Isaya
63 Akɔna ongo ayaye oma la Ɛdɔmɛ,+
Oma la Bɔzara+ la ahɔndɔ wele la dangi dia ngaingai,*
Ɔnɛ lele la ahɔndɔ wa lɔnɛnɛ,
Layakɛndakɛnda lo wolo ande w’efula?
“Ele dimi, Ɔnɛ latɛkɛta la losembwe,
Ɔnɛ lele la wolo w’efula wa nshimbɛ.”
2 Lande na kele ahɔndɔ ayɛ beela,
Ndo lande na kele ahɔndɔ ayɛ oko wa ɔnɛ lahɔtshahɔtsha diamula?+
3 “Dimi lakamula wanu dimɛ.
Ndooko onto laki kaamɛ la mi.
Dimi lakatetemala mbahɔtshahɔtsha lo nkɛlɛ kami,
Ndo lakatetemala mbakamɛ lo odudu ami.+
Ahɔndɔ ami wakatamɛ dikila diawɔ,
Ndo dimi lakadje ahɔndɔ ami tshɛ mindo.
4 Nɛ dia lushi la nsɔmbɔya lekɔ lo otema ami,+
Ndo ɔnɔnyi wa atshungɔmi ami wambokoka.
5 Dimi lakende, koko ndooko onto lakikɔ dia kimanyiyami;
Dimi lakaambe dia ndooko onto lakikɔ dia sukɛmi.
6 Dimi lakahɔtshahɔtsha anto la nkɛlɛ kami,
Dimi lakawadjoya la odudu ami+
Ndo lakatshola dikila diawɔ lo nkɛtɛ.”
7 Dimi layɔtɛkɛta dikambo dia etsha wa ngandji ka kɔlamelo ka Jehowa,
Etsha wasungana tombɔma wa Jehowa,
L’ɔtɛ wa kɛnɛ tshɛ kakatosalɛ Jehowa,+
Akambo efula w’amɛna wakandasalɛ luudu la Isariyɛlɛ,
Lo ndjela kɛtshi kande ndo ngandji kande ka kɔlamelo k’efula.
8 Nɛ dia nde akate ate: “Lo mɛtɛ vɔ wekɔ anto ami, ana wahatoshisha kɔlamelo.”*+
Ɔnkɔnɛ, nde akayala Oshimbedi awɔ.+
9 Lo asui awɔ tshɛ nde akasowaka.+
Ko ɔkɛndji* ande hita akaashimbɛ,+
Lo ngandji ndo kɛtshi kande nde akaatshungola,+
Ndo nde akawadiya ndo akawaɛmbɛ vɔ tshɛ lo nshi y’edjedja.+
10 Koko vɔ wakatɔmbɔkɔ+ ndo wakanyangiya nyuma kande k’ekila.+
11 Ko vɔ wakohɔ nshi y’edjedja,
Nshi ya Mɔsɛ okambi ande ɔnɛ:
“Lende ele Ɔnɛ lakaatondja oma lo ndjale+ kaamɛ la alami w’ɛkɔkɔ ande?+
Lende ele Ɔnɛ lakadje nyuma Kande k’ekila le nde,+
12 Ɔnɛ lakasale dia lonya lande la diambo ntshɔ kaamɛ la lonya l’omi la Mɔsɛ,+
Ɔnɛ lakaate ashi la ntondo kawɔ+
Dia ndjasalɛ lokombo la pondjo,+
13 Ɔnɛ lakaakɛndjakɛndja l’atei w’ashi wambɔmbɔ,*
Dia vɔ nkɛndakɛnda aha la ntakana,
Oko mfalasa lo oswe wa hwe?*
14 Oko etena kaholɔ dongalonga l’okidi,
Nyuma ka Jehowa kakasale dia vɔ momuya.”+
15 Enda oma l’olongo kele ɛnyi
Oma lo edjaselo kayɛ ka la diko k’ekila ndo ka lotombo.*
Vɔ wambomɔ oma le mi.
16 Nɛ dia wɛ kele Shɛso;+
Kaanga mbele ondo Abrahama hateye
Ndo ondo Isariyɛlɛ hateye,
Jehowa le, wɛ kele Shɛso.
Lokombo layɛ ele Otshungodi aso oma ko edjedja.+
17 Jehowa le, lande na ketawɔyɛ dia sho minganɛ* oma lo mboka yayɛ?
Lande na ketawɔyɛ* dia etema aso monga wolo, ko hatoyokooka wɔma?+
Okalole, l’ɔtɛ wa ekambi ayɛ,
Waoho wa etenyi kayɛ k’okitɔ.+
18 Wodja ayɛ w’ekila wakawɔshi lo tshanda ya tshitshɛ.
Andɔshi aso wakahɔtshahɔtsha tɛmpɛlɔ kayɛ k’ekila.+
19 Nɛ dia edja efula sho takayala oko wanɛ wele wɛ atongaka owandji awɔ,
Oko wanɛ wahatelɛka lokombo layɛ.