2 Ɛkɔndɔ

29 Hɛzɛkiya+ aki l’ɛnɔnyi 25 lam’akandayala nkumekanga ndo nde akolɛ l’edja k’ɛnɔnyi 29 la Jɛrusalɛma. Nyango lokombo lande Abidja, ɔna Zɛkariya.+ 2 Nde akatetemala nsala kɛnɛ kaki ɔlɔlɔ lo washo wa Jehowa+ oko wakasalaka+ Davidɛ tshɛnde. 3 L’ɔnɔnyi wa ntondo w’ɛlɔmbwɛlɔ kande, lo ngɔndɔ ka ntondo, nde akadihola nkuke ya luudu la Jehowa ko akayilɔngɔsɔla.+ 4 Oma laasɔ, nde akelɛ ɛlɔmbɛdi l’ase Lɛwi ndo akaasanganya lo sɛkɛ dia lo ɛstɛ. 5 Nde akawatɛ ate: “Nyompokame, nyu ase Lɛwi. Nyoyakidia+ ndo nyokidia luudu la Jehowa Nzambi ka watshɛnyu, ndo nyonya kɛnɛ kele mindo oma lo dihole di’ekila.+ 6 Nɛ dia washɛso komonga la kɔlamelo ndo wakasale kɛnɛ kaki kɔlɔ lo washo wa Jehowa Nzambi kaso.+ Vɔ wakɔɔsɛkɛ, ko wakanya dungi diawɔ oma lo tabɛrnaklɛ ka Jehowa ndo wakawoke ɔkɔngɔ.+ 7 Ndo nto, vɔ wakadihe nkuke ya tshoto y’otale+ ndo wakadime atala.+ Vɔ wakatshike ntshumba tshɔ+ ndo nambola elambo wa lotshumba+ lo dihole di’ekila dikambo dia Nzambi k’Isariyɛlɛ. 8 Diakɔ diele Jehowa akomalɛ Juda la Jɛrusalɛma,+ ko nde akawaetɛ ɛngɔ ka wɔnɔnyi ndo ka diambo ndo ka lɔsɔkɔ,* oko wakokanyu diɛna la washo anyu nyuamɛ.+ 9 Ko watshɛso wakadiakema la lokuwa la ta+ ndo anaso w’apami, anaso wa wamato ndo wadiɛso wakatshu lo lɔhɔmbɔ l’ɔtɛ wa dikambo sɔ.+ 10 Kakianɛ, otema ami nangaka mbidja sheke kaamɛ la Jehowa Nzambi k’Isariyɛlɛ+ dia nkɛlɛ kande kadɔdɔ mimɔ oma le so. 11 Anami le, ɔnɛ keema etena ka minya akambo yimba,* nɛ dia Jehowa akanyɔsɔnɛ dia memalaka la ntondo kande, dia kambaka+ oko ekambi ande ndo dia tshumbaka+ elambo ande.”

12 Ko ase Lɛwi anɛ wakemala: Mahata ɔna Amasai nde la Jɔɛlɛ ɔna Azariya oseka Kɔhata;+ oma le aseka Merari:+ Kisha ɔna Abidi nde la Azariya ɔna Jɛhalɛlɛ; oma le aseka Ngɛrɛshɔna:+ Joa ɔna Zima nde la Ɛdɛna ɔna Joa; 13 oma le ana w’apami wa Elizafana: Shimiri nde la Juɛlɛ; oma le ana w’apami wa Asafu:+ Zɛkariya nde la Mataniya; 14 oma le ana w’apami wa Hemana:+ Jɛhiyɛlɛ nde la Shimei; ndo oma le ana w’apami wa Jedutuna:+ Shemaya nde la Uziyɛlɛ. 15 Oma laasɔ, vɔ wakatshumanya anangɛwɔ ndo wakayakidia, ko wakaye oko wakadjanga nkumekanga lo ndjela ɛtɛkɛta wa Jehowa, dia mbɛdia luudu la Jehowa.+ 16 Ko ɛlɔmbɛdi wakɔtɔ lo luudu la Jehowa dia nsola ndo ntondja mindo tshɛ yakawatane lo tɛmpɛlɔ ka Jehowa ko ndjitɔla lo sɛkɛ+ dia luudu la Jehowa. Ase Lɛwi vɔ lawɔ wakayiɔshi, ko wakayitɔlɛ l’andja lo Okidi wa Kidirɔna.+ 17 Ɔnkɔnɛ, vɔ wakatatɛ la okidiamelo lo ngɔndɔ ka ntondo lushi 1 ndo lam’akakoke ngɔndɔ nshi 8, vɔ wakakome lo tshoto y’otale ya Jehowa.+ Vɔ wakakidia luudu la Jehowa l’edja ka nshi 8 ndo vɔ wakashidiya lo ngɔndɔ ka ntondo nshi 16.

18 L’ɔkɔngɔ wa laasɔ, vɔ wakɔtɔ le nkumekanga Hɛzɛkiya ko wakate vate: “Tambɛdia luudu la Jehowa l’otondo, elambwelo k’olambo wa lotshumba+ ndo diangɔ diatɔ tshɛ,+ kaamɛ ndo mɛsa wa mapa wa lahatanya*+ la diangɔ diawɔ tshɛ. 19 Tambɔlɔngɔsɔla ndo tambokidia+ diangɔ tshɛ diakakasha nkumekanga Ahaza l’edja k’ɛlɔmbwɛlɔ kande etena kakandashisha kɔlamelo+ ndo diɔ diekɔ la ntondo ka elambwelo ka Jehowa.”

