1 Samuɛlɛ
9 Pami kɛmɔtshi k’oseka Bɛnjamina, lokombo lande Kisha+ ɔna Abiyɛlɛ, ɔna Zerorɛ, ɔna Bɛkɔrata, ɔna Afiya oseka Bɛnjamina+ aki pami k’ɔngɔnyi efula. 2 Nde aki la ɔna ɔmɔtshi, lokombo lande Saolo+ laki ɔlɔngɔlɔngɔ ndo olangala efula. L’atei w’ase Isariyɛlɛ tshɛ, ndooko onto laki olangala oko nde ndo nde aki otale efula, anto akina tshɛ wakawondaka lo ahɛka.
3 Lam’akashishɔ mponda* yaki Kisha ka she Saolo, Kisha akatɛ ɔnande Saolo ate: “Lam’alangayɛ, ɔsa okambi ɔmɔtshi kele nyotoyange mponda.” 4 Ko vɔ waketeta lo lɛkɛ l’akona la Efrayimɛ w’otondo ndo l’ɛtshi ka nkɛtɛ ka Shalisha k’otondo, koko vɔ kondjiɛna. Vɔ waketeta l’ɛtshi ka nkɛtɛ ka Shalima k’otondo, koko mponda yakɔ komonga lɛkɔ. Vɔ waketeta l’ɛtshi ka nkɛtɛ k’aseka Bɛnjamina k’otondo, koko vɔ kondjiɛna.
5 Vɔ wakatokoma l’ɛtshi ka nkɛtɛ ka Zufu, ko Saolo akatɛ okambi ande waki kaamɛ la nde ate: “Yete tokalole, diaha papa ndjotatɛ ndjakiyanya dikambo diaso lo dihole dia ndjakiyanya dikambo dia mponda.”+ 6 Ko okambi akɔ akookadimola ate: “Okambi wa Nzambi ɔmɔtshi ekɔ l’osomba ɔnɛ; pami kele la nɛmɔ efula. Kɛnɛ tshɛ katande kotshamaka.+ Yete totshu lɛkɔ. Ondo nde koka tototɛ lɛnɛ akokaso ntshɔ.” 7 Ko Saolo akatɛ okambi ande ate: “Naka sho ntshɔ, ayotɔtɔlɛ pami kakɔ? Taya bu la mapa lo atapa aso; ndo ndooko ɛngɔ kakokaso tɔlɛ okambi wa Nzambi ka mɛtɛ oko woshasha. Kakɔna kele la so?” 8 Ko okambi akɔ akakadimola Saolo nto ate: “Dimi lekɔ la k’anɛi ɔtɔi ka shɛkɛlɛ* ya mfɛsa lo lonya lami. Dimi layotokisha okambi wa Nzambi ka mɛtɛ kele nde katote lɛnɛ akokaso ntshɔ.” 9 (Nshi ya ntondo lo Isariyɛlɛ, naka onto ambolanga ntshɔ toyanga Nzambi, nde akataka ate: “Nyoyete totshu le ɔmɛnyi w’akambo woshɛmi.”+ Nɛ dia wanɛ welamɛ amvutshi nshi nyɛ wakelamɛka lo nshi ya ntondo ɔnɛ ɛmɛnyi w’akambo woshɛmi.) 10 Ko Saolo akatɛ okambi ande ate: “Kɛnɛ katayɛ kekɔ dimɛna. Ɛsɔ totshu.” Ko vɔ wakatshu otsha l’osomba akɔ lɛnɛ aki okambi wa Nzambi ka mɛtɛ.
11 Lam’akawatadɛka lo dikona di’otsha l’osomba akɔ, vɔ wakahomana l’ana wa wamato watatshu totahola ashi. Ko wakawambola vate: “Onde ɔmɛnyi w’akambo woshɛmi+ ekɔ lanɛ?” 12 Vɔ wakakadimola vate: “Eelo. Nde ekɔ la ntondo kanyu! Nyosamanya, nɛ dia ɛlɔ kakandaye l’osomba ɔnɛ, dikambo anto wekɔ lo nambola olambo+ ɛlɔ lo dihole dia la diko.+ 13 Kam’ayonyɔtɔ l’osomba, nyayowotana la ntondo ka nde ntshɔ lo dihole dia la diko dia tɔlɛ. Anto hawotɔlɛ paka nde ambokoma, nɛ dia nde katshɔkɔla olambo. Paka nde ambosala ngasɔ ko anto wakelame ndjɔlɛ. Ɔnkɔnɛ nyotshu, nyosembɔ tɔɔ ko nyayowotana.” 14 Ko vɔ wakadɛ otsha l’osomba. Lam’akawatɔtɔka l’atei w’osomba, Samuɛlɛ akayatombaka dia ndjohomana la wɔ dia mbidɛ otsha lo dihole dia la diko.
