1 Nkumi ya dikanga

20 Ko Bɛnɛ-Hadada+ nkumekanga ka Suriya+ akatshumanya asɔlayi ande tshɛ kaamɛ la nkumi ya dikanga nkina 32 la mfalasa yawɔ ndo pusupusu yawɔ. Nde akatshu, ko akatodinga+ Samariya+ ndo akakilɔsha. 2 Oma laasɔ, nde akatomɛ Ahaba+ nkumekanga k’Isariyɛlɛ akɛndji lo osomba ndo akawotɛ ate: “Bɛnɛ-Hadada kata ate: 3 ‘Mfɛsa yayɛ, paonyi yayɛ yami mbeyɔ, kaamɛ ndo wadiɛyɛ la anayɛ woleki amɛna.’” 4 Ko nkumekanga k’Isariyɛlɛ akakadimola ate: “Nkumɛmi nkumekanga le, lo ndjela dui diayɛ, dimi lekɔ onto ayɛ kaamɛ la kɛnɛ tshɛ kele la mi.”+

5 L’ɔkɔngɔ diko, akɛndji akɔ wakakalola ko wakate vate: “Bɛnɛ-Hadada kata ate: ‘Dimi lakatome dikɛndji nɛ le yɛ nte: “Wɛ ayombisha mfɛsa yayɛ, paonyi yayɛ, wadiɛyɛ ndo anayɛ.” 6 Koko loyi oya lo wonya ɔnɛ, dimi layokotomɛ ekambi ami, ko vɔ wayoyangiayangia dimɛna lo luudu layɛ ndo lo mvudu y’ekambi ayɛ, ko vɔ wayɔsa diangɔ diayɛ tshɛ dia nɛmɔ ko wayotshɔ la diɔ.’”

7 Ko nkumekanga k’Isariyɛlɛ akelɛ dikumanyi tshɛ dia lo wodja ndo akate ate: “Lam’alanganyu, nyodje yimba ndo nyende, pami kɛnɛ ekɔ lo nanga tela mpokoso, nɛ dia nde ekɔ lo nanga mbɔsa wadiɛmi, anami, mfɛsa yami ndo paonyi yami, koko dimi hantonyi mbosha.” 8 Ko dikumanyi tshɛ l’anto tshɛ wakawotɛ vate: “Tokitanyiyake ndo tetawɔke.” 9 Ko nde akatɛ akɛndji waki Bɛnɛ-Hadada ate: “Nyotote nkumɛmi nkumekanga nyate: ‘Kɛnɛ tshɛ kakayalɔmbɛ okambi ayɛ ntondo, dimi layokosha; koko dimi hantosala dikambo nɛ.’” Ko akɛndji wakatshu, wakatowotɛ okadimwelo ɔsɔ.

10 Oma laasɔ, Bɛnɛ-Hadada akootomɛ dui nɛ ate: “Waa nzambi yambisha dilanya dia wolo naka ditshu dia la Samariya diayokoka dia dimi mbisha anto tshɛ wayandjele kaanga diwambo ɔtɔi ɔtɔi!” 11 Nkumekanga k’Isariyɛlɛ akakadimola ate: “Nyotowote nyate: ‘Onto lɔsa dihomɔ diande dia ta atoyafunake oko ɔnɛ ladikolola.’”+ 12 Kam’akandoke okadimwelo ɔsɔ etena kakandanɔka nde la nkumi ya dikanga wanu lo mvudu yawɔ y’apɛma,* nde akatɛ ekambi ande ate: “Nyoyalɔngɔsɔlɛ dia ndɔ ta!” Ko vɔ wakayalɔngɔsɔla dia ndɔsha osomba akɔ.

13 Koko omvutshi ɔmɔtshi akaye le Ahaba+ nkumekanga k’Isariyɛlɛ ko akate ate: “Jehowa kata ate: ‘Onde wɛ mɛnaka olui w’anto ɔnɛ tshɛ? Dimi layanga mbakimɔ lo anya ayɛ ɛlɔ, ko wɛ ayeya dia dimi kele Jehowa.’”+ 14 Ahaba akambola ate: “Lo tshimbo ya na?” Ko nde akate ate: “Jehowa kata ate: ‘Lo tshimbo y’ekambi w’ewandji wa prɔvɛnsɛ.’” Ko nde akambola ate: “Onto akɔna ayotatɛ la ta?” Ko nde akate ate: “Wɛ!”

