1 Samuɛlɛ
26 L’ɔkɔngɔ wa laasɔ, ase Zifu+ wakatshu le Saolo la Ngibɛa+ ko wakatota vate: “Shi Davidɛ ndjashɛ lo kionakona ya Hakila mbɛlanɛ la Jeshimɔna?”*+ 2 Ko Saolo akonɛɛ ndo akatshu otsha l’oswe wa Zifu nde l’apami nunu sato (3 000) wakasɔnama l’Isariyɛlɛ dia toyanga Davidɛ l’oswe wa Zifu.+ 3 Saolo akatoka mpango kande lo kionakona ya Hakila mbɛlanɛ la Jeshimɔna suke la otadimbo. L’etena kɛsɔ, Davidɛ akadjasɛka l’oswe ko wakawotɛ dia Saolo ambooyela l’oswe akɔ. 4 Ko Davidɛ akatome atɔpi dia toshikikɛ kana Saolo amboya mɛtɛ. 5 L’ɔkɔngɔ diko, Davidɛ akatshu otsha lo dihole diakahange Saolo ko Davidɛ akɛnyi dihole diaki Saolo nde la Abinɛrɛ+ ɔna Nɛrɛ, owandji w’asɔlayi ande woladi djɔ. Saolo akalale lo mpango kakɔ ndo elui w’asɔlayi wakoodinge lo wedi akɔ tshɛ. 6 Ko Davidɛ akambola Ahimɛlɛkɛ ose Hiti+ nde la Abishai+ ɔna Zeruya,+ ɔnango Jɔaba ate: “Ayoholɔ la mi lo mpango le Saolo?” Abishai akakadimola ate: “Dimi layoholɔ kaamɛ la yɛ.” 7 Ko Davidɛ nde la Abishai wakatshu lɛnɛ aki elui w’asɔlayi akɔ l’otsho ko wakatane Saolo oladi djɔ lo mpango nyingama l’asɔlayi ndo dikɔnga diande mbikama lo nkɛtɛ suke la ɔtɛ ande. Abinɛrɛ la elui w’asɔlayi wakalale mbodinga.
8 Abishai akatɛ Davidɛ ate: “Ɛlɔ, Nzambi ambokimɔ otunyi ayɛ lo anya+ ayɛ. Lam’alangayɛ, ontshike mbomamatanya la dikɔnga nɛ la nkɛtɛ mbala 1 ndo hantosala mbala 2.” 9 Koko Davidɛ akatɛ Abishai ate: “Toosalɛke kɔlɔ, nɛ dia akɔna akoka mbahɛ okitami wa Jehowa+ lonya ko nde ntshikala aha la onongo?”+ 10 Davidɛ akatetemala mbuta ate: “Lo mɛtɛ oko wele Jehowa la lɔsɛnɔ, Jehowa ndamɛ ayowodiaka,+ kana lushi lande layokoka+ ko nde ayovɔ, kana nde ayotshɔ lo ta, ko ayotovɔ.+ 11 Haafɔnya dia lo ndjela kanyi ya Jehowa dimi koka mbahɛ okitami wa Jehowa+ lonya! Ɔnkɔnɛ lam’alangayɛ, ɔsa dikɔnga diele suke la ɔtɛ ande ndo ekutshu k’ashi kele totshu.” 12 Ko Davidɛ akɔshi dikɔnga la ekutshu k’ashi kaki suke la ɔtɛ wa Saolo, ko vɔ wakatshu. Ndooko onto lakɛnyi+ kana lakawaeye ndo ndooko onto lakemɔ, nɛ dia vɔ tshɛ waki lo djɔ ya baku, dikambo djɔ y’oma le Jehowa yakawande. 13 Oma laasɔ, Davidɛ akatenyanya lo wedi okina, ko akatemala lo shɔdi ya dikona lo tshalola, mangana yema etale la wɔ.
