1 Samuɛlɛ

18 Kam’akashidiya Davidɛ nsawola la Saolo, Jɔnatana+ nde la Davidɛ wakayonga la dimama dia lɔngɛnyi* la wolo, ndo Jɔnatana akatatɛ mbolanga oko wayalangande.*+ 2 Oma ko lushi lɔsɔ, Saolo akatshikala la Davidɛ ndo nde kombetawɔ dia nde nkalola lo luudu+ la she. 3 Jɔnatana nde la Davidɛ wakadje sheke,+ nɛ dia nde akoolangaka oko wayalangande.*+ 4 Jɔnatana akakolola okutu wele bu l’anya wakandalɔtɛ, ko akasha Davidɛ kaamɛ la ɔlɔtɔ ande, lokuwa lande la ta, ota ande ndo oya ande. 5 Davidɛ akatatɛ ntshɔ lo ta ndo akatondoyaka*+ oseka dihole tshɛ diakootomaka Saolo. Ko Saolo akawetɛ owandji w’andɔshi+ ande wa ta ndo dui sɔ diakangɛnyangɛnya anto tshɛ ndo ekambi waki Saolo.

6 Lam’akayakalolaka Davidɛ nde l’anto akina oma la todiaka ase Filistiya, wamato wakatombe oma l’esomba tshɛ wa l’Isariyɛlɛ wayembe esambo+ ndo wayanɔ dia ndjohomana la nkumekanga Saolo, wayahome ngɔmɔ,+ lɔngɔmbi ndo wayangɛnangɛna. 7 Wamato wakasalaka fɛtɛ wakembaka vate:

8 Saolo akomala efula+ ndo osambo ɔsɔ kombɔngɛnyangɛnya, nɛ dia nde akate ate: “Vɔ wambandola Davidɛ l’ɔtɛ wa nunu akumi akumi, koko wambomandola dimi l’ɔtɛ wa nunu nunu to. Ɛngɔ 1 kambotshikala dia vɔ mbosha ele lowandji!”+ 9 Oma ko lushi lɔsɔ, Saolo akendaka Davidɛ nshi tshɛ la sso dia kɔlɔ.

10 La wedi a pindju, nyuma ka kɔlɔ k’oma le Nzambi kakahema Saolo,+ ko nde akatatɛ nsala akambo lo yoho yahandatosalaka* l’etei ka luudu etena kakoohomɛka Davidɛ mishiki la lɔsɛsɛ+ oko wakandasalaka lo waaso akina. Saolo aki la dikɔnga lo lonya+ lande, 11 ko nde akawooke dikɔnga+ diakɔ, ata l’otema ande ate: ‘Layanga mamatanya Davidɛ la ehele!’ Koko Davidɛ akasandjɔ oma lalende mbala 2. 12 Oma laasɔ, Saolo akoke Davidɛ wɔma nɛ dia Jehowa aki kaamɛ la nde,+ koko nde akoke Saolo+ ɔkɔngɔ. 13 Ɔnkɔnɛ, Saolo akawonya oma lalende ndo akawetɛ owandji w’anto kinunu (1 000), ko Davidɛ akalɔmbɔlaka asɔlayi otsha lo ta.*+ 14 Davidɛ akatetemala ntondoya*+ lo kɛnɛ tshɛ kakandasalaka ndo Jehowa aki kaamɛ la nde.+ 15 Lam’akɛnyi Saolo dia nde ekɔ lo ntondoya efula, nde akawoke wɔma. 16 Koko ase Isariyɛlɛ tshɛ ndo ase Juda wakalange Davidɛ, nɛ dia nde akaalɔmbɔlaka otsha lo ta.

17 L’ɔkɔngɔ diko, Saolo akatɛ Davidɛ ate: “Merabɛ+ ɔnami la womoto l’enondo nde ɔnɛ. Dimi layanga koshande wadi.+ Koko wɛ pombaka ntetemala mɛnyami dihonga diayɛ ndo ndɔ ata wa Jehowa.”+ Nɛ dia Saolo akataka l’otema ande ate: ‘Dimi haawahɛ anya. Ase Filistiya kawoodiake.’+ 18 Ko Davidɛ akatɛ Saolo ate: “Dimi eemi ndo ewotɔ ami la ase nkumbo ka papa eewɔ lo Isariyɛlɛ katomonga okilo wa nkumekanga?”+ 19 Koko lam’akakoke etena ka mbisha Davidɛ Merabɛ ɔna Saolo, nde akashile ntshukama le Adriyɛlɛ+ ose Mehola.

20 Mikalɛ+ ɔna Saolo akalangaka Davidɛ, ko wakatotɛ Saolo ndo dikambo sɔ diakɔɔngɛnyangɛnya. 21 Ko Saolo akate ate: “Dimi layowoshande dia nde monga tshondo ya djonga le nde,+ kele nde katɔkɔ lo anya w’ase Filistiya.” Oma laasɔ, Saolo akatɛ Davidɛ mbala ka 2 ate: “Dimi la yɛ tayanga mbidja sheke ya diwala* ɛlɔ.” 22 Ndo nto, Saolo akatɛ ekambi ande ate: “Nyosawole la Davidɛ lo woshɛshɛ kele nyowote nyate: ‘Eenda, nkumekanga kɔngɛnangɛnaka ndo ekambi ande tshɛ kolangaka. Ɔnkɔnɛ, dja sheke ya diwala kaamɛ la nkumekanga.’” 23 Lam’akatɛ ekambi wa Saolo Davidɛ awui asɔ, Davidɛ akate ate: “Onde nyu mbɔsaka dia ekɔ dui dia tshitshɛ dia dimi hiami y’ose wola ndo yele bu la nɛmɔ+ mbidja sheke ya diwala kaamɛ la nkumekanga?” 24 Ko ekambi wa Saolo wakatowotɛ vate: “Ngasɔ mbakatshi Davidɛ.”

25 Ko Saolo akate ate: “Nyotote Davidɛ nyate: ‘Nkumekanga hayangi okundji,+ onyake ɛpɔpɔ+ 100 w’ase Filistiya dia nsɔmbɔya atunyi wa nkumekanga.’” Nɛ dia Saolo akalɔngɔsɔlaka dia Davidɛ tɔkɔ lo anya w’ase Filistiya. 26 Ɔnkɔnɛ ekambi ande wakatɔkɔndɔlɛ Davidɛ awui asɔ, ko Davidɛ akangɛnangɛna dia mbidja sheke ya diwala kaamɛ la nkumekanga.+ La ntondo k’etena kakandawosha nkoka, 27 Davidɛ akatshu l’anto ande, wakatodiaka apami w’ase Filistiya 200, ko Davidɛ akela lofulo lakɔ tshɛ l’ɛpɔpɔ le nkumekanga dia mbidja sheke ya diwala la nkumekanga. Ɔnkɔnɛ Saolo akawosha ɔnande Mikalɛ wadi.+ 28 Saolo akashihodia dia Jehowa ekɔ kaamɛ la Davidɛ+ ndo dia ɔnande Mikalɛ mbolangaka.+ 29 Dui sɔ diakakonya Saolo dia ndeka mboka Davidɛ wɔma, ko Saolo akayala otunyi wa Davidɛ polo lam’akandavu.+

30 Ewandji w’ase Filistiya wakayaka lo ta, koko mbala tshɛ yakawayaka, Davidɛ akatondoyaka* oleki ekambi ekina tshɛ wa Saolo;+ ndo lokombo lande lakɔsamaka la nɛmɔ di’efula.+