15 Oma laasɔ, Ahaba akadia ekambi w’ewandji wa prɔvɛnsɛ, ko vɔ waki 232. L’ɔkɔngɔ wa laasɔ, nde akadia apami w’ase Isariyɛlɛ, ko waki tshɛ tshɛ nunu esambele (7000). 16 Vɔ wakatshu la midi etena kakanɔka Bɛnɛ-Hadada wanu ndo kakandadjɔka lo mvudu y’apɛma* nde la nkumi ya dikanga 32 yakookimanyiyaka. 17 Lam’akatombe ekambi w’ewandji wa prɔvɛnsɛ ntondo, mbala kakɔ ɔtɔi Bɛnɛ-Hadada akatome akɛndji. Vɔ wakatowotɛ vate: “Apami wambotomba oma la Samariya.” 18 Ko nde akate ate: “Naka lo wɔladi mboyewɔ, ko nyu mbanda ndo ndja la wɔ wasɛna. Ko kaanga naka wamboya ndjotɔlɔsha, nyu pombaka mbanda ndo ndja la wɔ wasɛna.” 19 Koko lam’akatombe anto asɔ oma l’osomba, mbuta ate ekambi w’ewandji wa prɔvɛnsɛ ndo asɔlayi wakayawayelaka, 20 onto l’onto akadiake ɔndɔshi ande. Ko ase Suriya wakalawɔ ko ase Isariyɛlɛ wakawatshanya, koko Bɛnɛ-Hadada nkumekanga ka Suriya akalawɔ+ lo mfalasa kaamɛ la ambahemi amɔtshi wa mfalasa. 21 Koko nkumekanga k’Isariyɛlɛ akatombe, ko akatetemala ndjaka mfalasa ndo ndanya pusupusu, ko nde akalɛndja* ase Suriya lo yɛdikɔ y’efula.

22 L’ɔkɔngɔ diko, omvutshi+ akɔ akaye le nkumekanga k’Isariyɛlɛ ko akawotɛ ate: “Tshɔka toyakeketsha ndo tokane yimba lo kɛnɛ kayangayɛ nsala,+ nɛ dia l’etatelo k’ɔnɔnyi wayaye,* nkumekanga ka Suriya ayoya ndjokɔlɔsha.”+

23 Ko ekambi wa nkumekanga ka Suriya wakawotɛ vate: “Nzambi kawɔ ekɔ Nzambi ka l’akona. Diakɔ diambowotoleka wolo. Ko naka sho ndɔ la wɔ lo nkɛtɛ y’ebamubamu, sho tayowaleka wolo. 24 Ndo nto, kosale nganɛ: Nya nkumi ya dikanga+ oma l’ahole awɔ kele hɛnyawɔ la waa nguvɛrnɛrɛ. 25 Oma laasɔ, tshumanya* lofulo l’asɔlayi lɛdimi la wanɛ wakavu, mfalasa lo ndjela lofulo la mfalasa ndo pusupusu lo ndjela lofulo la pusupusu. Taalɔsha lo nkɛtɛ y’ebamubamu ndo ndooko onyake tayowaleka wolo.” Ɔnkɔnɛ nde akoke dako diawɔ, ko akasale ngasɔ.

26 L’etatelo k’ɔnɔnyi,* Bɛnɛ-Hadada akatshumanya ase Suriya, ko wakatshu lo Afɛkɛ+ dia tɔlɔsha ase Isariyɛlɛ. 27 Ase Isariyɛlɛ vɔ lawɔ wakatshumana ndo wakawasha kɛnɛ tshɛ kakiwɔ la tɔ ohomba, ko wakatombe dia tohomana la wɔ. Etena kakake ase Isariyɛlɛ mpango kawɔ mbɛlanɛ la wɔ, vɔ waki oko tolui 2 ta mbudi, koko ase Suriya wakalolanɛ lo ɛtshi ka nkɛtɛ k’otondo.+ 28 Ko okambi wa Nzambi ka mɛtɛ akaye le nkumekanga k’Isariyɛlɛ ko akawotɛ ate: “Jehowa kata ate: ‘Lam’ele ase Suriya wambota vate: “Jehowa ekɔ Nzambi ka l’akona ndo nde bu Nzambi ka lo nkɛtɛ y’ebamubamu,” dimi layokimɔ olui w’anto wa woke ɔnɛ tshɛ lo anya ayɛ,+ ko wɛ ayeya mɛtɛ dia dimi kele Jehowa.’”+

29 Vɔ wakatshikala lo mpango yakawake anto l’anto mbɛlanɛ l’asekawɔ l’edja ka nshi 7, ko lushi la 7, ta diakatatɛ. Ase Isariyɛlɛ wakadiake asɔlayi wakɛndakɛnda l’ekolo w’ase Suriya nunu lokama (100 000) lushi 1. 30 Ko wanɛ wakatshikala wakalawɔ otsha lo Afɛkɛ,+ l’etei k’osomba. Koko ehele kakanyukwɛ anto nunu akumi ahende l’esambele (27 000) l’atei w’anto wakatshikala. Bɛnɛ-Hadada nde lawɔ akalawɔ ko akɔtɔ lo osomba ndo akatoyashɛ lo luudu la l’etei.

