2 Samuɛlɛ
3 Ta diakatetemala lam’asa ase luudu la Saolo la ase luudu la Davidɛ. Davidɛ akatatetemalaka monga la wolo+ ndo wolo w’ase luudu la Saolo wakatakitakitaka+ tsho.
2 L’etena kɛsɔ, Davidɛ akote ana w’apami la Hɛbɛrɔna.+ Nde akote Aminɔna+ ɔnande l’enondo nde la Ahinɔama+ ose Jezɛrɛlɛ. 3 Nde akote Kiliyabɛ* ɔnande la 2 nde la Abigayɛlɛ+ laki wadi aki Nabala ose Karamɛlɛ; Abisalɔma+ aki ɔnande la 3 lakandote la Maaka ɔna Talamai+ nkumekanga ka Ngeshurɛ. 4 Adɔnidja+ aki ɔnande la 4 lakandote la Hangiti; Shefatiya aki ɔnande la 5 lakandote la Abitala. 5 Itireyamɛ aki ɔna la 6 lakote Davidɛ nde la wadɛnde Engɛla. Ɔsɔ mbele ana w’apami wakote Davidɛ la Hɛbɛrɔna.
6 Etena kakatetemalaka ta lam’asa ase luudu la Saolo l’ase luudu la Davidɛ, Abinɛrɛ+ akatalekaka nkeketala lo luudu la Saolo. 7 Saolo aki la oseka ɔmɔtshi, lokombo lande Rizipa,+ ɔna Aya. L’ɔkɔngɔ diko, Ishi-Bɔshɛtɛ+ akatɛ Abinɛrɛ ate: “Lande na kakayeyana la oseka wa papa?”+ 8 Abinɛrɛ akomala nkɛlɛ k’efula l’ɔtɛ wa kɛnɛ kakawotɛ Ishi-Bɔshɛtɛ ndo nde akate ate: “Onde dimi laya ɔtɛ wa mfɔ w’oma la Juda? Polo ndo ɛlɔ, dimi lambɛnya ngandji kami ka kɔlamelo le ase luudu la Saolo ka shɔ ndo le anango la angɛnyi ande, ndo dimi hankokimwe lo anya wa Davidɛ. Koko ɛlɔ wɛ onombosha l’ɔtɛ wa munga 1 kendana la womoto. 9 Nzambi ambisha dilanya dia wolo naka dimi hansale Davidɛ oko wakootshibɛ Jehowa dia:+ 10 Minya diolelo oma lo luudu la Saolo ko nshikikɛ kiti ka lowandji ka Davidɛ lo Isariyɛlɛ w’otondo ndo lo Juda y’otondo, oma la Danɛ polo la Bɛrɛ-Shɛba.”+ 11 Nde kokoka nkadimola Abinɛrɛ ndooko dui, nɛ dia nde akawoke wɔma.+
12 Aha la ntshimbatshimba, Abinɛrɛ akatomɛ Davidɛ akɛndji dia towotɛ ɔnɛ: “Akanga wodja ɔnɛ?” Nde akakotsha ate: “Dja sheke la mi, ko dimi layosala kɛnɛ tshɛ kakokami nsala* dia nkadimola Isariyɛlɛ w’otondo lo wedi ayɛ.”+ 13 Ko nde akakadimola ate: “Ekɔ dimɛna! Layodja sheke la yɛ. Dikambo 1 diakɔlɔmbami ele, tohembake mɛna elungi kami naka wɛ hambela Mikalɛ+ ɔna Saolo lam’ayaaye dia ndjɔmɛna.” 14 Davidɛ akatomɛ Ishi-Bɔshɛtɛ+ ɔna Saolo akɛndji dia towotɛ ɔnɛ: “Ombisha wadɛmi Mikalɛ lakamatshuke lo nkimɔ ɛpɔpɔ 100 w’ase Filistiya.”+ 15 Ko Ishi-Bɔshɛtɛ akatome dui dia vɔ towɔsa oma le omɛnde Palatiyɛlɛ,*+ ɔna Laishi. 16 Koko omɛnde akayayaka kaamɛ la nde, ayalele lam’akandayawoyelaka polo la Bahurima.+ Ko Abinɛrɛ akawotɛ ate: “Tshɔka, kalola!” Ko nde akakalola.
17 L’etena kakɔ, Abinɛrɛ akatomɛ dikumanyi dia l’Isariyɛlɛ dui ate: “L’etena kɛmɔtshi, nyu nyakalangaka dia Davidɛ monga nkumekanga kanyu. 18 Kakianɛ nyɔsake yɛdikɔ, nɛ dia Jehowa akatɛ Davidɛ+ ate: ‘Lo tshimbo y’okambi ami Davidɛ kayomoshimbɛ wodja ami w’Isariyɛlɛ oma l’anya w’ase Filistiya ndo oma l’anya w’atunyi awɔ tshɛ.’” 19 Oma laasɔ, Abinɛrɛ akasawola l’aseka Bɛnjamina.+ Ndo nto, Abinɛrɛ akatshu tosawola la Davidɛ lo shɔpɔ la Hɛbɛrɔna dia towotɛ kɛnɛ kambetawɔ ase Isariyɛlɛ ndo nkumbo k’otondo k’aseka Bɛnjamina.
20 Lam’akakome Abinɛrɛ le Davidɛ la Hɛbɛrɔna nde l’apami 20, Davidɛ akasalɛ Abinɛrɛ nde l’apami waki kaamɛ la nde fɛtɛ. 21 Oma laasɔ, Abinɛrɛ akatɛ Davidɛ ate: “Ontshike ntshu kele ntotshumanya ase Isariyɛlɛ tshɛ le nkumɛmi nkumekanga, dia vɔ mbidja sheke kaamɛ la yɛ, ko wɛ ayonga nkumekanga k’Isariyɛlɛ w’otondo oko wakombolayɛ.”* Ko Davidɛ akakɛndja Abinɛrɛ ko nde akatshu la ki.
