2 Ɛkɔndɔ
31 Kam’akawashidiya akambo asɔ tshɛ, ase Isariyɛlɛ tshɛ waki laawɔ wakatshu otsha l’esomba wa la Juda, ndo vɔ wakoodiodia dimɛta dia l’ave,+ wakahendjahendja dimɛta dia l’esongo*+ ndo wakahandjola ahole wa la diko+ ndo dilambwelo+ diaki lo Juda ndo lo Bɛnjamina k’otondo, kaamɛ ndo laka aseka Efrayimɛ la Manase+ polo lam’akawalanya diangɔ sɔ tshɛ; l’ɔkɔngɔ wa laasɔ, ase Isariyɛlɛ tshɛ wakakalola lo esomba awɔ, onto l’onto lo ɛtshi kande ka nkɛtɛ.
2 Oma laasɔ, Hɛzɛkiya akasɔnɛ ɛlɔmbɛdi lo elui awɔ ndo ase Lɛwi lo elui awɔ,+ olui tshɛ+ w’ɛlɔmbɛdi ndo w’ase Lɛwi dikambo dia olimu awɔ,+ dikambo dia elambo wa lotshumba ndo elambo w’osanga, dia kambaka, dia mbokaka losaka ndo dia tombolaka lo asoko wa lo asɛkɛ* wa Jehowa.+ 3 Etenyi kɛmɔtshi ka diangɔ dia nkumekanga kakakimɔma dikambo dia elambo wa lotshumba,+ mbidja ndo elambo wa pindju la wa dikɔlɔ,+ kaamɛ ndo elambo wa lotshumba dikambo dia Sabato,+ towalelo ta ngɔndɔ+ ndo fɛtɛ+ lo ndjela kɛnɛ kofundami lo Ɛlɛmbɛ wa Jehowa.
4 Ndo nto, nde akadjangɛ anto wakadjasɛka la Jɛrusalɛma dia nkimɔ yema yahomba ɛlɔmbɛdi l’ase Lɛwi+ nongola, dia vɔ ndjela nna lo nna* ɛlɛmbɛ wa Jehowa. 5 Kam’akadjama didjango, ase Isariyɛlɛ wakakimɔ ɛlɔnga wa ntɔngɔ, wanu w’eyoyo, esɔ,+ osanga ndo diangɔ tshɛ di’oma lo dikambɔ+ lo yɛdikɔ y’efula; vɔ wakela tenyi dia dikumi dia ɛngɔ tshɛ lo yɛdikɔ y’efula.+ 6 Ase Isariyɛlɛ l’ase Juda wakadjasɛka lo esomba wa la Juda vɔ lawɔ wakela etenyi ka dikumi ka ngɔmbɛ ndo ka ɛkɔkɔ, ndo etenyi ka dikumi ka diangɔ di’ekila+ diakakidiama dikambo dia Jehowa Nzambi kawɔ. Vɔ wakadiela ndo wakadikitsha elui elui. 7 Lo ngɔndɔ ka 3,+ vɔ wakatatɛ ntshumanya weshasha awɔ lo elui; ndo lo ngɔndɔ ka 7,+ vɔ wakashidiya. 8 Lam’akaye Hɛzɛkiya nde la ewandji ndo lam’akawɛnyi elui akɔ, vɔ wakatombola Jehowa ndo wakatshɔkɔla ase Isariyɛlɛ.