31 Ɔnkɔnɛ ekambi ande wakawotɛ vate: “Takoke dia nkumi ya dikanga ya lo luudu l’Isariyɛlɛ wekɔ nkumi ya dikanga yokana kɛtshi.* Lam’alangayɛ, etawɔ dia sho ndɔta akoto lo nkende yaso ndo nkeleka ɛkɔdi lo ɛtɛ aso ko sho ntshɔ le nkumekanga k’Isariyɛlɛ. Ondo nde ayokotshika la lɔsɛnɔ.*+ 32 Ko vɔ wakalɔtɛ akoto lo nkende yawɔ ndo wakakeleka ɛkɔdi lo ɛtɛ awɔ, ko wakaye le nkumekanga k’Isariyɛlɛ ndo wakate vate: “Okambi ayɛ Bɛnɛ-Hadada kata ate: ‘Lam’alangayɛ, ontshike* la lɔsɛnɔ.’” Nde akakadimola ate: “Onde nde eke la lɔsɛnɔ? Nde ekɔ ɔnalengo.” 33 Anto akɔ wakɔshi dikambo sɔ oko djembetelo mɔtshi, ko mbala kakɔ ɔtɔi vɔ wakakambe la ɛtɛkɛta ande ko wakate vate: “Bɛnɛ-Hadada ekɔ ɔnanyɔ.” Ko nde akate ate: “Nyotshu nyotoye la nde.” Oma laasɔ, Bɛnɛ-Hadada akatombe oya le nde ndo nde akawahenya lo pusupusu.

34 Ko Bɛnɛ-Hadada akawotɛ ate: “Esomba wakɔshi papa oma le shɔ, dimi layokokaloyawɔ ndo wɛ koka ndjasalɛ ahole w’okanda* la Damasɛkɛ, oko wakasale papa la Samariya.”

Ahaba akakadimola ate: “L’ɔtɛ wa diokanelo* nɛ, dimi layokokimɔ dia wɛ ntshɔ.”

Ko nde akokana la nde ndo akookimɔ dia nde ntshɔ.

35 Lo ndjela ɔtɛkɛta wa Jehowa, ɔmɔtshi l’atei w’ana w’amvutshi*+ akatɛ osekande ate: “Lam’alangayɛ, ɔnkɔmɔlɛ.” Koko pami kakɔ akatone mbɔkɔmɔla. 36 Ko nde akawotɛ ate: “Lam’ele wɛ ambotona nkitanyiya dui dia Jehowa, kam’ayoyokakitɔna la mi, ntambwɛ kayokodiaka.” Lam’akandamɔ oma lalende, ntambwɛ kakahomana la nde, ko kakoodiake.

37 Nde akahomana la pami kekina ndo akawotɛ ate: “Lam’alangayɛ, ɔnkɔmɔlɛ.” Ko pami kakɔ akɔɔkɔmɔla ndo akoohomuya.

38 Oma laasɔ, omvutshi akɔ akatshu, ko akatokongɛ nkumekanga l’omamu wa mboka, akakeleka ahɔndɔ lo washo ande dia ntshikitanya ɛnamelo kande. 39 Lam’akatetaka nkumekanga laawɔ, nde akawelɛ nkumekanga ate: “Okambi ayɛ akatshu lo ta, ko pami kɛmɔtshi akaye la onto ɔmɔtshi le mi ko akambutɛ ate: ‘Lama onto ɔnɛ. Naka nde ndawɔ, kete lɔsɛnɔ layɛ layɔsa dihole dia lɔsɛnɔ lande,*+ kana wɛ ayofuta lotalata* 1 la mfɛsa.’ 40 Ko etena kaki okambi ayɛ la wesanu lɛnɛ la lɛnɛ, mbala kakɔ ɔtɔi pami kakɔ akalawɔ.” Nkumekanga k’Isariyɛlɛ akawotɛ ate: “Ɔsɔ kayonga kilombo kayɛ. Wɛmɛ ambosambola.” 41 Oma laasɔ, nde akanya ahɔndɔ oma lo washo ande esadi esadi, ko nkumekanga k’Isariyɛlɛ akeye dia nde aki omvutshi ɔmɔtshi.+ 42 Nde akawotɛ ate: “Jehowa kata ate: ‘Lam’ele wɛ akatshike dia pami kakamate dia mbodiaka ndawɔ oma lo anya ayɛ,+ lɔsɛnɔ layɛ pombaka mbɔsa dihole dia lɔsɛnɔ*+ lande ndo anto ayɛ dihole dia anto ande.’”+ 43 Ko nkumekanga k’Isariyɛlɛ akatshu lakande la Samariya+ ele la ɔkɛyi ndo demba kɔmɔ.