1 Samuɛlɛ

10 Oma laasɔ, Samuɛlɛ akɔshi ɔlɔndɔ w’esɔ ko akakitɛ l’ɔtɛ+ wa Saolo. Nde akashana la nde bizɛ ndo akate ate: “Shi Jehowa ambokokita esɔ oko ɔnɔmbɔdi+ w’etenyi kande k’okitɔ?+ 2 Lam’ayoyomɔ oma lalemi ɛlɔ, wɛ ayotana apami 2 suke la diombo dia Rashɛlɛ+ lo ɛtshi ka nkɛtɛ ka Bɛnjamina ka la Zɛlɛza ko vɔ wayokotɛ vate: ‘Mponda yakanyatshu toyanga yambɛnamaka, koko shɔ ambohɛ dikambo dia mponda+ ndo ekɔ lo ndjakiyanya dikambo dianyu. Nde ekɔ lo mbuta ate: “Ahombami nsala lo dikambo dia ɔnami?”’ 3 Komɔ oma laawɔ, ko wɛ ntshɔ polo lam’ayoyokoma l’osongo wa woke wa la Tabɔra lɛnɛ ayoyohomana l’apami 3 watatshu toyanga Nzambi ka mɛtɛ la Bɛtɛlɛ,+ ɔmɔtshi atɛmbɛ ɛsɔngɔ 3 wa mbudi, okina atɛmbɛ mapa 3 ndo okina atɛmbɛ mbaka ka woke ka wanu. 4 Vɔ wayokombola dia mbeya kana wɛ ekɔ ki, wayokosha mapa 2 ndo wɛ pombaka nongola mapa akɔ oma le wɔ. 5 Oma laasɔ, koye lo kionakona ya Nzambi ka mɛtɛ lɛnɛ ele olui w’asɔlayi w’ase Filistiya. Lam’ayoyɔtɔ l’osomba, wɛ ayohomana la olui w’amvutshi wayaholɔ oma lo dihole dia la diko ndo wayahome ehomahoma k’eshinga, ngɔmɔ, hionge ndo lɔsɛsɛ la ntondo kawɔ etena katawate prɔfɛsiya. 6 Nyuma kaki Jehowa kayokosha wolo,+ ko wɛ ayota prɔfɛsiya kaamɛ la wɔ ndo wɛ ayokadimɔ onto okina.+ 7 Lam’ayokotshama tolembetelo tɔsɔ, kosale kɛnɛ tshɛ kayonga lonya layɛ la akoka wa nsala, nɛ dia Nzambi ka mɛtɛ ekɔ kaamɛ la yɛ. 8 Oma laasɔ, kotshu la ntondo kami otsha la Ngilingalɛ+ ko dimi layokoyela lɛkɔ dia tolambola elambo wa lotshumba ndo elambo w’osanga. Wɛ pombaka nkonga nshi 7 polo lam’ayomoya. L’ɔkɔngɔ wa laasɔ kayomoyokotɛ kɛnɛ kahombayɛ nsala.”

9 Kam’akakadimɔ Saolo dia nde mimɔ oma lale Samuɛlɛ, Nzambi akatatɛ ntshikitanya otema ande dia vɔ monga oko otema w’onto okina ndo tolembetelo tɔsɔ tshɛ takakotshama lushi lakɔ. 10 Ɔnkɔnɛ vɔ wakamɔ oma laawɔ, ko wakadɛ lo kionakona ndo olui w’amvutshi wakahomana la nde. Mbala kakɔ ɔtɔi, nyuma ka Nzambi kakawosha wolo,+ ko nde akatatɛ mbuta prɔfɛsiya+ l’atei awɔ. 11 Wanɛ wakaweyaka ntondo etena kakawɛnyi dia nde ota prɔfɛsiya kaamɛ l’amvutshi, vɔ wakatanɛ vate: “Kakɔna kambokomɛ ɔna Kisha? Onde ndo Saolo kaya omvutshi?” 12 Ko pami kɛmɔtshi l’atei awɔ akate ate: “Ko ele shɛwɔ?” Ɔnkɔnɛ, anto wakayonga la mbekelo ka mbuta* ɔnɛ: “Onde ndo Saolo kaya l’atei w’amvutshi?”+