15 Lushi 1 la ntondo ka Saolo ndja, Jehowa akatɛ* Samuɛlɛ ate: 16 “Loyi oya lo wonya ɔnɛ, dimi layotoma pami kɛmɔtshi ka l’ɛtshi ka nkɛtɛ ka Bɛnjamina+ oya le yɛ. Kowokite esɔ dia nde sɔnama oko ɔnɔmbɔdi wa wodja ami, Isariyɛlɛ,+ ndo nde ayoshimbɛ wodja ami oma lo anya w’ase Filistiya. Nɛ dia dimi lambɛna sui dia wodja ami ndo alelo awɔ wambokoma polo le mi.”+ 17 Lam’akɛnyi Samuɛlɛ Saolo, Jehowa akawotɛ ate: “Ɔnɛ kele onto lakamakotɛ nte: ‘Nde kayɔlɔmbɔla wodja ami.’”+
18 Ko Saolo akasukana otsha le Samuɛlɛ l’atei atei wa soko ko akawotɛ ate: “Lam’alangayɛ, ombutɛ, lende ele luudu laki ɔmɛnyi w’akambo woshɛmi?” 19 Samuɛlɛ akakadimola Saolo ate: “Dimi kele ɔmɛnyi w’akambo woshɛmi. Tshɔka la ntondo kami otsha lo dihole dia la diko, dimi layɔlɛ kaamɛ la nyu ɛlɔ.+ Dimi layokɔkɛndja la pindju ndo layokotɛ kɛnɛ tshɛ kalangayɛ mbeya.* 20 Lo kɛnɛ kendana la mponda yakashishɔ ambeta nshi 3,+ toyakiyanyake dikambo diayɔ, nɛ dia yɔ yambɛnama. Ko akanga diangɔ dia nɛmɔ tshɛ dia lo Isariyɛlɛ? Shi diayɛ mbediɔ ndo dia nkumbo k’otondo ka shɔ?”+ 21 Ko Saolo akakadimola ate: “Shi dimi oseka Bɛnjamina kemi, dioho dioleki tshitshɛ l’atei wa waoho wa lo Isariyɛlɛ,+ ndo shi nkumbo kami koleki tshitshɛ lo nkumbo tshɛ ya lo dioho dia Bɛnjamina? Ko lande na kambutɛyɛ ngasɔ?”
22 Oma laasɔ, Samuɛlɛ akɔshi Saolo la okambi ande, ko akaatɔlɛ otsha lo luudu l’oleelo ndo akatowasha dihole dioleki dia wanɛ tshɛ wakelamɛ nɛmɔ. Waki anto oko 30. 23 Samuɛlɛ akatɛ okatshi ate: “Ela nyama kakamakosha ndo kakamakote nte: ‘Kitshatɔ l’omamu.’” 24 Ko okatshi akela elemba la kɛnɛ tshɛ kaki lɔkɔ, ko akakitsha la ntondo ka Saolo. Samuɛlɛ akate ate: “Kɛnɛ kakawakoombe kambowokitsha la ntondo kayɛ. Lɛka, nɛ dia wakakoombetɔ lo diaaso nɛ. Dikambo dimi lakawate nte: ‘Lakele angɛndangɛnda.’” Ko Saolo akale nde la Samuɛlɛ lushi lakɔ. 25 Oma laasɔ, vɔ wakaholɔ oma lo dihole dia la diko+ otsha l’osomba ko nde akatetemala nsawola la Saolo lo ɔtɛ wa luudu. 26 Vɔ waketɔ la yosose ndo kam’akahotɔ wonya, Samuɛlɛ akelɛ Saolo lo ɔtɛ wa luudu, ata ate: “Yalɔngɔsɔla kele kɔkɛndja.” Ko Saolo akayalɔngɔsɔla ndo vɔ akɔ 2, nde la Samuɛlɛ wakatombe l’andja. 27 Lam’akawataholɔka otsha la koma y’osomba, Samuɛlɛ akatɛ Saolo ate: “Tɛ okambi+ ayɛ ete la ntondo kaso. Koko wɛ, tokotshikala lanɛ kele kokiya ɔtɛkɛta wa Nzambi.” Ko okambi akɔ akete la ntondo.