22 L’etena kakɔ, ekambi waki Davidɛ ndo Jɔaba wakakalola oma lo ta, wayɛmbɛ diangɔ dia dimbo efula ka mamba. Laasɔ ko Abinɛrɛ ambomɔ oma lale Davidɛ la Hɛbɛrɔna, nɛ dia nde akɔɔkɛndja la ki. 23 Lam’akakome Jɔaba+ nde l’asɔlayi tshɛ waki kaamɛ la nde, wakatɛ Jɔaba vate: “Abinɛrɛ+ ɔna Nɛrɛ+ akaye le nkumekanga ndo nde akɔɔkɛndjisha, ko nde akatshwe la ki.” 24 Ko Jɔaba akatshu le nkumekanga ndo akate ate: “Kakɔna kamboyosala? Abinɛrɛ akaye le yɛ lanɛ. Lande na kakayɔkɛndjisha ko nde akatshwe la ki? 25 Wɛ mbeyaka Abinɛrɛ ɔna Nɛrɛ! Nde akaye lanɛ dia ndjokokesa ndo dia ndjeya akambo ayɛ tshɛ ndo kɛnɛ tshɛ kasalayɛ.”
26 Ko Jɔaba akamɔ oma lale Davidɛ, akatome akɛndji dia ndjela Abinɛrɛ ko vɔ wakatoya la nde oma lo difuku di’ashi dia la Sira, koko Davidɛ kombeya ndooko dui lo dikambo sɔ. 27 Lam’akakalola Abinɛrɛ la Hɛbɛrɔna,+ Jɔaba akatshu la nde l’omamu l’edia ka lokuke dia nde tosawola la nde lo shɔpɔ. Koko nde akawoke lokuwa lo dikundju, ko nde akavu.+ Nde akasale dui sɔ l’ɔtɛ wakandadiake* Asahɛlɛ+ w’ɔnango. 28 Lam’akayoka Davidɛ dui sɔ l’ɔkɔngɔ, nde akate ate: “Dimi la diolelo diami hatongaki pondjo la onongo wa dikila+ dia Abinɛrɛ ɔna Nɛrɛ la ntondo ka Jehowa. 29 Onongo wa dikila diande wakadimɔ l’ɔtɛ wa Jɔaba+ ndo wa luudu la she l’otondo. Ndooko etena kayonga lo luudu la Jɔaba ko ndooko pami kele la ɛkɛlɛlɔ+ kana kanga sudi,+ kana pami kakamba la etole ka bwanda* kana onto lambodiakema la lokuwa la ta kana onto lele l’ohomba wa mbo ya ndɛ!”+ 30 Ɔnkɔnɛ, Jɔaba nde la Abishai+ w’ɔnango wakadiake Abinɛrɛ,+ nɛ dia nde akadiake ɔnangɛwɔ Asahɛlɛ lo ta+ dia la Ngibiyɔna.
31 Oma laasɔ, Davidɛ akatɛ Jɔaba l’anto tshɛ waki kaamɛ la nde ate: “Nyatshatsha ahɔndɔ anyu, nyɔlɔtɛ akoto ndo nyolele Abinɛrɛ.” Nkumekanga Davidɛ ndamɛ akayakɛndakɛndaka l’ɔkɔngɔ wa kaka y’odo. 32 Vɔ wakakundɛ Abinɛrɛ la Hɛbɛrɔna ndo nkumekanga akalele la dui dia wolo la diombo dia Abinɛrɛ, ko anto tshɛ wakalele. 33 Nkumekanga akembe osambo lo dikambo dia Abinɛrɛ ate:
“Onde Abinɛrɛ pombaka mvɔ nyɔi oko kanga enginya?
34 Anya ayɛ hawokelekami,
Ndo ekolo ayɛ hawongi lo mɔlɔla.*
Wɛ akakwɛ oko onto lakɔ la ntondo k’andjakanyi.”*+
Ko anto tshɛ wakoolele nto.
35 L’ɔkɔngɔ wa laasɔ, anto tshɛ wakaye ndjosha Davidɛ mapa w’esambelo* etena kaki wonya atadje, koko Davidɛ akatshibe ate: “Nzambi ambisha dilanya dia wolo naka dimi layɔlɛta kaanga yɛtshi ya mapa kana ɛngɔ kekina tshɛ la ntondo ka wonya mbidja!”+ 36 Anto tshɛ wakeye dikambo diakɔ, ko wakangɛnangɛna. Dui sɔ diakangɛnyangɛnya anto tshɛ oko dui tshɛ diakasalaka nkumekanga. 37 Ko anto tshɛ ndo ase Isariyɛlɛ tshɛ wakeye lushi lɔsɔ dia nkumekanga komonga la onongo wa nyɔi ka Abinɛrɛ ɔna Nɛrɛ.+ 38 Oma laasɔ, nkumekanga akatɛ ekambi ande ate: “Onde nyu hanyeye dia owandji ndo onto la woke kambovɔ ɛlɔ l’Isariyɛlɛ?+ 39 Ɛlɔ dimi bu la wolo, kaanga mbakamakitama ɛsɔ dia monga nkumekanga+ ndo apami anɛ, ana wa Zeruya+ wamboleka pangakalɛmi.+ Jehowa afute otshi wa kɔlɔ lo ndjela kɔlɔ kande.”+