2 Samuɛlɛ

20 L’etena kɛsɔ, onto ɔmɔtshi akadjaka ofukutanu, lokombo lande Shɛba+ ɔna Bikiri, oseka Bɛnjamina. Nde akade dimama+ ndo akate ate: “Ndooko kasaso la Davidɛ ndo sho ndooko la etenyi k’okitɔ le ɔna Jɛse.+ Isariyɛlɛ le,+ onto l’onto atshu le tozambizambi* tande!” 2 Ko apami tshɛ w’ase Isariyɛlɛ wakatshike ndjela Davidɛ, wakayele Shɛba ɔna Bikiri.+ Koko apami w’ase Juda w’oma la Jɔrdana polo la Jɛrusalɛma+ wakamamema nkumekanga kawɔ.

3 Lam’akakome Davidɛ lo luudu* lande la Jɛrusalɛma,+ nkumekanga akɔshi eseka 10 wakandatshike dia namaka luudu, ko nde akawadje lo luudu+ lɔmɔtshi dia vɔ namema. Nde akawashaka mbo ya ndɛ, koko nde kombeyana la wɔ.+ Vɔ wakatshikala lo shasa polo lushi lakawavu, ndo waki oko wadi waki edo kaanga mbakiwɔ la omi laakasɛnɛ.

4 Ko nkumekanga akatɛ Amasa ate:+ “Elɛ apami w’aseka Juda kele waye le mi lo nshi 3 ndo wɛ lawɔ pombaka monga laawɔ.” 5 Ɔnkɔnɛ Amasa akatshu telɛ aseka Juda, koko nde akayoya l’ɔkɔngɔ w’etena kakawawosha kakashikikɛma dikambo diande. 6 Oma laasɔ, Davidɛ akatɛ Abishai+ ate: “Shɛba+ ɔna Bikiri mbeyaka tosalɛ kɔlɔ koleki kɛnɛ kakasale Abisalɔma.+ Ɔsa ekambi wa nkumɛyɛ, kele nyowotshanya diaha nde nkoma lo esomba wodingami la mpele ko nde ndjotolawɔ.” 7 Ko apami waki Jɔaba,+ ase Kerɛtɛ, ase Pelɛtɛ+ ndo apami wa wolo tshɛ wakooyele. Vɔ wakamɔ oma la Jɛrusalɛma dia mbitshanya Shɛba ɔna Bikiri. 8 Lam’akawakome suke la dive dia woke dia la Ngibiyɔna,+ Amasa+ akaye ndjohomana la wɔ. Jɔaba akalɔtɛ ahɔndɔ ande wa ta ndo nde akasɔmɛ lokuwa la ta laki lo dihoso dialɔ lo lokende. Lam’akandasɛmɛ yema, lokuwa lakɔ lakakɔ.

9 Jɔaba akatɛ Amasa ate: “Onde wɛ ekɔ ki, ɔnalengo?” Ko Jɔaba akakimɛ Amasa lo ndɛdu la lonya lande l’omi oko onto lalanga mbosha bizɛ. 10 Amasa kombewɔ lo woho waki lokuwa lo lonya la Jɔaba, ko Jɔaba akawokelɔ lo dikundju,+ ko ɛsɔhi wakatombe ndo wakakɔ la nkɛtɛ. Nde kombokalɔ nto, nɛ dia mbala 1 akakoke dia mbodiaka. Oma laasɔ, Jɔaba nde la Abishai w’ɔnango wakayelana la Shɛba ɔna Bikiri.

11 Ɔlɔngɔ a pami ɔmɔtshi waki Jɔaba akemala lalende, ko akataka ate: “Onto tshɛ lele lo wedi waki Jɔaba ndo onto tshɛ lele lo wedi waki Davidɛ ayele Jɔaba!” 12 L’etena kɛsɔ tshɛ, Amasa akangitɔka lo dikila diande l’atei w’otadimbo. Lam’akɛnyi pami kakɔ dia anto tshɛ wekɔ lo memala lalende, nde akanya Amasa oma l’otadimbo ko akɔɔtɔlɛ l’okonda. Oma laasɔ nde akawofɛ dihɔndɔ, nɛ dia nde akɛnyi dia anto tshɛ wakemalaka etena kakawakomaka lalende. 13 L’ɔkɔngɔ wa nde mbonya oma l’otadimbo, apami tshɛ wakayele Jɔaba dia mbitshanya Shɛba+ ɔna Bikiri.

