2 Samuɛlɛ
10 L’ɔkɔngɔ diko, nkumekanga k’ase Amɔna+ akavu, ko Hanuna ɔnande akayala nkumekanga lo dihole diande.+ 2 Ko Davidɛ akate ate: “Dimi layɛnya Hanuna ɔna Nahashi ngandji ka kɔlamelo oko wakamɛnya she ngandji ka kɔlamelo.” Ɔnkɔnɛ, Davidɛ akatome ekambi ande dia toosamba l’ɔtɛ wa nyɔi ka she. Koko lam’akakome ekambi wa Davidɛ l’ɛtshi ka nkɛtɛ k’ase Amɔna, 3 ewandji w’ase Amɔna wakatɛ nkumɛwɔ Hanuna vate: “Onde wɛ fɔnyaka dia Davidɛ ekɔ lo mbisha shɔ nɛmɔ lo woho wamondokotomɛ anto dia ndjokosamba? Shi dia ndjenda osomba ndo dia ndjookemba ko vɔ mbolanya kotomi Davidɛ ekambi ande le yɛ?” 4 Ɔnkɔnɛ, Hanuna akɔshi ekambi wa Davidɛ ko akawanya etenyi ka l’ahende ka ndɛdu+ ndo akahembola ahɔndɔ awɔ lo 2 lo asɔkɔ, ko akaakimɔ. 5 Lam’akawayotɛ Davidɛ, mbala kakɔ ɔtɔi nde akatome anto dia tohomana la wɔ, nɛ dia apami akɔ wakashama nsɔnyi lo yɛdikɔ y’efula. Nkumekanga akawatɛ ate: “Nyotshikale la Jeriko+ polo lam’ayodɔ ndɛdu yanyu ko nyu ndjokalola.”
6 Oma laasɔ, ase Amɔna wakɛnyi dia waya nyama nsolo le Davidɛ; ɔnkɔnɛ ase Amɔna wakatome dui dia toyanga ase Suriya wa la Bɛtɛ-Rɛhɔba+ ndo ase Suriya wa la Zoba,+ asɔlayi nunu akumi ahende (20 000) wakɛndakɛnda l’ekolo; ndo nkumekanga ka Maaka+ l’apami kinunu (1 000), ndo oma la Ishitɔbɛ* apami nunu dikumi la pende (12 000).+ 7 Lam’akoke Davidɛ dui sɔ, nde akatome Jɔaba l’asɔlayi tshɛ, mbidja ndo andɔshi ande wa ta woleki wolo.+ 8 Ko ase Amɔna wakatombe, wakalɔngama dia ndɔ ta la soko di’osomba ndo ase Suriya wa la Zoba ndo wa la Rɛhɔba kaamɛ la Ishitɔbɛ* ndo Maaka waki vɔamɛ l’oswe.
9 Lam’akɛnyi Jɔaba dia wayanga mbɔlɔsha oma la ntondo ndo oma l’ɔkɔngɔ, nde akasɔnɛ elui ɛmɔtshi w’asɔlayi woleki diewo lo Isariyɛlɛ, ko akaalɔngɛ dia ndɔsha ase Suriya.+ 10 Nde akatshike apami akina tshɛ lo ɛlɔmbwɛlɔ* kaki Abishai+ ɔnango dia nde mbalɔnga dia vɔ ndɔsha ase Amɔna.+ 11 Ko nde akate ate: “Naka ase Suriya wambondeka wolo, ko wɛ ndja ndjombitsha; ko naka ase Amɔna wambokoleka wolo, dimi layoya ndjokotsha. 12 Sho pombaka nkeketala ndo monga la dihonga+ dikambo dia wodja aso ndo di’esomba wa Nzambi kaso, ko Jehowa ayosala kɛnɛ kele ɔlɔlɔ lo washo ande.”+
13 Oma laasɔ, Jɔaba l’apami waki kaamɛ la nde wakasukana dia mpomana l’ase Suriya lo ta, ko vɔ wakalawɔ oma la ntondo kande.+ 14 Lam’akɛnyi ase Amɔna dia ase Suriya wambolawɔ, vɔ wakalawɔ Abishai ko wakɔtɔ l’osomba. L’ɔkɔngɔ wa laasɔ, Jɔaba akakalola oma laka ase Amɔna ko akaye la Jɛrusalɛma.
15 Lam’akɛnyi ase Suriya dia ase Isariyɛlɛ wambaalɛndja, vɔ wakatshumana.+ 16 Ko Hadadɛzɛrɛ+ akatome dui dia vɔ telɛ ase Suriya lo ɛtshi ka nkɛtɛ kele suke la Ɔkɛdi,*+ ko vɔ wakaye la Hɛlamɛ vɔ la Shobaka owandji w’asɔlayi wa Hadadɛzɛrɛ lakayawalɔmbɔlaka.
17 Lam’akawayotɛ Davidɛ, mbala kakɔ ɔtɔi nde akasanganya ase Isariyɛlɛ tshɛ, ko wakatehɔ Jɔrdana ndo wakakome la Hɛlamɛ. Oma laasɔ, ase Suriya wakalɔngama dia ndɔ la Davidɛ, ko wakɔɔlɔsha.+ 18 Koko ase Suriya wakalawɔ ase Isariyɛlɛ ndo Davidɛ akadiake anto 700 wakɛndjakɛndja pusupusu ndo ambahemi wa mfalasa w’ase Suriya nunu akumi anɛi (40 000), ndo nde akakɔmɔla Shobaka owandji awɔ w’asɔlayi, ko nde akavu laawɔ.+ 19 Lam’akɛnyi nkumi ya dikanga tshɛ, ekambi wa Hadadɛzɛrɛ dia ase Isariyɛlɛ wambaalɛndja, aha la ntshimbatshimba, vɔ wakadje wɔladi vɔ l’ase Isariyɛlɛ, ko wakayala l’ɛse kawɔ.+ Ase Suriya wakoke wɔma dia nkimanyiya ase Amɔna nto.