikitsha lo lɛkɛ la nɔrdɛ la elambwelo kande hita. 15 Nkumekanga Ahaza akadjangɛ ɔlɔmbɛdi Uridja+ ate: “Kolambolake olambo wa lotshumba wa pindju lo elambwelo+ ka woke, kaamɛ ndo olambo wa ntɔngɔ+ wa la dikɔlɔ, olambo wa lotshumba wa nkumekanga ndo olambo ande wa ntɔngɔ, mbidja ndo elambo wa lotshumba, elambo wa ntɔngɔ ndo elambo wa lotɛ w’anto tshɛ. Kɔmɔngake ndo dikila tshɛ di’oma lo elambo wa lotshumba ndo dikila tshɛ di’oma lo elambo ekina lɔkɔ. Lo kɛnɛ kendana la elambwelo ka nkonga, layenda kɛnɛ kayomosala la tɔ.” 16 Ko ɔlɔmbɛdi Uridja akasale kɛnɛ tshɛ kakawodjangɛ+ nkumekanga Ahaza.
17 Ndo nto, nkumekanga Ahaza akahendjahendja esembe wa pusupusu+ ndo akanya alɔnga wa weke oma laadiko diayɔ,+ ndo nde akanya Oduwa waki laadiko dia ngɔmbɛ ya nkonga+ yakawɛmbɛ, ko akookitsha lo odihe wa l’ave.+ 18 Dihole diokombami diakakama dikambo dia Sabato lo luudu ndo la soko dia l’andja dia nkumekanga, nde akadinya oma lo luudu la Jehowa. Nde akasale ngasɔ l’ɔtɛ wa nkumekanga k’Asuriya.
19 Lo kɛnɛ kendana l’etenyi kekina k’ɔkɔndɔ wa Ahaza ndo kɛnɛ kakandasale, shi awui asɔ fundama lo dibuku di’ɔkɔndɔ wa tena dia nkumi ya dikanga ya Juda?+ 20 Oma laasɔ, Ahaza aketama dia momuya kaamɛ la watshɛnde ndo wakookundɛ lale watshɛnde l’Osomba wa Davidɛ, ko ɔnande Hɛzɛkiya*+ akayala nkumekanga lo dihole diande.