1 Nkumi ya dikanga

13 Lo ndjela ɔtɛkɛta wa Jehowa, okambi wa Nzambi+ ɔmɔtshi akaye oma la Juda oya la Bɛtɛlɛ etena kakemala Jɛrɔbɔama lo elambwelo+ dia ntshumba olambo. 2 Ko nde akawelɛ otsha lo elambwelo lo ndjela ɔtɛkɛta wa Jehowa ko akate ate: “Elambwelo le, elambwelo le! Jehowa kata ate: ‘Eenda, ɔna pami ayotɔ lo luudu la Davidɛ, lokombo lande Jɔsiya!+ Nde ayolambola ɛlɔmbɛdi w’ahole wa la diko laadiko diayɛ, wanɛ watotshumbaka elambo laadiko diayɛ ndo nde ayotshumba weka w’anto laadiko diayɛ.’”+ 3 Nde akasha djembetelo lushi lɔsɔ ate: “Djembetelo yambewoya Jehowa yɔ nyɛ: Elambwelo kayatɛ ndo otoko* wele lɔkɔ wayohandjɔ.”

4 Kam’akoke nkumekanga ɔtɛkɛta w’okambi wa Nzambi ka mɛtɛ wakandawelɛ otsha lo elambwelo la Bɛtɛlɛ, Jɛrɔbɔama akasembola lonya lande oma lo elambwelo ko akate ate: “Nyowonde!”+ Mbala kakɔ ɔtɔi, lonya lakandasembola lakome,* ko nde kokoka likaloya nto.+ 5 Ko elambwelo kakaatɛ ndo otoko wakahandjɔ oma lo elambwelo lo ndjela djembetelo yakasha okambi wa Nzambi ka mɛtɛ lo ndjela ɔtɛkɛta wa Jehowa.

6 Ko nkumekanga akatɛ okambi wa Nzambi ka mɛtɛ ate: “Lam’alangayɛ, sɛngasɛnga Jehowa Nzambi kayɛ dia nde mbokami kɛtshi* ndo ɔnɔmbɛɛ dia lonya lami nkɔnɔ.”+ Ko okambi wa Nzambi ka mɛtɛ akasɛngasɛnga Jehowa dia nde mbooka kɛtshi, ko lonya la nkumekanga lakayala woho wakilɔ ntondo. 7 Oma laasɔ, nkumekanga akatɛ okambi wa Nzambi ka mɛtɛ ate: “Yete otsha la ngelo kele tole yangɔ ndo etawɔ dia dimi kosha woshasha ɔmɔtshi.” 8 Koko okambi wa Nzambi ka mɛtɛ akatɛ nkumekanga ate: “Oyadi kaanga wɛ ayombisha k’ahende ɔtɔi ka lo luudu layɛ, dimi hantotshɔ kaamɛ la yɛ, hantɔlɛ ɛngɔ ndo hantɔnɔ ashi lo dihole nɛ. 9 Nɛ dia ɔtɛkɛta wa Jehowa wakambidjangɛ ɔnɛ: ‘Tɔlɛke ɛngɔ, tɔnɔke ashi ndo tokalolake lo mboka kayoyotshɔ.’” 10 Ɔnkɔnɛ, nde akatshu lo mboka kekina ndo nde kokalola lo mboka kakandaye la Bɛtɛlɛ.

11 Omvutshi ɔmɔtshi w’osombe akadjasɛka la Bɛtɛlɛ, ko anande w’apami wakaye la ngelo ndo wakɔɔkɔndɔlɛ akambo tshɛ wakasale okambi wa Nzambi ka mɛtɛ lushi lɔsɔ la Bɛtɛlɛ ndo ɛtɛkɛta wakandatɛ nkumekanga. L’ɔkɔngɔ wa vɔ mbutɛ shɛwɔ akambo asɔ, 12 shɛwɔ akawambola ate: “Lo mboka kakɔna kakandatshwe?” Ko anande wakawɛnya mboka kakete okambi wa Nzambi ka mɛtɛ w’oma la Juda. 13 Oma laasɔ, nde akatɛ anande ate: “Nyonkeleke edee lo mponda.” Vɔ wakookelekɛ edee lo mponda, ko nde akakiahema.

14 Nde akayele okambi wa Nzambi ka mɛtɛ ko akatootana odjashi l’ɛse k’osongo ɔmɔtshi wa woke. Ko nde akawotɛ ate: “Onde wɛ kele okambi wa Nzambi ka mɛtɛ wakaye oma la Juda?”+ Nde akakadimola ate: “Eelo, dimi.” 15 Nde akawotɛ ate: “Yete totshu lakami kele tole yangɔ.” 16 Koko nde akate ate: “Dimi haakoke nkalola kaamɛ la yɛ ndo haakoke mbetawɔ leeta layɛ; dimi haakoke ndɛ ɛngɔ kana nnɔ ashi kaamɛ la yɛ lo dihole nɛ. 17 Nɛ dia ɔtɛkɛta wa Jehowa wakambutɛ ɔnɛ: ‘Tɔlɛke ɛngɔ ndo tɔnɔke ashi lɛkɔ. Tokalolake lo mboka kayoyotshɔ.’” 18 Ko nde akawotɛ ate: “Dimi lawɔ lekɔ omvutshi oko wɛ ndo ondjelo ɔmɔtshi akambute lo ndjela ɔtɛkɛta wa Jehowa ate: ‘Towokaloya lakayɛ kele nde ayole yangɔ ndo ayɔnɔ ashi.’” (Nde akookese.) 19 Ɔnkɔnɛ, nde akakalola kaamɛ la nde dia tɔlɛ yangɔ ndo tɔnɔ ashi lo luudu lande.