14 Davidɛ akawelɛ elui w’asɔlayi ndo Abinɛrɛ+ ɔna Nɛrɛ ate: “Abinɛrɛ, onde wɛ ekɔ lo mbokami?” Abinɛrɛ akakadimola ate: “Wɛ na awelɛ nkumekanga?” 15 Davidɛ akatɛ Abinɛrɛ ate: “Onde wɛ bu pami? Onto akɔna ele oko wɛ lo Isariyɛlɛ? Ko lande na kahayasungukadi dia nama nkumɛyɛ, nkumekanga? Dikambo ɔsɔlayi ɔmɔtshi akaye dia ndjodiaka nkumɛyɛ, nkumekanga.+ 16 Kɛnɛ kakayasadi bu dimɛna. Lo mɛtɛ oko wele Jehowa la lɔsɛnɔ, wɛ kokaka mvɔ, nɛ dia wɛ hasungukadi dia nama nkumɛyɛ, okitami wa Jehowa.+ Ohoshishima, lende ele dikɔnga dia nkumekanga ndo ekutshu k’ashi+ kaki suke la ɔtɛ ande?”
17 Ko Saolo akashihodia dia ɔsɔ ekɔ dui dia Davidɛ ko akate ate: “Davidɛ ɔnami le, ɔsɔ dui diayɛ?” Davidɛ+ akakadimola ate: “Nkumɛmi nkumekanga le, ɔsɔ dui diami.” 18 Nde akakotsha ate: “Lande na katatshanya nkumɛmi okambi ande?+ Kakɔna kamomosala ndo onongo+ akɔna wamomokongola? 19 Nkumɛmi nkumekanga le, lam’alangayɛ, hokamɛ awui w’okambi ayɛ: Naka Jehowa kambokotshutshuya dia ndɔshami, kete nde etawɔ* olambo ami wa ntɔngɔ. Ko naka anto mbambokotshutshuya,+ kete vɔ wambodjama mananu la ntondo ka Jehowa, nɛ dia vɔ wambombitshanya ɛlɔ diaha dimi monga kaamɛ la etenyi k’okitɔ+ ka Jehowa, wata vate: ‘Tshɔka tokambe tozambizambi tokina!’ 20 Laasɔ tetawɔke dia dikila diami nkɔ la nkɛtɛ la ntondo ka Jehowa, nɛ dia nkumekanga k’Isariyɛlɛ ambotomba dia ndjotshanya tshambi,+ oko onto latatshanya ɛngwɛ lo akona.”
21 Ko Saolo akate ate: “Dimi lambosala pɛkato.+ Davidɛ ɔnami, kalola nɛ dia dimi hantokosalɛ kɔlɔ nto, dikambo ɛlɔ wɛ akɔshi lɔsɛnɔ* lami la nɛmɔ.+ Dimi mɛtɛ lambosala akambo oko kanga enginya ndo lambosala munga ka woke.” 22 Davidɛ akakadimola ate: “Dikɔnga dia nkumekanga dɔ nɛ. Ɔlɔngɔ a pami ɔmɔtshi aye kele ayodiɔshi. 23 Jehowa kayofuta onto l’onto l’ɔtɛ wa losembwe+ lande ndo l’ɔtɛ wa kɔlamelo yande, nɛ dia ɛlɔ Jehowa akakokimwe lo anya ami, koko dimi hanangi mbahɛ okitami wa Jehowa+ lonya. 24 Oko waki lɔsɛnɔ* layɛ la nɛmɔ le mi ɛlɔ, lɔsɛnɔ* lami longe la nɛmɔ lo washo wa Jehowa ndo nde antshungole oma lo asui tshɛ.”+ 25 Saolo akakadimola Davidɛ ate: “Davidɛ ɔnami le, ɔtshɔkwame. Ndooko onyake wɛ ayosala akambo wa weke ndo wɛ ayɔlɛndja.”+ Ko Davidɛ akatshu ndo Saolo akakalola otsha lakande.+