20 Ko nkumekanga Hɛzɛkiya aketɔ la yosose, akatshumanya ewandji wa l’osomba, ko vɔ wakadɛ otsha lo luudu la Jehowa. 21 Vɔ wakatɔlɛ ngɔmbɛ 7, ɛkɔkɔ wa waomi 7, ɛsɔngɔ w’ɛkɔkɔ wa waomi 7 ndo weombe wa mbudi 7 oko olambo wa pɛkato dikambo dia diolelo, dikambo dia tɛmpɛlɔ k’ekila ndo dikambo dia Juda.+ Ɔnkɔnɛ nde akatɛ ɛlɔmbɛdi, tokanula ta Arɔna dia vɔ nambola diangɔ sɔ lo elambwelo ka Jehowa. 22 Oma laasɔ, vɔ wakadiake ngɔmbɛ+ ndo ɛlɔmbɛdi wakɔshi dikila, ko wakadimɔngɛ lo elambwelo;+ oma laasɔ, vɔ wakadiake ɛkɔkɔ wa waomi ko wakamɔngɛ dikila lo elambwelo, ndo vɔ wakadiake ɛsɔngɔ w’ɛkɔkɔ wa waomi, ko wakamɔngɛ dikila lo elambwelo. 23 Oma laasɔ, vɔ wakatɔlɛ weombe wa mbudi w’olambo wa pɛkato la ntondo ka nkumekanga ndo ka etshumanelo, ko wakahɛ anya awɔ lɔkɔ. 24 Ɛlɔmbɛdi wakayidiake ndo wakasale olambo wa pɛkato la dikila diayɔ lo elambwelo, dia nkomba pɛkato y’ase Isariyɛlɛ tshɛ, nɛ dia nkumekanga akate dia olambo wa lotshumba ndo olambo wa pɛkato pombaka nambɔma dikambo di’ase Isariyɛlɛ tshɛ.

25 L’etena kɛsɔ, nde akatshike ase Lɛwi lo luudu la Jehowa la nsɛmbalɛ, dihomahoma di’eshinga ndo nsɛsɛ+ lo ndjela didjango dia Davidɛ+ ndo dia Ngada+ ɔmɛnyi wa waɛnɛlɔ wa nkumekanga, ndo dia omvutshi Natana,+ nɛ dia didjango sɔ diakaye oma le Jehowa lo tshimbo y’amvutshi ande. 26 Ɔnkɔnɛ ase Lɛwi wakemala, wele la dihomahoma dia Davidɛ, ndo ɛlɔmbɛdi wele la amama.+

27 Oma laasɔ, Hɛzɛkiya akadjanga dia vɔ nambola olambo wa lotshumba lo elambwelo.+ Lam’akawatatɛ nambola olambo wa lotshumba, osambo wa Jehowa wakatatɛ, kaamɛ ndo amama lo ndjela ɛlɔmbwɛlɔ ka dihomahoma dia Davidɛ nkumekanga k’Isariyɛlɛ. 28 Ko etshumanelo k’otondo wakakusama lam’akembama osambo ndo lam’akadama amama; awui asɔ tshɛ wakatetemala polo lam’akawashidiya nambola olambo wa lotshumba. 29 Kam’akawashidiya nambola olambo, nkumekanga nde la wanɛ tshɛ waki kaamɛ la nde wakakɔlama ndo wakakusama. 30 Oma laasɔ, nkumekanga Hɛzɛkiya nde la ewandji wakatɛ ase Lɛwi dia vɔ ntombola Jehowa la ɛtɛkɛta wa Davidɛ+ ndo wa Asafu+ ɔmɛnyi wa waɛnɛlɔ. Ko vɔ wakootombola la ɔngɛnɔngɛnɔ w’efula, wakakɔlama ndo wakakusama.

31 Oma laasɔ, Hɛzɛkiya akate ate: “Wonya ɔnɛ wambonyokitshama laande* dikambo dia Jehowa, nyoye, nyela weshasha ndo elambo wa eokelo ka losaka lo luudu la Jehowa.” Ko etshumanelo wakatatɛ mbela weshasha ndo elambo wa eokelo ka losaka, ko onto l’onto akela elambo wa lotshumba la otema wa la lolango.+ 32 Lofulo l’elambo wa lotshumba wakela etshumanelo laki ngɔmbɛ 70, ɛkɔkɔ wa waomi 100, ɛsɔngɔ w’ɛkɔkɔ wa waomi 200, diangɔ sɔ tshɛ oko olambo wa lotshumba dikambo dia Jehowa;+ 33 weshasha w’ekila waki ngɔmbɛ 600 ndo ɛkɔkɔ nunu sato (3 000). 34 Koko ɛlɔmbɛdi komonga efula dia mbowola nkoho ya nyama tshɛ y’elambo wa lotshumba; ɔnkɔnɛ, anangɛwɔ ase Lɛwi wakaakimanyiya polo lam’akashile olimu+ ndo polo lam’akayakidia+ ɛlɔmbɛdi, nɛ dia ase Lɛwi wakɛnaka ohomba* wa ndjakidia oleki ɛlɔmbɛdi. 35 Ndo nto, elambo wa lotshumba+ waki efula, kaamɛ ndo diangɔ dia wata dia l’elambo w’osanga+ ndo elambo wa lotɛ dikambo dia elambo wa lotshumba.+ Ɔnkɔnɛ, olimu wa lo luudu la Jehowa wakakaloyama.* 36 Ko Hɛzɛkiya nde l’anto tshɛ wakangɛnangɛna l’ɔtɛ wa kɛnɛ kakashikikɛ Nzambi ka mɛtɛ dikambo di’anto,+ nɛ dia awui asɔ tshɛ wakasalema la shashimoya.