20 Etena kakiwɔ la mɛsa, ɔtɛkɛta wa Jehowa wakaye le omvutshi wakookaloya, 21 ko nde akatɛ okambi wa Nzambi ka mɛtɛ wakaye oma la Juda la dui dia wolo ate: “Jehowa kata ate: ‘Lam’ele wɛ ambɔnyɔla didjango dia Jehowa ndo wɛ hakitanyiyisha ɔlɛmbɛ wakakodjɛ Jehowa Nzambi kayɛ, 22 koko wɛ akakalodi dia ndjɔlɛ yangɔ ndo dia ndjɔnɔ ashi lo dihole diakawakotɛ ɔnɛ: “Tɔlɛke ɛngɔ ndo tɔnɔke ashi,” odo ayɛ hawotokundɛma lo waombo wa watshɛyɛ.’”+

23 L’ɔkɔngɔ w’okambi wa Nzambi ka mɛtɛ ndɛ ndo nnɔ, omvutshi w’osombe akalɔngɔsɔlɛ omvutshi wakandakaloya mponda kande. 24 Oma laasɔ nde akonɛɛ, koko ntambwɛ kakahomana la nde lo mboka ko kakoodiake.+ Odo ande wakakalema lo mboka, ko mponda kakemala suke la wɔ. Ndo ntambwɛ kakemala suke l’odo akɔ. 25 Anto amɔtshi wakete laawɔ wakɛnyi odo wokalemi lo mboka ndo ntambwɛ kemadi suke l’odo akɔ. Vɔ wakɔtɔ l’osomba wakadjasɛka omvutshi w’osombe, ko wakatota dikambo diakɔ.

26 Lam’akoke omvutshi wakatookaloya dui sɔ, nde akate mbala kakɔ ɔtɔi ate: “Ɔsɔ ekɔ okambi wa Nzambi ka mɛtɛ wakɔnyɔdi didjango dia Jehowa;+ ɔnkɔnɛ Jehowa akookimwe le ntambwɛ dia tɔ mbaatshatsha ndo mbodiaka, lo ndjela ɔtɛkɛta wa Jehowa wakandawotɛ.”+ 27 Oma laasɔ, nde akatɛ anande ate: “Nyonkeleke edee lo mponda.” Ko vɔ wakookelekɛtɔ. 28 Ko nde akatshu, akatotana odo wokalemi lo mboka ndo mponda la ntambwɛ wemadi suke la wɔ. Ntambwɛ kɔɔndɛ odo akɔ ndo tɔ kondjaka mponda. 29 Omvutshi akɔ akonyiya odo w’okambi wa Nzambi ka mɛtɛ, akawahɛ lo mponda kande, ko akookaloya lo osomba awɔ dia mbolela ndo mbokundɛ. 30 Ɔnkɔnɛ, nde akakundɛ odo akɔ lo diombo diande hita ndo vɔ wakoolelaka vate: “Ande paa lee, ɔnalengo!” 31 L’ɔkɔngɔ wa mbokundɛ, nde akatɛ anande ate: “Lam’ayomovɔ, kanyonkundɛ lo dihole diambokundɛma okambi wa Nzambi ka mɛtɛ. Kanyokitsha weka ami suke la weka ande.+ 32 Ɔtɛkɛta wakandawelɛ lo ndjela ɔtɛkɛta wa Jehowa lo dikambo dia elambwelo ka la Bɛtɛlɛ ndo lo dikambo dia mvudu tshɛ y’ɔtɛmwɛlɔ yele lo ahole wa la diko+ lo esomba wa la Samariya wayokotshama ndooko onyake.”+

33 Kaanga l’ɔkɔngɔ w’akambo asɔ salema, Jɛrɔbɔama kokadimɔ oma lo mboka kande ka kɔlɔ, koko nde akatetemala nsɔna ɛlɔmbɛdi oma l’atei w’anto k’anto+ dikambo di’ahole wa la diko. Nde akalowolaka* onto tshɛ lakakombolaka nkamba oko ɔlɔmbɛdi, ata ate: “Nde lawɔ onge ɔlɔmbɛdi dikambo di’ahole wa la diko.”+ 34 Pɛkato kɛsɔ k’ase luudu la Jɛrɔbɔama+ kakaakonya lo elanyelo ndo dia vɔ nshila oshiki oma laadiko dia nkɛtɛ.+