13 Lam’akandashidiya mbuta prɔfɛsiya, nde akatshu otsha lo dihole dia la diko. 14 Ɔnango she Saolo akayowombola nde la okambi ande l’ɔkɔngɔ ate: “Lende akanyatshu?” Ko nde akate ate: “Dia toyanga mponda,+ koko sho kondjiɛna, ɔnkɔnɛ takatshu otsha le Samuɛlɛ.” 15 Ɔnango she Saolo akambola ate: “Lam’alangayɛ, ombutɛ, kakɔna kakakotɛ Samuɛlɛ?” 16 Saolo akakadimola ɔnango she ate: “Nde akatotɛ dia mponda yamboshilaka mɛnama.” Koko Saolo kombotɛ kɛnɛ kakate Samuɛlɛ lo dikambo dia lowandji.

17 Oma laasɔ, Samuɛlɛ akasanganya anto tshɛ la ntondo ka Jehowa la Mizipa+ 18 ko akatɛ ase Isariyɛlɛ ate: “Jehowa Nzambi k’Isariyɛlɛ kata ate: ‘Dimi kakatondja Isariyɛlɛ oma l’Edjibito+ ndo kakanyotshungola oma l’anya w’ase Edjibito ndo oma l’anya wa waolelo tshɛ wakanyɔhɛnyahɛnyaka. 19 Koko ɛlɔ, nyu nyamboka Nzambi,+ ɔnɛ lakanyoshimbɛka oma lo mpokoso ndo oma lo asui ɔkɔngɔ ndo nyakate nyate: “Keema, wɛ pombaka tosha nkumekanga.” Wonya ɔnɛ, nyemale la ntondo ka Jehowa lo ndjela waoho anyu ndo lo ndjela nunu nunu di’anto anyu.’”

20 Ɔnkɔnɛ, Samuɛlɛ akasukanya+ waoho tshɛ w’Isariyɛlɛ, ko dioho dia Bɛnjamina diakasɔnama.+ 21 Oma laasɔ, nde akasukanya nkumbo tshɛ ya Bɛnjamina, ko nkumbo ka Matiritɛ kakasɔnama.+ L’ekomelo, Saolo ɔna Kisha akasɔnama. Koko etena kakawatshu tooyanga, vɔ kombɛna. 22 Ko vɔ wakambola Jehowa+ vate: “Onde pami kakɔ akaye lanɛ?” Jehowa akakadimola ate: “Nde akayashe l’atei w’etshumu.” 23 Ɔnkɔnɛ vɔ wakalawɔ, ko wakatowɔsa oma lɛkɔ. Lam’akandemala l’atei w’anto, nde akaleke anto tshɛ otale ndo anto+ akina tshɛ wakawondaka lo ahɛka. 24 Samuɛlɛ akatɛ anto tshɛ ate: “Onde nyambɛna dia l’atei w’anto tshɛ, ndooko lɛdimi la ɔnɛ lambɔsɔnama+ oma le Jehowa?” Ko anto tshɛ wakatatɛ mbida ekoko vate: “Nkumekanga alombe!”

25 Samuɛlɛ akewoya anto lotshungɔ lele la nkumi ya dikanga+ ndo akafunde awui akɔ lo dibuku, ko akadikitsha la ntondo ka Jehowa. Oma laasɔ, Samuɛlɛ akakɛndja anto tshɛ, onto l’onto otsha lo luudu lande. 26 Saolo nde lawɔ akatshu lakande la Ngibɛa, ko andɔshi wa ta wele Jehowa akananda etema awɔ wakootshindɛ. 27 Koko apami amɔtshi w’anyanya wakate vate: “Ngande wayotoshimbɛ+ onto ɔnɛ?” Ko vɔ wakawɔnyɔla ndo vɔ kombeela+ ndooko woshasha. Koko nde kombuta ndooko dui lo dikambo sɔ.*