1 Kɔrɛtɔ

7 Lo kɛnɛ kendana la akambo wakanyafundɛ, ndeka dimɛna aha pami minanda* womoto. 2 Koko l’ɔtɛ wambofulanɛ awui wa mindo wa dieyanelo,* pami tshɛ onge la wadɛnde hita+ ndo womoto tshɛ onge la omɛnde hita.+ 3 Omi asha wadɛnde kɛnɛ kahombande nongola, ndo wadi asale woho akɔ waamɛ otsha le omɛnde.+ 4 Wadi keema la lowandji lo demba diande hita paka omɛnde; woho akɔ waamɛ, omi keema la lowandji lo demba diande hita paka wadɛnde. 5 Tanyodimanake lam’asanyu, onyake naka nyambokana nyu akɔ 2 l’edja ka etena kakashikikɛma dia nyu ndjasha lo dɔmbɛlɔ ko nyu ndjonga kaamɛ nto diaha Satana ntetemala nyohemba l’ɔtɛ wahanyayakimɛ. 6 Koko nyɔshi dikambo sɔ oko dako, aha oko didjango. 7 Dimi kombolaka dia apami tshɛ monga oko dimi. Koko onto l’onto akalongola losha lande hita+ oma le Nzambi, ɔnɛ woho ɔnɛ ndo okina woho okina.

8 Kakianɛ dimi lambotɛ enyemba la wadi waki edo nte: Ndeka dimɛna vɔ ntshikala oko dimi.+ 9 Ko naka vɔ hawokoke ndjakimɛ, kete watshukane, nɛ dia ndeka dimɛna ntshukana lo dihole dia mɛnaka paa la mposa.+

10 Dimi lambosha atshukanyi alako, aha dimi koko Nkumadiɔndjɔ, dia wadi hahombe nkakitɔna la omɛnde.+ 11 Koko naka nde ambokakitɔna la nde, kete atotshukamake kana akalole le omɛnde. Ndo omi hahombe ntshika wadɛnde.+

12 Koko le anto akina, ɛɛ, aha Nkumadiɔndjɔ,+ koko dimi kawatɛ nte: Naka ɔnangɛso ɔmɔtshi ekɔ la wadi lele bu ombetawudi ko womoto akɔ mbetawɔka mbidjasɛ kaamɛ la nde, nde atootshikake. 13 Ndo naka womoto ekɔ la omi lele bu ombetawudi ko omɛnde mbetawɔka ntshikala kaamɛ la nde, nde atotshikake omɛnde. 14 Nɛ dia omi lele bu ombetawudi ambokidiama l’ɔtɛ wa wadɛnde ndo wadi lele bu ombetawudi ambokidiama l’ɔtɛ wa ɔnangɛso. Otonga aha ngasɔ, tshike ananyu wotonga mɛtɛ mindo, koko kakianɛ vɔ wekɔ ekila. 15 Koko naka ɔnɛ lele bu ombetawudi ambɔsa yɛdikɔ ya ntshɔ,* nde atshu; l’etena kɛsɔ ɔnangɛso kana kadiyɛso hakelekami, koko Nzambi akanyelɛ lo wɔladi.+ 16 Nɛ dia wɛ wadi, eeya kana wɛ ayoshimbɛ omɛyɛ?+ Kana wɛ omi, eeya kana wɛ ayoshimbɛ wadɛyɛ?

17 Lam’ele Jehowa* aketawɔ dia onto l’onto monga woho ɔmɔtshi, onto l’onto akɛndɛkɛndɛ oko wakawelɛ Nzambi.+ Ngasɔ mbashami ɛlɔmbwɛlɔ lo tshumanelo tshɛ. 18 Onde onto ɔmɔtshi akelamɛ etena kakinde ambonya mpota?+ Nde atongake oko onto lahatanya mpota. Onde onto ɔmɔtshi akelamɛ etena kakinde atanya mpota? Nde atonyake mpota.+ 19 Aha ɔnɛ minya mpota kana hanyisha mpota kele ohomba,+ koko kɛnɛ kele ohomba ele nkitanyiya ɛlɛmbɛ wa Nzambi.+ 20 Onto l’onto atshikale woho wakinde+ l’etena kakandelamɛ. 21 Onde wɛ akelamɛ etena kakiyɛ mfumbe? Toyakiyanyake,+ koko naka wɛ kokaka ntshungɔ, kete kamba la diaaso sɔ. 22 Nɛ dia onto tshɛ lakelamɛ lo Nkumadiɔndjɔ etena kakinde mfumbe ambotshungɔ le Nkumadiɔndjɔ.+ Popo ndo onto lakelamɛ etena kakinde la lotshungɔ ekɔ mfumbe ka Kristo. 23 Nyu nyakasombama la oshinga ɔmɔtshi,+ nyotshike monga mfumbe y’anto. 24 Analengo, oyadi woho akɔna waki onto etena kakandelamɛ, nde atshikale woho akɔ la ntondo ka Nzambi.

