2 Ɛkɔndɔ

34 Jɔsiya+ aki l’ɛnɔnyi 8 lam’akandayala nkumekanga ndo nde akolɛ l’edja k’ɛnɔnyi 31 la Jɛrusalɛma.+ 2 Nde akasalaka kɛnɛ kaki ɔlɔlɔ lo washo wa Jehowa, akakɛndakɛnda lo mboka ya Davidɛ tshɛnde, ndo nde kotakɔ mboka lo ntshɔ lo lonya l’omi kana la lɔmɔsɔ.

3 L’ɔnɔnyi wa 8 w’ɛlɔmbwɛlɔ kande, etena kakinde eke dikɛnda, nde akatatɛ nyanga Nzambi ka Davidɛ tshɛnde;+ l’ɔnɔnyi wa 12, nde akatatɛ minya ahole wa la diko+ ndo dimɛta dia l’esongo,* dikishi+ ndo mpingu ya la mbolo oma la Juda ndo oma la Jɛrusalɛma.+ 4 Laadiko dia laasɔ, vɔ wakahandjola dilambwelo dia waa Baala la ntondo kande, ndo nde akahendjahendja elambwelo ka tshɔ kaki la diko diawɔ. Ndo nto, nde akaatshatsha dimɛta dia l’esongo,* dikishi ndo mpingu ya la mbolo, ko akayietɛ otoko oto ndo akatɛ otoko akɔ lo waombo wa wanɛ wakalambolaka diangɔ sɔ elambo.+ 5 Nde akatshumbe weka w’ɛlɔmbɛdi lo dilambwelo diawɔ.+ Ngasɔ mbakandɛdia Juda la Jɛrusalɛma.

6 Ndo lo esomba wa Manase, Efrayimɛ,+ Simɛyɔna polo ndo Nafɛtali, lo ahole wosukanyi la wɔ wakalana, 7 nde akahandjola dilambwelo ndo akaatshatsha dimɛta dia l’esongo* ndo dikishi,+ ko akadietɛ otoko oto; nde akahandjola dilambwelo dia tshɔ tshɛ lo wodja w’Isariyɛlɛ+ w’otondo, ko l’ɔkɔngɔ wa laasɔ, nde akakalola la Jɛrusalɛma.

8 L’ɔnɔnyi wa 18 w’ɛlɔmbwɛlɔ kande, lam’akandɛdia wodja ndo tɛmpɛlɔ,* nde akatome Shafana+ ɔna Azaliya, Maseya owandji w’osomba ndo Joa ɔna Joahaza laki ɔkɔndɔdi dia tɔlɔngɔsɔla luudu la Jehowa Nzambi kande.+ 9 Vɔ wakakome le Hilikiya ɔlɔmbɛdi a laadiko ndo wakawosha falanga yakadjama lo luudu la Nzambi yakakɔngɔla ase Lɛwi wakakambaka oko alami w’asoko oma le aseka Manase, aseka Efrayimɛ ndo ase Isariyɛlɛ+ akina tshɛ, ndo oma le aseka Juda, Bɛnjamina ndo ase Jɛrusalɛma. 10 Oma laasɔ, vɔ wakayisha wanɛ wakasɔnama dia nɔmbɔla olimu wa luudu la Jehowa. Akambi w’olimu wa lo luudu la Jehowa vɔ lawɔ wakakambe la yɔ dia nɔngɔsɔla luudu lakɔ. 11 Vɔ wakayisha etshudi ndo ambiki dia nsomba ave wa lɔkɔlɔnga ndo esongo dia nsala abaya wakakatanya ndo dia vɔ mbidja esembe lo mvudu yaketawɔ nkumi ya dikanga ya Juda dia yɔ ndana.+

12 Apami akɔ wakakambe olimu la kɔlamelo tshɛ.+ Anto anɛ mbakasɔnama oko emendji awɔ: Jahata nde la Obadiya ase Lɛwi w’aseka Merari;+ Zɛkariya nde la Meshulama aseka Kɔhata.+ Ase Lɛwi, wanɛ tshɛ waki apomi wa mishiki wele la diewo+ 13 mbaki la ɔkɛndɛ wa nɔmbɔla ase olimu w’anyanya* ndo waki emendji wa wanɛ tshɛ wakakambaka elimu lo weho tshɛ wa ntumu; ndo ase Lɛwi amɔtshi waki afundji, topita ndo alami w’asoko.+

14 Lam’akawatondjaka falanga yakadjama lo luudu la Jehowa,+ ɔlɔmbɛdi Hilikiya akashola dibuku dia Ɛlɛmbɛ+ wa Jehowa wakandawasha lo tshimbo* ya Mɔsɛ.+ 15 Ko Hilikiya akatɛ Shafana laki ofundji ate: “Lamboshola dibuku di’Ɛlɛmbɛ lo luudu la Jehowa.” Ko Hilikiya akasha Shafana dibuku diakɔ. 16 Oma laasɔ, Shafana akatɔlɛ nkumekanga dibuku diakɔ ndo akawotɛ ate: “Ekambi ayɛ wekɔ lo nsala kɛnɛ tshɛ kakawalongola ɔkɛndɛ. 17 Vɔ wambotondja falanga yaki lo luudu la Jehowa ndo wamboyisha apami wakasɔnama ndo wanɛ wakamba olimu.” 18 Ofundji Shafana akatɛ nkumekanga nto ate: “Ɔlɔmbɛdi Hilikiya akambisha ndo dibuku nɛ.”+ Ko Shafana akatatɛ diadia la ntondo ka nkumekanga.+