9 Hɛzɛkiya akambola ɛlɔmbɛdi l’ase Lɛwi lo dikambo dia elui akɔ, 10 ko Azariya owandji w’ɛlɔmbɛdi wa lo luudu la Zadɔka akawotɛ ate: “Oma ko etena kakawatatɛ mbela weshasha lo luudu la Jehowa,+ anto ndɛka ko ndota ndo diangɔ tshikalaka efula, nɛ dia Jehowa ambɔtshɔkɔla anto ande, ndo diangɔ di’efula nɛ tshɛ diambotshikala.”+
11 Ko Hɛzɛkiya akawatɛ dia vɔ nɔngɔsɔla mvudu ya waombelo*+ ya lo luudu la Jehowa, ko vɔ wakayilɔngɔsɔla. 12 La kɔlamelo tshɛ, vɔ wakatetemala mbela weshasha, tenyi dia dikumi+ ndo diangɔ di’ekila; Konaniya ose Lɛwi akasɔnama dia monga omendji wa diangɔ sɔ tshɛ, ndo Shimei y’ɔnango akahɔna la nde. 13 Jɛhiyɛlɛ, Azaziya, Nahata, Asahɛlɛ, Jerimɔtɛ, Jɔzabada, Eliyɛlɛ, Ismakiya, Mahata ndo Bɛnaya waki la ɔkɛndɛ wa kimanyiyaka Konaniya nde la Shimei y’ɔnango lo ndjela didjango dia nkumekanga Hɛzɛkiya, ndo Azariya kaki ɔnɔmbɔdi wa luudu la Nzambi ka mɛtɛ. 14 Kɔre ɔna Imɛna, ose Lɛwi laki olami wa soko dia lo ɛstɛ+ kakalamaka weshasha wa la lolango+ wa Nzambi ka mɛtɛ, ndo nde kakakahanyaka woshasha wakawashaka Jehowa+ ndo diangɔ dioleki ekila.+ 15 Lo ɛlɔmbwɛlɔ kande mbaki Ɛdɛna, Miniyamina, Jeshua, Shemaya, Amariya ndo Shekaniya lo esomba w’ɛlɔmbɛdi+ lo ɛkɛndɛ awɔ w’anto wakawɛkɛka otema, dia nkahanya+ anangɛwɔ lo elui awɔ popo, oyadi epalanga kana akɛnda. 16 Ɔsɔ aki laadiko dia okahanyelo wakawakahɛka apami waki l’ɛnɔnyi oma lo 3 otsha la diko wakafundjama nkombo lo ofundjelo wa nkombo lo ndjela ɛlɔndji, wanɛ wakayaka lushi la lushi dia ndjokamba lo luudu la Jehowa ndo dia ndjokotsha ɛkɛndɛ wa l’elui awɔ.
17 Ofundjelo wa nkombo y’ɛlɔmbɛdi lo ndjela ɛlɔndji awɔ wakasalema lo ndjela mvudu ya washɛwɔ+ oko ofundjelo w’ase Lɛwi waki l’ɛnɔnyi 20 otsha la diko,+ lo ndjela ɛkɛndɛ w’elui awɔ.+ 18 Ofundjelo wa nkombo lo ndjela ɛlɔndji wakendanaka la wadiɛwɔ, anawɔ w’apami, anawɔ wa wamato ndo anawɔ wa totshitshɛ, etshumanelo kawɔ k’otondo, nɛ dia vɔ wakayakidia dikambo dia kɛnɛ kaki ekila l’ɔtɛ wa ɔkɛndɛ washawɔ anto wɛkɛwɔ otema wakawalongola, 19 kaamɛ ndo tokanula ta Arɔna, ɛlɔmbɛdi wakadjasɛka lo bɛtshi dia nkɛtɛ dia ndeshaka dongalonga diakadinge esomba awɔ.+ Lo esomba tshɛ, apami wakasɔnama lo ndjela nkombo yawɔ dia kimɔka yema ya mbo ya ndɛ dikambo dia apami tshɛ l’atei w’ɛlɔmbɛdi ndo dikambo dia onto tshɛ lakafundjama lokombo lo ndjela ɔlɔndji w’ase Lɛwi.
20 Hɛzɛkiya akasale ngasɔ lo Juda y’otondo ndo nde akatetemala nsala kɛnɛ kaki ɔlɔlɔ, kosembwe ndo ka kɔlamelo la ntondo ka Jehowa Nzambi kande. 21 Olimu tshɛ wakandasale dia nyanga Nzambi kande, oyadi lo kɛnɛ kendana la olimu wa lo luudu la Nzambi ka mɛtɛ+ kana Ɛlɛmbɛ la wadjango, nde akasale la otema ɔtɔi ndo nde akatondoya.