25 Lo kɛnɛ kendana la dimuma,* dimi ndooko la didjango oma le Nkumadiɔndjɔ, koko dimi lambosha kanyi yami+ oko wemi onto lakokama kɛtshi oma le Nkumadiɔndjɔ dia monga la kɔlamelo. 26 Ɔnkɔnɛ, dimi fɔnyaka dia ndeka dimɛna pami ntshikala oko wende lo menda ekakatanu wa nshi nyɛ. 27 Onde wɛ kelekama le wadi? Toyangake dia ntshungɔ.+ Onde wɛ bu la wadi? Toyangake wadi. 28 Koko oyadi kaanga wɛ ntshukana, wɛ hasadi pɛkato. Ndo naka ɔnɛ leke emuma ambotshukana, nde hasadi pɛkato. Koko wanɛ watshukana wayonga la asui lo alemba awɔ. Koko dimi lekɔ lo nyanga dia nyohandja.

29 Ndo nto analengo, dimi lambonyotɛ nte: Etena kambotshikala kambosusama.+ Oma ko kakianɛ, wanɛ wele la wadi wonge oko wanɛ wele bu la wadi. 30 Wanɛ walela wonge oko wanɛ wahalele, wanɛ wangɛnangɛna wonge oko wanɛ wahangɛnangɛna ndo wanɛ wasomba wonge oko wanɛ wele bu la ɛngɔ. 31 Wanɛ wakamba la andja ɔnɛ wonge oko wanɛ wahakambe la wɔ tshɛ lo tshɛ, nɛ dia akambo weta lo andja ɔnɛ wekɔ lo tatshikitana. 32 Lo mɛtɛ, dimi nangaka diaha nyu monga la ekiyanu. Pami k’onyemba ndjakiyanyaka lo akambo wa Nkumadiɔndjɔ, woho wakokande ngɛnyangɛnya Nkumadiɔndjɔ. 33 Koko pami kambotshuka ndjakiyanyaka dia akambo wa lo andja ɔnɛ,+ woho wakokande ngɛnyangɛnya wadɛnde, 34 ko nde ambokahanyema. Womoto l’onyemba ndo l’emuma ndjakiyanyaka lo akambo wa Nkumadiɔndjɔ,+ dia nde monga ekila lo demba ndo lo yimba. Koko womoto lotshukami ndjakiyanyaka dia akambo wa lo andja ɔnɛ, woho wakokande ngɛnyangɛnya omɛnde. 35 Koko lekɔ lo mbuta akambo asɔ lo wahɔ anyu nyuamɛ, aha dia nyodja lo shasa,* koko dia nyokonya lo kɛnɛ kele ɔlɔlɔ ndo lo omamemelo wa wonya tshɛ le Nkumadiɔndjɔ, aha la wɛɛwɛwɔ.

36 Koko naka onto fɔnyaka dia nde ekɔ lo nsala kɔlɔ lo ntshikala onyemba,* ndo naka nde ambolekanya ɛnɔnyi wa dikɛnda, kete kɛnɛ kahomba salema tɔ kɛnɛ: Nde asale kɛnɛ kalangande; nde hasadi pɛkato. Nde atshukane.+ 37 Koko naka onto amboyashikikɛ l’otema ande ndo nde hɛnyi ohomba dia ntshukana, ko nde ekɔ la lotshungɔ la nsala kɛnɛ kalangande ndo naka nde ambɔsa yɛdikɔ lo otema ande dia ntshikala onyemba,* nde ambosala dimɛna.+ 38 Ndo nto, onto latshukana* ambosala dimɛna, koko ɔnɛ lahatshukana ayoleka nsala dimɛna.+

39 Womoto lotshukami kelekama le omɛnde edja tshɛ keke omɛnde la lɔsɛnɔ.+ Ko naka omɛnde ambolala djɔ lo nyɔi, kete nde aya la lotshungɔ la ntshukama la pami tshɛ kalangande, koko paka lo Nkumadiɔndjɔ.+ 40 Koko lo ndjela kanyi yami, nde ayoleka monga l’ɔngɛnɔngɛnɔ naka nde ntshikala woho wende. Dimi fɔnyaka mɛtɛ dia dimi lawɔ lekɔ la nyuma ka Nzambi.