Ɛzɛkiyɛlɛ
8 Lo ɔnɔnyi wa 6, lo ngɔndɔ ka 6 nshi 5, etena kakimi lodjashi lo luudu lami ndo dikumanyi dia Juda wodjashi la ntondo kami, lonya la Nkum’Olongo Nkumadiɔndjɔ Jehowa lakankimɛ lɛkɔ. 2 Etena kakamendaka, mɛnyi ko efanelo kɛmɔtshi kafɔna la ɛnamelo ka dja; dja yaki l’ɛse ka kɛnɛ kakɛnamaka oko lokende lande, ndo oma lo lokende+ lande otsha la diko ɛnamelo kande kaki ngaingai, oko ngaingai ka mfɛsa kosanganyi la paonyi.+ 3 Ko nde akasembola kɛnɛ kakɛnamaka oko lonya ko akankimɛ lo wɔɔngi wa divo wa l’ɔtɛ ami, ko nyuma kɛmɔtshi kakamɛmbɛ lam’asa olongo la nkɛtɛ ndo kakantɔlɛ la Jɛrusalɛma lo tshimbo ya waɛnɛlɔ w’oma le Nzambi, lo ɛɔtwɛlɔ ka soko+ dia l’etei diɛlane la lɛkɛ la nɔrdɛ, lɛnɛ akawemɛ djembetelo* ya ekishi ka kandjema katshutshuya dia monga la kandjema.+ 4 Mɛnyi ko lotombo la Nzambi ka Isariyɛlɛ laki lɛkɔ,+ oko ɛnamelo kakamɛnyi lo okidi.+
5 Ko nde akambutɛ ate: “Ɔna onto, lam’alangayɛ edia washo ayɛ otsha lo nɔrdɛ.” Ko dimi lakedia washo ami otsha lo nɔrdɛ, ndo lɛkɔ, lo nɔrdɛ ka soko dia elambwelo djembetelo* yakɔ ya kandjema yaki la soko. 6 Ko nde akambutɛ ate: “Ɔna onto, onde wɛ ekɔ lo mɛna akambo wa diambo wa wɔnɔnyi wasala luudu la Isariyɛlɛ lanɛ,+ akambo wasala dia dimi mangana etale la tɛmpɛlɔ kami k’ekila?+ Koko wɛ ayɛna akambo wa wɔnɔnyi woleki ndo wanɛ diambo efula.”
7 Oma laasɔ, nde akantɔlɛ lo soko dia sɛkɛ, ndo lam’akamende, dimi lakɛnyi wosho lo ehele. 8 Ko nde akambutɛ ate: “Ɔna onto, lam’alangayɛ tondola wosho lo ehele.” Ko dimi lakatondola wosho lo ehele ndo lakɛnyi soko dimɔtshi. 9 Nde akambutɛ ate: “Ɔtɔ kele enda akambo wa kɔlɔ wa wɔnɔnyi wasalema lanɛ.” 10 Ko dimi lakɔtɔ ndo lakende ko lakɛnyi weho tshɛ wa difanelo dia diangɔ diayakotola ndo nyama+ ya wɔnɔnyi ndo dikishi tshɛ dia nyɛtɛɛtɛ* dia lo luudu la Isariyɛlɛ;+ diɔ diakasangema lo ehele lo otshimbedi w’otondo. 11 Dikumanyi 70 dia lo luudu la Isariyɛlɛ wakemala la ntondo kawɔ, ndo Jazaniya ɔna Shafana+ akemala l’atei awɔ. Onto la onto aki la mpanu kande ka tshɔ ndo edinga wa opumu wa tshɔ wakadɛka.+ 12 Nde akambutɛ ate: “Ɔna onto, onde wɛ ekɔ lo mɛna kɛnɛ kasala dikumanyi dia lo luudu la Isariyɛlɛ lo wodjima, onto l’onto lo mvudu ya l’etei lɛnɛ okitshami dikishi diande?* Nɛ dia vɔ mbutaka vate: ‘Jehowa hatɛnyi. Jehowa ambomɔka oma lo wodja.’”+
13 Ko nde akambutɛ ate: “Wɛ ayɛna akambo wa wɔnɔnyi wa diambo efula wasalawɔ woleki ndo wanɛ.” 14 Ko nde akantɔlɛ lo ɛɔtwɛlɔ ka soko dia lo nɔrdɛ dia lo luudu la Jehowa, ndo lɛkɔ dimi lakɛnyi wamato wodjashi ndo walela jambizambi Tamuza.
15 Nde akambutɛ nto ate: “Ɔna onto, onde wɛ ekɔ lo mɛna dikambo dingo? Wɛ ayɛna akambo wa wɔnɔnyi wa diambo efula woleki ndo wanɛ.”+ 16 Ko nde akantɔlɛ lo sɛkɛ dia l’etei dia luudu la Jehowa.+ Lɛkɔ la soko dia tɛmpɛlɔ ka Jehowa, lam’asa tshoto y’otale la elambwelo, apami oko 25 waki laawɔ wosha ɛkɔngɔ awɔ otsha lo tɛmpɛlɔ ka Jehowa ndo wɛdiyisha dungi diawɔ otsha lo ɛstɛ; vɔ wakakusamɛka wonya lo ɛstɛ.+
17 Nde akambutɛ ate: “Ɔna onto, onde wɛ ekɔ lo mɛna dikambo dingo? Onde ekɔ dui dia tshitshɛ dia luudu la Juda nsala akambo wa wɔnɔnyi anɛ, dia ndodia wodja la awui wa ngala+ ndo dia ntetemala mbokiyami nkɛlɛ? Vɔ wekɔ lo ndjasɔsɔmiya dianga* oya lo ɛhɛmbɛ ami. 18 Ɔnkɔnɛ, dimi layosala akambo la nkɛlɛ. Sso diami hadiotowaoka kandji;+ ndo dimi hantowaoka kɛtshi. Kaanga mbalelawɔ la dui dia wolo lo atoyi ami, dimi hantowaoka.”+