1 Samuɛlɛ

13 Saolo aki la ɛnɔnyi . . .* lam’akandayala nkumekanga,+ ndo nde akolɛ lo Isariyɛlɛ l’edja k’ɛnɔnyi 2. 2 Saolo akasɔnɛ apami nunu sato (3 000) oma lo Isariyɛlɛ. Nunu pende (2 000) l’atei awɔ waki kaamɛ la Saolo la Mikimashɛ ndo lo lɛkɛ l’akona la Bɛtɛlɛ, ndo kinunu (1 000) waki kaamɛ la Jɔnatana+ la Ngibɛa+ ka Bɛnjamina. Nde akakɛndja anto akina, onto l’onto otsha lo luudu lande la dipɛma. 3 Jɔnatana akadiake olui w’asɔlayi w’ase Filistiya+ waki la Ngɛba+ ko ase Filistiya wakoke dikambo sɔ. Ko Saolo akade+ dimama lo wodja w’otondo ɔnɛ: “Ase Hɛbɛru wahokame!” 4 Ase Isariyɛlɛ tshɛ wakoke losango l’ɔnɛ: “Saolo ambodiaka olui w’asɔlayi w’ase Filistiya ndo kakianɛ Isariyɛlɛ aya nyama nsolo le ase Filistiya.” Ko wakasanganya anto dia ndjela Saolo la Ngilingalɛ.+

5 Ase Filistiya vɔ lawɔ wakasangana dia ndɔsha ase Isariyɛlɛ. Vɔ waki la pusupusu ya ta nunu akumi asato (30 000), ambahemi wa mfalasa nunu samalo (6 000) ndo asɔlayi efula oko nsɛkɛ ya lɔkɔngɔ la l’omamu wa ndjale.+ Vɔ wakatshu ko wakatoka mpango kawɔ la Mikimashɛ lo ɛstɛ ka Bɛtɛ-Avɛna.+ 6 Ko apami w’ase Isariyɛlɛ wakɛnyi dia wambokoma ewo, nɛ dia vɔ wambɔtɔ lo shasa. Ɔnkɔnɛ, anto wakayashɛ lo weoko,+ lo afuku, lo ave, lo mvudu ya l’ɛse ka nkɛtɛ* ndo lo afuku w’ashi. 7 Ase Hɛbɛru amɔtshi wakatehɔ ndo Jɔrdana otsha l’ɛtshi ka nkɛtɛ ka Ngada ndo ka Ngiliyadɛ.+ Koko Saolo aki paka la Ngilingalɛ ndo anto tshɛ wakatawoyelaka wakasake lokomba. 8 Nde akatetemala nkonga l’edja ka nshi 7 polo l’etena kakashikikɛ* Samuɛlɛ, koko Samuɛlɛ koondja la Ngilingalɛ ko anto wakatatɛ mbohandjɔ. 9 L’ekomelo, Saolo akate ate: “Nyombela olambo wa lotshumba ndo elambo w’osanga.” Ko nde akalambola olambo wa lotshumba.+

10 Koko kam’akandashidiya nambola olambo wa lotshumba, Samuɛlɛ akakome. Ko Saolo akatshu dia tohomana la nde ndo tɔɔtshɔkɔla. 11 Ko Samuɛlɛ akate ate: “Kakɔna kamboyosala kɛnɛ?” Saolo akakadimola ate: “Dimi lakɛnyi dia anto wambotatɛ pandjɔmi+ ndo wɛ haye lo wonya wakashikikɛma, ndo ase Filistiya wambotshumana la Mikimashɛ.+ 12 Ɔnkɔnɛ, dimi lakatshi nte: ‘Wonya ɔnɛ ase Filistiya wayanga mbɔtwɛmi la Ngilingalɛ ko dimi latayange ekimanyielo* ka Jehowa.’ Diakɔ diakamɛnyi dia dimi pombaka nambola olambo wa lotshumba.”

13 Ko Samuɛlɛ akatɛ Saolo ate: “Wɛ ambosala akambo oko enginya. Wɛ hakitanyiyisha didjango diakakodjangɛ+ Jehowa Nzambi kayɛ. Otoyokitanyiya, tshike Jehowa otoshikikɛ diolelo diayɛ nge lo Isariyɛlɛ pondjo pondjo. 14 Koko wonya ɔnɛ, diolelo diayɛ hadiototshikala edja.+ Jehowa ayotana pami kangɛnyangɛnya otema+ ande, ko Jehowa ayowosha ɔkɛndɛ wa nɔmbɔla wodja+ ande, nɛ dia wɛ hakitanyiyisha kɛnɛ kakakodjangɛ+ Jehowa.”

15 Ko Samuɛlɛ akonɛɛ oma la Ngilingalɛ, akatshu otsha la Ngibɛa ka Bɛnjamina ndo Saolo akadia anto. Wanɛ wakatshikala la nde waki apami+ oko 600. 16 Saolo nde la ɔnande Jɔnatana la anto wakatshikala kaamɛ la wɔ wakadjasɛka la Ngɛba+ ka Bɛnjamina, ndo ase Filistiya wakake mpango kawɔ la Mikimashɛ.+ 17 Ko olui wa dengalenga wakatombe oma lo mpango k’ase Filistiya ko wakatɔna lo elui 3. Olui ɔmɔtshi wakakadimɔ otsha l’otadimbo wa Ofara, otsha l’ɛtshi ka nkɛtɛ ka Shuala. 18 Olui okina wakete otsha l’otadimbo wa Bɛtɛ-Hɔrɔna.+ Ndo olui wa 3 wakete l’otadimbo w’otsha l’olelo wɛlane la okidi wa Zɛbɔima, otsha l’oswe wa shɛnga.

19 L’etena kɛsɔ, ndooko otshudi wa yaandjo wakahombe tanema lo wodja w’otondo w’Isariyɛlɛ, nɛ dia ase Filistiya wakate vate: “Diaha ase Hɛbɛru ndjosala lokuwa la ta kana dikɔnga.” 20 Ase Isariyɛlɛ tshɛ wakahombaka mpolɔ otsha le ase Filistiya dia tɔkɛtɛmɔla nkongo yawɔ, nkaku yawɔ, tɔshɔka tawɔ kana tokuwa tawɔ. 21 Dia nkɛtɛmɔla nkongo, nkaku, dihomɔ diele la nsɔdi 3, tɔshɔka ndo dia mongɛ wenyi lo weolo, wakahombaka nkimɔ pimɛ* 1. 22 Lushi la ta, ndooko lokuwa la ta kana dikɔnga diakatanema lo anya w’anto waki kaamɛ la Saolo nde la Jɔnatana,+ onyake Saolo nde la ɔnande Jɔnatana mbaki la dihomɔ dia ta.

23 Ko olui w’asɔlayi* w’ase Filistiya wakatombe lo vioka ya lo lowenga la Mikimashɛ.+