19 Kam’akoke nkumekanga awui wa lo Ɛlɛmbɛ, nde akaatshatsha ahɔndɔ ande.+ 20 Oma laasɔ, nkumekanga akadjangɛ Hilikiya, Ahikama+ ɔna Shafana, Abidɔna ɔna Mika, Shafana laki ofundji ndo Asaya laki okambi wa nkumekanga ate: 21 “Nyotshu nyotombole Jehowa kanyi lo dikambo diami ndo lo dikambo dia atshikadi wa lo Isariyɛlɛ ndo wa la Juda lo kɛnɛ kendana la awui wa lo dibuku diambɛnama, nɛ dia nkɛlɛ ka Jehowa kayotshulɔ le so kekɔ efula dikambo watshɛso kokitanyiya ɔtɛkɛta wa Jehowa lo ndjela kɛnɛ tshɛ kofundami lo dibuku nɛ.”+

22 Ko Hilikiya nde la wanɛ wakatomama oma le nkumekanga wakatshu le Huluda omvutshi wa womoto.+ Nde aki wadi aki Shaluma ɔna Tikiva ɔna Harasɛ laki la ɔkɛndɛ wa ntɛla ahɔndɔ ndo nde akadjasɛka lo Ɛtshi ka nkɛtɛ ka 2 ka la Jɛrusalɛma, ko vɔ wakatosawola la nde lɛkɔ.+ 23 Womoto akɔ akawatɛ ate: “Jehowa Nzambi k’Isariyɛlɛ kata ate: ‘Nyotote pami kakanyotomi le mi nyate: 24 “Jehowa kata ate: ‘Dimi layanga mbela mpokoso lo dihole nɛ ndo le anto wodjashi lɔkɔ,+ mananu tshɛ yofundami lo dibuku+ diadiawɔ la ntondo ka nkumekanga ka Juda. 25 Lam’ele vɔ wambomboka ɔkɔngɔ+ ndo wekɔ lo tshumbɛ tozambizambi tokina elambo dia mbotshami nkɛlɛ+ la elimu w’anya awɔ tshɛ, nkɛlɛ kami kayohongɔ lo dihole nɛ ndo tɔ hatokitakita.’”+ 26 Koko kanyote nkumekanga ka Juda lakanyotomi dia ndjombola Jehowa kanyi nyate: “Jehowa Nzambi k’Isariyɛlɛ kata ate: ‘Lo kɛnɛ kendana l’awui wamboyoka,+ 27 lam’ele otema ayɛ wambonandema* ndo wɛ amboyakitshakitsha la ntondo ka Nzambi lam’okiyɛ ɛtɛkɛta ande lo dikambo dia dihole nɛ ndo di’anto wodjashi lɔkɔ, ko wɛ amboyakitshakitsha la ntondo kami ndo ambatshatsha ahɔndɔ ayɛ ndo ambolela la ntondo kami, dimi lawɔ lambokooka,+ mbata Jehowa. 28 Diakɔ diele dimi layosala dia wɛ ndjela watshɛyɛ* ndo wɛ ayetama lo diombo diayɛ la ki, ndo washo ayɛ hawotɛna mpokoso tshɛ yayomela lo dihole nɛ ndo le anto wodjashi lɔkɔ.’”’”+

Ko vɔ wakatɔlɛ nkumekanga okadimwelo akɔ. 29 Ɔnkɔnɛ nkumekanga akatome dui, ko wakasanganya dikumanyi tshɛ dia la Juda ndo dia la Jɛrusalɛma.+ 30 L’ɔkɔngɔ wa laasɔ, nkumekanga akatshu lo luudu la Jehowa kaamɛ l’apami tshɛ w’ase Juda, ase Jɛrusalɛma, ɛlɔmbɛdi, ase Lɛwi, mbuta ate anto tshɛ, oyadi akɛnda kana epalanga. Nde akadia awui tshɛ wa lo dibuku dia sheke diakawashola lo luudu la Jehowa lo atoyi awɔ.+ 31 Nkumekanga akemala lo dihole diande ndo akadje sheke*+ la ntondo ka Jehowa dia nde ayoyelaka Jehowa ndo ayokitanyiyaka ɛlɛmbɛ ande, waohwelo ande ndo wadjango ande la otema ande tshɛ ndo la anima*+ ande tshɛ lo nkitanyiya ɛtɛkɛta wa lo sheke wakafundama lo dibuku diakɔ.+ 32 Ndo nto, nde akayietawoya wanɛ tshɛ waki la Jɛrusalɛma ndo laka aseka Bɛnjamina. Ko ase Jɛrusalɛma wakasale akambo lo yoho yɔtɔnɛ la sheke ya Nzambi, Nzambi ka watshɛwɔ.+ 33 Oma laasɔ, Jɔsiya akanya diangɔ dia wɔnɔnyi* tshɛ oma lo bɛtshi dia nkɛtɛ tshɛ di’ase Isariyɛlɛ, ndo nde akasale dia ase Isariyɛlɛ+ tshɛ kambɛ Jehowa Nzambi kawɔ. Edja tshɛ kakinde la lɔsɛnɔ,* vɔ kotshika ndjela Jehowa Nzambi ka watshɛwɔ.