2 Ɛkɔndɔ
16 L’ɔnɔnyi wa 36 w’ɛlɔmbwɛlɔ ka Asa, Baasha+ nkumekanga k’Isariyɛlɛ akaye dia ndjɔlɔsha Juda ndo nde akatatɛ mbika* Rama+ dia nshimba onto tshɛ dia ntomba kana mbɔtɔ le* Asa nkumekanga ka Juda.+ 2 Ko Asa akɔshi mfɛsa la paonyi oma lo waombelo wa lo luudu la Jehowa+ ndo wa lo luudu* la nkumekanga, ko akatomɛ Bɛnɛ-Hadada nkumekanga ka Suriya+ kakadjasɛka la Damasɛkɛ, ata ate: 3 “Diokanelo* diekɔ lam’asami la yɛ ndo lam’asa papa la shɔ. Dimi lambokotomɛ mfɛsa la paonyi. Tshɔka, tolanya diokanelo* diele lam’asayɛ la Baasha nkumekanga k’Isariyɛlɛ, kele nde amimwe.”
4 Bɛnɛ-Hadada akahokamɛ kɛnɛ kakate nkumekanga Asa ndo nde akatome ewandji w’asɔlayi ande dia tɔlɔsha esomba wa lo Isariyɛlɛ, ko vɔ wakalanya Idjɔna,+ Danɛ,+ Abɛlɛ-Maima ndo apɛngɛ tshɛ wa lo esomba wa Nafɛtali.+ 5 Kam’akoke Baasha dui sɔ, mbala kakɔ ɔtɔi nde akatshike mbika* Rama ndo akatshike olimu ande. 6 Oma laasɔ, nkumekanga Asa akɔshi Juda y’otondo, ko vɔ wakɛmbɛ ave la esembe wa la Rama+ wakakaka Baasha la wɔ,+ ko nde akayokamba la wɔ dia mbika* Ngɛba+ ndo Mizipa.+
7 L’etena kɛsɔ mbakaye Hanani+ ɔmɛnyi w’akambo woshɛmi le Asa nkumekanga ka Juda ko nde ndjowotɛ ate: “Lam’ele wɛ akayaɛkɛ le nkumekanga ka Suriya ndo wɛ kondjaɛkɛ le Jehowa Nzambi kayɛ, asɔlayi wa nkumekanga ka Suriya wambomɔ oma lo lonya layɛ.+ 8 Shi ase Etiyɔpiya ndo ase Libiya waki olui wa woke w’asɔlayi waki kaamɛ la pusupusu ndo l’ambahemi wa mfalasa? Ko lam’ele wɛ akayaɛkɛ le Jehowa, nde akaakimɔ lo anya ayɛ.+ 9 Nɛ dia washo wa Jehowa watendaka lo nkɛtɛ+ dia mɛnya wolo* ande lo wahɔ wa wanɛ wele etema awɔ tshɛ wekɔ* le nde.+ Wɛ ambosala akambo oko kanga enginya lo dikambo nɛ; oma ko kakianɛ, wɛ ayoyalaka la ata.”+
10 Koko Asa akomalɛ ɔmɛnyi w’akambo woshɛmi, ko akawodje lo lokanu,* nɛ dia nde akawomalɛ nkɛlɛ k’efula l’ɔtɛ wa dui sɔ. Asa akatatɛ nsoya anto akina l’etena kɛsɔ. 11 Ɔkɔndɔ wa Asa, oma l’etatelo polo l’ekomelo kawɔ fundama lo Dibuku dia Nkumi ya dikanga ya Juda ndo y’Isariyɛlɛ.+
12 L’ɔnɔnyi wa 39 w’ɛlɔmbwɛlɔ kande, Asa akandama la hemɔ lo ekolo polo ndo nde monga baka la hemɔ; kaanga lam’akinde la hemɔ, nde kokadimɔ le Jehowa, koko le waa wetshi. 13 Oma laasɔ, Asa aketama dia momuya kaamɛ la watshɛnde;+ nde akavu l’ɔnɔnyi 41 w’ɛlɔmbwɛlɔ kande. 14 Ɔnkɔnɛ, wakookundɛ lo diombo dia woke diakandatatshimi dikambo diande ndamɛ l’Osomba wa Davidɛ,+ ko wakawetanya lo mbeto kakalole la esɔ ka balasama ndo diangɔ di’opumu dia weho la weho diakawasɔhanya lo yoho ya laande la esɔ k’okitelo.+ Ndo nto, wakasale otshumbelo wa mamba wendana l’okundelo lo dikambo diande.*