14 Shɛba aketeta lo waoho tshɛ w’Isariyɛlɛ polo lo Aabɛlɛ wa la Bɛtɛ-Maaka.+ Aseka Bikiri wakasangana ko wakooyele.

15 Jɔaba nde l’apami ande* wakakome, ko wakoodinge lo Aabɛlɛ wa la Bɛtɛ-Maaka ndo wakake lokombo dia dinga osomba lam’ele vɔ waki l’etei ka lokombo. Ko apami tshɛ waki Jɔaba wakatshime l’ɛse k’ehele dia kinyukola. 16 Ko womoto ɔmɔtshi la lomba akawelɛ oma l’osomba ate: “Nyolonge, nyolonge! Lam’alanganyu, nyote Jɔaba nyate: ‘Yaka lanɛ kele ndjokote dui dimɔtshi.’” 17 Ɔnkɔnɛ nde akatshu suke la nde, ko womoto akɔ akate ate: “Onde wɛ kele Jɔaba?” Nde akakadimola ate: “Eelo, dimi.” Ko womoto akɔ akawotɛ ate: “Hokamɛ awui w’okambi ayɛ.” Nde akate ate: “Lekɔ lo kohokamɛ.” 18 Womoto akɔ akatetemala mbuta ate: “Wakataka lo nshi y’edjedja vate: ‘Watoyange kanyi l’osomba wa Aabɛlɛ, ’ko dikambo diakɔ diayoshila. 19 Dimi lekɔ onyimpala w’akanga wa wɔladi ndo wa kɔlamelo wa l’Isariyɛlɛ. Wɛ ekɔ lo nyanga dia ndanya osomba wele oko ombutshi wa womoto lo Isariyɛlɛ. Lande na kahombayɛ nshila* etenyi k’okitɔ ka Jehowa oshiki?”+ 20 Jɔaba akakadimola ate: “Dimi bu la kanyi ya nshila osomba akɔ oshiki ndo mbolanya. 21 Aha ngasɔ mbediɔ. Koko pami kelɛwɔ Shɛba,+ ɔna Bikiri k’oma lo lɛkɛ l’akona la Efrayimɛ+ akatɔmbɔkwɛ* nkumekanga Davidɛ. Naka nyu nkimɔ pami kɛsɔ, kete dimi layomɔ oma l’osomba.” Ko womoto akɔ akatɛ Jɔaba ate: “Eenda, wayokookɛ ɔtɛ ande oma l’ehele!”

22 Mbala kakɔ ɔtɔi, womoto akɔ la lomba akɔtɔ le ase osomba tshɛ, ko vɔ wakahembola Shɛba ɔna Bikiri ɔtɛ ndo wakawokɛ Jɔaba. Ko nde akade dimama, ndo vɔ wakamɔ oma l’osomba, onto l’onto akatshu lakande.+ Jɔaba akakalola la Jɛrusalɛma le nkumekanga.

23 L’etena kɛsɔ, Jɔaba aki ɔnɔmbɔdi w’asɔlayi tshɛ wa l’Isariyɛlɛ.+ Bɛnaya+ ɔna Jɛhɔyada+ kakalɔmbɔlaka ase Kerɛtɛ ndo ase Pelɛtɛ.+ 24 Adɔrama+ kakalɔmbɔlaka wanɛ wakawakandjaka elimu la wolo. Jɛhɔshafata+ ɔna Ahiludɛ aki ɔkɔndɔdi. 25 Shɛva aki ofundji ndo Zadɔka+ nde la Abiyatara+ waki ɛlɔmbɛdi. 26 Ira ose Jayira nde lawɔ aki okambi wa woke* waki Davidɛ.