2 Nkumi ya dikanga

20 Lo nshi shɔ, Hɛzɛkiya akandama la hemɔ ndo aki suke la mvɔ.+ Omvutshi Isaya ɔna Amɔza akaye, ko akayowotɛ ate: “Jehowa kata ate: ‘Tɛ ase luudu layɛ kɛnɛ kahombawɔ nsala, nɛ dia wɛ ayovɔ, wɛ hatɔkɔnɔ.’”+ 2 Ko nde akakadimola elungi otsha lo ehele ndo akatatɛ nɔmba Jehowa ate: 3 “Jehowa le, lam’alangayɛ, lambokɔsɛngasɛnga dia wɛ mbohɔ woho wakamakɛndakɛnda la ntondo kayɛ la kɔlamelo ndo la otema ɔtɔi, ndo dimi lakasale kɛnɛ kaki ɔlɔlɔ lo washo ayɛ.”+ Ko Hɛzɛkiya akatatɛ ndela wolo.

4 La ntondo k’Isaya nkoma l’atei wa sɛkɛ, ɔtɛkɛta wa Jehowa wakaye le nde ndjowotɛ ɔnɛ:+ 5 “Kalola tote Hɛzɛkiya, ɔnɔmbɔdi wa wodja ami wate: ‘Jehowa Nzambi ka Davidɛ dia tshɛyɛ kata ate: “Dimi lamboka dɔmbɛlɔ diayɛ. Dimi lambɛna asɔyi ayɛ.+ Dimi layanga kɔkɔnɔla.+ Lushi la 3, wɛ ayotshɔ lo luudu la Jehowa.+ 6 Dimi layokokotshɛ ɛnɔnyi 15 lo lɔsɛnɔ* layɛ, layokotshungola wɛ la osomba ɔnɛ oma l’anya wa nkumekanga k’Asuriya+ ndo dimi layokokɛ osomba ɔnɛ dikambo diami ndo dikambo di’okambi ami Davidɛ.”’”+

7 Oma laasɔ, Isaya akate ate: “Nyela okate wa fingo yamboma ya lokama.” Ko wakaye la wɔ ndo wakoomamewɔ lo tshutshu diaki la nde, ko nde akatatɛ nkɔnɔ yema yema.+

8 Hɛzɛkiya akambola Isaya ate: “Djembetelo+ yakɔna yɛnya dia Jehowa ayɔnkɔnɔla ndo dia dimi layotshɔ lo luudu la Jehowa lushi la 3?” 9 Isaya akakadimola ate: “Djembetelo y’oma le Jehowa dia kɛnya ɔnɛ Jehowa ayokotsha kɛnɛ kakandate yɔ nyɛ: Onde wɛ nangaka dia dɛdi diele lo kibandola* ntshɔ otsha la ntondo atako 10 kana nkalola ɛkɔngɔkɔngɔ atako 10?”+ 10 Hɛzɛkiya akate ate: “Bu dui dia wolo dia dɛdi ntshɔ atako 10, koko aha nkalola ɛkɔngɔkɔngɔ atako 10.” 11 Ɔnkɔnɛ omvutshi Isaya akalɔmbɛ Jehowa, ko Nde akakaloya dɛdi ɛkɔngɔkɔngɔ atako 10 lo kibandola kaki Ahaza etena kele dɔ diakashile mpolɔ lo atako+ akɔ.

12 L’etena kɛsɔ, Berɔdaka-Balada ɔna Balada, nkumekanga ka Babilɔna akatomɛ Hɛzɛkiya mikanda la woshasha, nɛ dia nde akoke dia Hɛzɛkiya aki la hemɔ.+ 13 Hɛzɛkiya akaalongola* ndo akawaɛnya luudu lande la waombelo+ l’otondo, mbuta ate mfɛsa, paonyi, esɔ ka balasama ndo esɔ kekina k’oshinga wolo, dihomɔ diande dia ta ndo diangɔ tshɛ diaki lo waombelo ande. Ndooko ɛngɔ kaki Hɛzɛkiya kombaɛnya lo luudu* lande ndo lo diolelo diande di’otondo.

14 L’ɔkɔngɔ wa laasɔ, omvutshi Isaya akaye le nkumekanga Hɛzɛkiya ko akawombola ate: “Apami anɛ akawatshi ndo vɔ oma lende?” Ko Hɛzɛkiya akate ate: “Vɔ wakaye oma lo wodja w’etale, oma la Babilɔna.”+ 15 Oma laasɔ nde akambola ate: “Akawɛnyi lo luudu* layɛ?” Hɛzɛkiya akakadimola ate: “Vɔ wakɛnyi ɛngɔ tshɛ kele lo luudu* lami. Ndooko ɛngɔ ka lo waombelo ami kahamawaɛnyisha.”

16 Ko Isaya akatɛ Hɛzɛkiya ate: “Hokamɛ ɔtɛkɛta wa Jehowa:+ 17 ‘Eenda, nshi yayoya yele kɛnɛ tshɛ kele lo luudu* layɛ ndo kɛnɛ tshɛ kakombe watshɛyɛ polo ndo ɛlɔ kayɔtɔlama la Babilɔna.+ Ndooko ɛngɔ kayotshikala,’ mbata Jehowa. 18 ‘Ndo anayɛ amɔtshi wayoyota wayɔsama+ ndo wayonga ɛnɛnɛ lo luudu l’owandji laki nkumekanga ka Babilɔna.’”+

19 L’ɔkɔngɔ wa laasɔ, Hɛzɛkiya akatɛ Isaya ate: “Ɔtɛkɛta wa Jehowa wotshiyɛ wekɔ dimɛna.”+ Oma laasɔ, nde akakotsha ate: “Ekɔ dimɛna naka wɔladi ndo lotui tshitshi* layonga etena kekemi la lɔsɛnɔ.”*+

20 Lo kɛnɛ kendana l’etenyi kekina k’ɔkɔndɔ wa Hɛzɛkiya, wolo ande tshɛ, woho wakandasale difuku di’ashi+ ndo woho wakandɛtɔya ashi ko nkonya ashi lo osomba,+ shi awui asɔ fundama lo dibuku di’ɔkɔndɔ wa tena dia nkumi ya dikanga ya Juda? 21 Oma laasɔ, Hɛzɛkiya aketama dia momuya kaamɛ la watshɛnde,+ ko ɔnande Manase+ akayala nkumekanga lo dihole diande.+