Isaya
8 Jehowa akambutɛ ate: “Ɔsa ehase ka woke+ kele funda lɔkɔ la efundelo wa wɔdu* ɔnɛ: ‘Mahɛrɛ-Shalala-Hashi-Baza.’* 2 Ndo etawɔ dia dimi nshikikɛ dui sɔ la efundelo w’oma le ɛmɛnyi wa kɔlamelo, ɔlɔmbɛdi Uriya+ nde la Zɛkariya ɔna Jɛbɛrɛkiya.”
3 Oma laasɔ, dimi lakeyana* la wadɛmi, omvutshi wa womoto ko nde akatshu diemi ndo akayota ɔna pami.+ Ko Jehowa akambutɛ ate: “Ɔlɛnde Mahɛrɛ-Shalala-Hashi-Baza, 4 nɛ dia la ntondo ka ɔnakɔ mbeya woho wa mbelɛ ɔnɛ: ‘Papa!’ ndo ‘Mama!’ diangɔ dia Damasɛkɛ ndo diangɔ dia dimbo dia Samariya diayɔsama la ntondo ka nkumekanga ka Asuriya.”+
5 Jehowa akambutɛ nto ate:
6 “Lam’ele anto anɛ wakatone ashi wakɛla dimɛna wa Shiloa*+
Ndo vɔ ngɛnangɛnaka Rɛzina nde la ɔna Rɛmaliya,+
7 Ɔnkɔnɛ Jehowa ayowaela
Ashi wa wolo ndo w’efula wa lo Ɔkɛdi,*
Nkumekanga ka Asuriya+ la lotombo lande tshɛ.
Nde ayoya la diko dia edihe ande tshɛ wa l’ɛse k’ashi
Nde ayombɔmbɔ la diko dia emamu ande tshɛ
8 Ndo ayɔmba Juda y’otondo.
Nde ayosala elola, ayeta ndo ayokoma polo lo nkingo;+
Ahafu wosandjwe wayolola lo wekeke wa wodja ayɛ,
9 Nyu anto le, nyosale kɔlɔ, koko nyayohandjɔma bɛtshi bɛtshi.
Nyohokame, nyu wanɛ tshɛ w’oma lo bɛkɛ di’etale dia nkɛtɛ!
Nyoyalɔngɔsɔlɛ dia ndɔ ta,* koko nyayohandjɔma bɛtshi bɛtshi!+
Nyoyalɔngɔsɔlɛ dia ndɔ ta, koko nyayohandjɔma bɛtshi bɛtshi!
10 Nyosale ekongelo, koko tɔ kayolana!
11 La lonya lande la wolo lele le mi, Jehowa akambutɛ dia pɛmɔlami diaha ndjela mboka k’anto anɛ ate:
12 “Kɛnɛ kelɛ anto anɛ ɔnɛ sheke, tanyokielɛke ɔnɛ sheke!
Kɛnɛ kokawɔ wɔma, tanyokiokake wɔma;
Tanyodidimake l’ɔtɛ atɔ.
13 Jehowa kanga lolembelembe kele Ɔnɛ lahombanyu mbɔsa oko ekila,+
Nde kele Ɔnɛ lahombanyu mboka wɔma,
Ndo nde kele Ɔnɛ lahomba nyosatsha lokomba.”+
14 Nde ayonga oko tɛmpɛlɔ k’ekila,
Koko oko dive dia nkɔmɔla lɔkɔ
Ndo oko dive dia ntakana lɔkɔ+
Le mvudu yakɔ 2 ya Isariyɛlɛ,
Oko ɔtɛyi ndo oko djonga
Le ase Jɛrusalɛma.
15 Efula kawɔ wayotakana, wayɔkɔ ndo wayohomɔ;
Vɔ wayotala lo djonga ndo wayondama.
16 Ɔmba eshikikelo ka lofunda;
Diha ɛlɛmbɛ* l’atei w’ambeki ami!
17 Dimi layendɛka* le Jehowa,+ ɔnɛ lashɛ elungi kande le luudu la Jakɔbɔ+ ndo dimi layolongamɛka le nde.
18 Eenda, lo Isariyɛlɛ, dimi la ana wakambisha+ Jehowa tekɔ oko tolembetelo+ ndo oko ahindo w’oma le Jehowa kanga lolembelembe ɔnɛ ladjasɛ lo Dikona dia Siɔna.
19 Ndo naka wambonyotɛ ɔnɛ: “Nyombole wanɛ watɛkɛtsha dimu kana wetshi wadjɔ ndo wendja,” shi Nzambi kawɔ kahomba anto mimbola? Onde vɔ pombaka ntɛkɛta la wanɛ wakavu lo wahɔ wa wanɛ wasɛna?+ 20 Lo dihole dia nsala ngasɔ, vɔ pombaka mimbola ɛlɛmbɛ ndo eshikikelo ka lofunda!
Etena kahawatɛkɛta lo yoho yɔtɔnɛ la ɔtɛkɛta akɔ, vɔ bu la osase.*+ 21 Ndo onto l’onto ayeta lo wodja ele la asui ndo la ndjala;+ ndo lam’ele nde ekɔ la ndjala ndo la yɛnyi nde ayodja nkumekanga kande ndo Nzambi kande mananu etena kayondalɛ l’olongo. 22 Oma laasɔ, nde ayenda lo nkɛtɛ ko ayɛna paka asui ato, odima oto, wodjima, tena dia wolo ndo loonge koko ndooko osase.